مندن سونرا گلن‌لردن بیری
بیر گون سحر تئزدن
گؤزون آچدیقدا حیاتا
آدیمی ائشیتسه ده
ائشیتمه‌میش کیمی کئچه‌جک یانیمدان.
کؤوره‌لیب، داریخسام دا،
قبیردن چیخیب
یومروق اسدیرسم ده هاوادا
فرق ائله‌مز.
من اولماسایدیم دا
کاینات یاراناجاقدی
هیتلر اولماسایدی دا.
پلیس‌لر گلیب، گئده‌نی سوزورلر
قادین‌لار
بیری ـ بیریندن سئومه‌لی
یئتکین آلمالاری گؤردوکده آغاج باشیندا
آدامین آغزی سولانیر
مندن سونرا
یئنه ده بوردان کئچن‌لرین
آغزی سولاناجاق،
ماشین‌لار سیقنال وئره‌جک،
بارماغیندا سیگار
سئودالی بیر اوغلان
دایانیب الکتریک آغاجینا
تئز ـ تئز بویلاناجاق آدام‌لارین ایچینه،
گئجه‌لر ایت‌لر
زیبیل‌لیک‌لری قوروق ائله‌یه‌جک،
یئنه ده آفریقالی‌لارا
ایبولا دوزلده‌جک‌لر،
فلسطین‌لی‌لر داش آتاجاق
الی سیلاحلی جوهودلره.
آللاه تروریست‌لری ساخلاسین
بوندان بئله
انگلیس‌لی‌لر گلیب
اورتا دوغودا بیرآز دینجه‌لر.
مندن سونرا
اورمو گؤلو قوروسا دا
گؤی اوزوندن اولدوزلار چکیلمییه‌جک،
دئو کیمی شاعرلر گله‌جک،
پناه چیخان‌لارین گمی‌لری
مقصده چاتمادان بوغولاجاق،
یاغیش یاغاجاق،
گون چیخاجاق.
مندن سونرا
یئنه ده کاتیب‌لر
تاریخ قوشاجاق.
