آاااخ… چیرکابلی باخیشلار
اوغورلادیلار مندن بولاق گؤزلو پنجره‌می
هئره‌سینده دَن تؤکوردوم مونجوق گؤزلو سئرچه‌لره
دوپ- دورو آیناسیندا باخیردیم گونَش ایله گونه‌باخان سئویشمه‌سینه
سونبول ساچلاریم، آغاجلارلا بیرگه
سَرین یئلده رقص ائدیردی چرچیوسینده
سارماشیقلار گؤوه‌نیردی اونونلا قونشولوغا
یاغیش اؤونوردو گؤیچک اوزونو یوماغا
پنجره‌مین اوره‌یی او قده‌ر گئنیش ایدی کی؛
اونا گؤی ده سیغیشیردی، گؤیرچین ده
مگر ایلک کره چرپلنگ‌لر اوچاندا،
اوچوش ذؤوقونو او سالمادیمی بئینیمه؟!
هردن قونشونون قیزجیغازی گولوردو،
هر دن قادینی پالتار سَریردی رمکه‌سینده
قیسقانج باخیشلار چوخ گؤردو اونو منه؛
ایندی ایسه قاپی- قاپی هارادان آختاریم من آینا گؤزلو پنجره‌می؟!
قیللی اللردن قاچیب آسفالت اوزه‌رینده ماشینلار آلتینا دوشسه؟!
چیلیک-چیلیک سینسا؟!
ایتی تیلیشکه‌لری خائین اللری کسه‌جک می؟!
نارین سینیقلاری یئنه ده منی گوستره‌جک می؟!
ائه…
نه قدر چارپاشیق، پیرتلاشیق فیکیرلره گؤمولور اینسان،
قریبه‌دیر سئومک….
