هئی…
قارا گئجه‌نین گیزلی اولدوزلاری!
نه‌دن منیم آجلیغیم
چیلله گئجه‌سیندن ده اوزونا سوردو؟
اینانین، من آجام
دن یوخدورسا
دیلیمی دارتین
منه بیر ال‌جه چؤره‌ک یاپین.

داریخما آنام
ایللردیر من دیلیمی دیشلریم‌له قیریب
قارا شوخوملوقلاردا اکیرم.
اینانیرام کی گلن یاز دیرچه‌لیب
یایدا دنه دولاجاق،
خرمنیم بول، چؤره‌ییم برکتلی اولاجاق.
یالنیز بوگون آجام
دیلیمی دارتین
اوشونمه‌دن منه بیر ال‌جه چؤره‌ک یاپین.