گل آنا!
سحر_خیاوی
یاشام پوزغون اولوب آنا
بوتون آنیلاریمیز پوزغون
هر ایشیمیز پوزغون
یادیندامی؟
رویالاریمدا دئمیشدین:
بورا زنگ ائتمه ناگومانا
بوردا آنتن وئرمَز تلئفونلار
بوردا کیمسه دَستَک گوتورمَز
ایندیسه بیز اؤلمه‌میش اؤلوم یاشاییریق آنا؛
آنتن وئرمیر بارماقلاریمیز
هرگون دووارلار قالینلاشیر قارشیمیزدا
قارانلیق گئت-گئده قاتیلاشیر
هاا دابانیمیزی قووزاییریق
دووارلار بیزدن اوجاراق دورور
کیم ایدی یئر اوزو بیر کوره‌سل کنددیر دئییردی؟!
بیز کی بو کندین یام-یاشیل آخار-باخارینا تامارزی باخیریق هله‌ده
و یئر اوزونون کوره‌سللشمه شنلیک کارناوالینا حسرتلی
گَل آنا قیزین قوربان سنه
گَل قادین سسی ایله؛
آنا سسی ایله؛
چاغیر اینسانلیقی هاراییمیزا؛
دئنه ن:من بالاما چورکلی،گولوشلو و اوءزگور دونیا آرزولامیشدیم
گَل آنا؛
یئر کوره‌سی قیزمالی‌دیر بیزیم خریطه ده؛
ساییقلاییر یامان؛
گَل آیاقلارینی سووا قوی؛
آلنینا نَملی مندیل سَر
قیزماسینی آل
سن یاخشی باجاریرسان بونلاری
دانیش منه آنا؛
دئه منه وطن؛
کوبود یومروقلار آغزیما توشلانمیش بو من؛
آغزی تیلت قانلی؛
بو یئرین هاراسیندا دورموشام وطن؟!
گَل آنا؛
گَل اینسانلیغی چاغیر هاراییمیزا
ائشیدرلر یقین؛
آنالار دونیانین هر بیر یئرینده سایقیلی دیرلار
آنالار اینسانلارین اورتاق دیلی‌دیرلر.
