بوداغی اوزاق دوشموش قانداشیم ارغوان
بویون گؤیون هانسی رنگه چالیر؟
هاوا گونشدیر؟ یوخسا توتقوندور هله؟
من دونیادان قیراق بیر بوجاقدا
نه گونش باشیما ساچیر
نه باهاردان خبریم وار
گؤردویوم، دیواردیر
آه بو قارا قاتی ائله یاخیندیرکی سینه‌مدن نفس آلدیغیمدا
گئری قایتاریر نفسیمی
یول ائله قاپالیدیر کی قانادلانان باخیشیم بیر آددیملیغیمدا قالیر
دردلی بیر چیراغین کور ایشیغی، قیرقارانلیق گئجه‌نین ناغیلچی‌سیدیر
هاوا دا بوردا دوستاقدیر نفسیم توتولور
بوردا هر نه منیم‌له وار، رنگی- روخو سولوب
گونش بئله بو داخمانین اونودولموش حالینا گؤز اوجویلا گؤز آتماییب
سویوق نفسیندن شام‌لار بئله سؤنوب بو اونودولموش بوجاقدا
یادداشیمدا الوان بیر خاطیره آغلاماغا هوس‌لندیریر منی
اوردادیر ارغوانیم
یالنیزدیر ارغوانیم
آغلاییر ارغوانیم
منیم اوره‌ییمه تای قان آغلاییر
آنباشی گؤزدن آخیر
ارغوان، بو نه سیرّ‌دیر کی هر باهار، اوره‌ییمیزین یاسی ایله گلیر؟
یئر اوزو هر ایل قارانقوشلارین قانینا به‌له‌شیر
و قیزمار جییرلرین داغینا بئله بیر دامغا باسیر؟
یئرین قانلی پنچه‌سی ارغوان
سحرین أته‌ییندن یاپیش
و گونشه دوغرو سوزولن آتلی‌لاردان سوروش
هاچان بو غملی دره‌دن سووشوب کئچه‌جکلر؟
قان سالخیمی ارغوان
دان سؤکولنده گؤیرچین‌لر سحرین آچیق پنجره‌سینین هئره‌سینده هنگامه سالاندا
منیم گول بویالی جانیمی الیوین اوستونده توت
اوچوشلارین سیرانگاهینا آپار
آه تلس کی اؤز اوچوش‌داشلارینین قوصّه‌سینین قایغیسیندا قالیبلار اوچوش‌داشلار
باهارین گولگون بایراغی ارغوان
قالدیریلمیش قال سن
قانا بولاشمیش شعریمسن
یولداشلاریمین الوان خاطیره‌لری دیلینده سوزولسون
من اوخومادیغیم نغمه‌نی سن اوخو
بوداغی اوزاق قالمیش قانداشیم ارغوان!
ترجمه: ۹۵٫۱۰٫۱۹
