اؤلوم ایچره گولوش پوسکورتوسو
مسعود آذر
اؤلوم گزیر شه‌هرده
قاپی – قاپی،
توخماقلاری دینگیلده‌دیر.
بو دار- دودوک کوچه‌لرده
دؤرد نالا چاپیر،
خیاوانلار اوشویور
سوسوب بوزاریر.
بیزه نه گلمیش انسان اوغلو؟
اؤلور انسانلار اؤز ایچینده،
اؤلور انسانلیق.
اوزولور اللریمیز بیر- بیریندن،
بارماقلاریمیز بیر- بیرینی یالایاراق
آیریلیریق ایسته‌مه‌دن.
یالواریر الکل قوخویان بارماقلارینا
باس منی باغرینا
اؤپوجوک ایسته‌ییر دوداقلاریم.
بوگون نفسیمدن دئییل
اللریمدن الکل قوخویور،
اؤگئی اولوب ال‌لریم اوره‌ییمه
اوره‌ییمی دینله‌میر داها.
اومیدسیز یاشاماق ایسته‌میرم؛
منی سئونلر هله ده توکنمه‌ییب،
من سئودیگیم انسانلارین سایی سایسیز.
بیر قولاق آس!
اوزاق اؤلکه‌لردن گلن سس
منی چاغیریر
الیمدن اوزمه الینی
مؤحکم یاپیشاق بیر-بیریمیزدن
بو قورخونو کئچه‌رک.
قاچیریر دوداقلارینی
گولور اوزومه
آچیر قوللارینی
منی باسیر باغرینا:
«سن ده قوجاقلا منی
دؤن باخ آرخاداکی یولداشیمیزا،
سؤنوک ببک‌لریندن
گولوش پوسکورور.
آخی بوگون بیرماییس
بوگون ایشچی بایرامی.
۱۱ اردیبهشت ۹۹
4 پاسخ
سلاملار و سایقیلار
حورمتلی و عزیز دوستوم شعیرلرینی اوخودوقجا ئورکدن سئوینه‌رَک سیزه فخر ائدیرم.
اومورام سنی هر زامان و داها آرتیق زیروه‌لرده گوره‌ک.
چوخ یاشایین
اللرینیز وار اولسون
حورمتله
منیم گوزل و ایستکلی یولداشیم
ساغ اول کی وارسان و شعرلرونله یوللارا ایشیق ساچیرسان.
منیم دوستوم
داغلاردا شلاله کیمی چاغلاییر
گویلرده اولدوز کیمی پارلاییر
فوق العاده گوزل اللر وار
ساغ اولون. دوشوندوروجو شعیرنیزه گؤره. اوزاق ایللرده بو سایاق موناسیبتلره یازدیغیم شعیریمدن بیر بؤلومونو سیزه و سایغیلی اوخوجولارینیزا سونورام سایغیلارلا: ائل اوغلو
ایشچی گونو
…………..
اؤتن ایل گؤروشدوک،
الویدا دئدیک-
بیرده گلن بایرام، گلن یازا ده ک.
گلن مای گونونده گؤروشدوک بیرده.
قالدی دوداقلاردا سؤز، کیتاب – کیتاب.
یئنه چاغیرمادیق،
یولداش منی تاپ.
اویوندان- اویونا ،
قورد آپاراندا…