آنامین اللرینی یامسیلاما
تومارلایاراق تئلیمی!
قانین قانیمدان،
سوْیون سوْیومدان دئییل.
قورخوسوز یاشایا بیلمه‌دن
یوخوما چکیلن اولدوزلارا
گئرچک گؤیلرین یوخوسون دا گؤرمک
یاساق!
منیم آجی خاطیره‌لی کؤنلومون
قوجاق آچماسین اومورسان ایه‌ر
ساختا محبته
سهو ائدیرسن.
تریمدن قوخویان بو حیات
تانیشدیرسا، تانیش دئییل سنه.
نه تورپاق بیلیرسن نه دئمک،
نه کرپیج،
نه دمیر.
طیاره‌دن باخیبسان، باخاندا یئره.
جیبیمدن یاشادیغین حیاتین
گئدیشاتی باشقا.
اوره‌ییمدن قولوما
قولومدان قانالیغا
من وئرمیشم قیرمیزیلیغی
قدحینده‌کی شرابا.
سن نه بیله‌جکسن
اوزومون نه کیمی‌لییین؟