«علی آغا واحید»ین بیر غزلیندن تضمین
بهروز صدیق
سانما اوره‌ییم بزمینه عصیان یئنه گلدی
شاد اول کی کؤنول باغینا مهمان یئنه گلدی
هیجران توکه‌نیب وصل خرامان یئنه گلدی
«غم چکمه کؤنول مجلیسه جانان یئنه گلدی
بو قالیبی بی روحه وئرن جان یئنه گلدی»
چاغلانسین اوره‌ک قوی گؤزه‌لیم وصل دمیندن
قورتارا یاخام بلکه جاهانین المیندن
ائتمه منی مایوس سن اول بول کرمیندن
«بیر نئچه گون اولموشدو گونوم تیره غمیندن
شاد ائتدی منی اول مه تابان یئنه گلدی»
هیجرین ائله‌میش ای پری روخساریمی سولغون
سولغونلوغوم ائتمیش گؤزومون یاشینی دولغون
بیتدیم یولو اوسته اولاراق خسته و دوشگون
«جانانه دئدیم بوینوما سال حلقه زولفون
گولدو دئدی دیوانه دوران یئنه گلدی»
بو سیل سرشگیم ائده‌جک دونیانی بر باد
جور ائتمه گولوم بسدی داها ترک قیل هیهات
وورموش اوره‌ییمدن منی او گؤزلری صیاد
«فرهاده دئیین ائیله‌مه‌سین داغ ده فریاد
بو مجلیسه اول خسرو خوبان یئنه گلدی»
شن نغمه اوخو دینجه‌له کؤنلوم بو سسینده
گولزاری ده گوللر آچیلا گور نفه‌سینده
شادلیق چاپا اؤز آتینی آرزوم کوچه‌سینده
«قان آغلاما بولبول دخی گولزار هوسینده
ایام خزان کئچدی گولوستان یئنه گلدی»
«بهروز» دئمه چوخ دولت عشقیله فقیرم
تن زار و کؤنول خسته و بیمار و علیلم
عشقیله او ماهین‌دی کی من بؤیله شهیرم
«واحید» بیلیر عالم منی او زولفه اسیرم
سن چوخ دئمه مجنون بیابان یئنه گلدی.»
شهریور٧٣
