بو ائو همان ائودیر
مسعود آذر
ایللر بویی آتامین قاپیسی
باغلی اولمادی دوستا یادا.
آنامین سوفراسیندان
دویمامیش چکیلن
بیر کیمسه نی ده تانیمیرام.
ایللر کئچیب، زامان اؤتوب،
باش آغاریب یاشا دولموشام،
هله ایندی بیلیرم کی
من نه آتام نه ده آنام اولموشام،
آمما شبه سیز
او ائوده ن خیردا بیر پای آپارمیشام.
ای منیم اوزون ایللریمین دوستو
آتام کؤچرسه ده
او ائوین هله ده قاپیسی باغلانماییب
سوفراسی دا آچیق.
یولون دوشرسه او کوچه یه
بیر کره یئنی دون
او مین کره دؤندویون ائوه،
اولارسا اوشاقلارینلا.
باخ! ائو همان ائودیر
چؤره ک همان چؤره ک
بلکه ده تاپ تازا.
اولارسا ائوده کی لر دئییشیب لر
آمما اوردان قاینایان فیکر
همان فیکیردیر، همان فیکیر.
۱۰/۶/۹۰
