کوله سوورولوب تورپاغا قاریشیر
ائشیدیلمه‌ییب سکوتا گیزلنن
قیزجیغازلارین چیغیرتیسی.
ساچلاری سوورولور شرقه دوغرو اسن یئللرده،
قیریلیر قانادلاری، قارالیر گؤزلری،
قارالیر گله‌جه‌یی.
باسیر کیتابلارین باغرینا باغیریر،
یوخسا مئیدان اوخویور
کیمسه‌یه بو طیفیل نیگار؟
واراق‌لاری سوورولان کیتابلارین
مئییدینی باسیر باغرینا،
سانکی آنا بالاسین قورویور بومبالار آلتیندا.
قوروسون قلمین منه یازان بو قارا یازینی.
…
سؤیله شیرین قیزجیغاز
سؤیله سنه کیم یازمیش
بو قارا یازینی؟
باغیر، باغیر، بلکه کایینات اویانسین!
باغیر، بلکه انسانلار اوتانسین!
باغیر، باغیر منیم قیزیل ساچلی کؤرپه قیزجیغازیم!
باغیر، باغیر…!
