عسگرین قوینوندا داشیدیغی قارداشلیق
یارالانیر جبهه‌ده
یئنیلمک ایسته‌مه‌سه ده
گون‌آیدینسیز اؤفکه‌لره.
گلنگئدن‌لرین پیس عادتی
اوشاق‌لارین یوخوسون شوخوملاییر،
کاسکا بیتیر دوستلوغون باشیندا،
قارشی ـ قارشییا دوزولموش سنگرلر
قورد کیمی
گئجه‌نی باشا چاتدیریرلار
گؤزلرین بیر آن یوممادان،
پای آپارمادان
یاغیشین موسیقی‌سینه دولان
آغاجین شئهلی قوخوسوندان.
بایراق‌لارین یئری ده‌ییشیر بعضا
دؤیوشچو‌لرین الیله، قانیلا
بیری ییخیلیر
بیری قالخیر
کیمسه ده بیلمیر بو یوکسلن بایراق
ساواشدان سونرا
تانیشلیق وئره‌جک اونو قالدیران عسگره؟
اونون قارداش اؤلدورموش ال‌لری
دوغمالیق یاشایاجاق گؤره‌سن
ائوینه دؤنندن سونرا؟
وطنسیز عسگرلر
وطن یولوندا محاربه‌یه گلیب‌لر!
