بیلیک ادعالی مجازی سیچانلار
جیرماقلاییرلار سانال صفحه‌لرینی
باش آپاریر گئجه- گوندوز بوش جیویلتی‌لری
بوشونا سرخوش جیویلتی‌لری
یوک ماشینلاری بئله چکه بیلمیر«مَنَملیک»لرینی
خان سیچانلار!!
اؤزلرینی آسلان سانان سیچانلار!!
حقیقی سیچانلار توز باسمیش آنبارلاردا
خیرچ- خیرچ دارتیرلار دَرین بیلیک‌لری
شیشیب-داشیرلار، آغیرلاشیر یوکلری
چیخا بیلمیرلر دیک‌لری!!
کیتابلار محبتلی باخیشلارا، نازلایان اللره سوسوز
بیلیک‌لر اوجوز…اوجوز…
بو تراژدی سونسوز…
آااا…ی یازیق کیتابلار!!
کیلکه‌لی ساچینیزی کیم داراقلار؟!
سیزی کیم سوراغلار؟!
سیزی کیم واراقلار؟!
ساغالماز یارانیزی کیم باغلار؟!
بارماقلار سانالدا اَسیر
جیبلریمده کولَک اَسیر
اوشویورم…اوشویورم…
چیگنیمده «داغ» داشیییرام!!
