قیریلیب قالمیسان کونجده، بوجاقدا
نه‌یه ال آتیرام سن گؤرونورسن.
قیزاران کؤزومسن یانان اوجاقدا
دورورام،یاتیرام سن گؤرونورسن.

ییر- ییغیش ائدیرم نه وارسا سندن
ایلیشیب قالیرسان فیکیر- خیالدا.
آتیرام باشیمدان، آتیرام گؤزدن
چیخیرسان قارشیما کوچه‌ده، یولدا.

یادیما دوشمه‌ییر نه قیش، نه‌ده یاز
قیشیم دا،یازیم دا سن اولموسان، سن.
آجلیغیم، توخلوغوم چیخیر یادیمدان
چوخوم دا، آزیم دا سن اولموسان، سن.

یوخلوغون قاپیمی دؤیور هر صاباح
کؤنلومون بندینی قیریرسان منیم.
قاپیدان ائشییه آتیرام، والله
دوشوب پنجره‌مدن گیریرسن منیم.

گونش تک اوزاقسان، ایشیق تک یاخین
عؤمور سماسیندا گؤی قورشاغیمسان.
حیات دفتریمده تک یازیلیبسان
ایلک سؤزوم، اؤن سؤزوم، سن باشلیغیمسان.

قیریلیب قالمیسان کونجده، بوجاقدا
نه‌یه ال آتیرام سن گؤرونورسن.
قیزاران کؤزومسن یانان اوجاقدا
دورورام،یاتیرام سن گؤرونورسن.