خالقیم!
قدرت ابوالحسنی سهلان(تورال)
اوزاق گؤیون تانریلاری، هاچان گلدیز یئر اوزونه؟!
سیز ایلشن اوبالارین گؤز تیکمیشم داغ-دوزونه
دؤنون گؤره‌ک هارالیسیز، کیم یارادیبدی بیزلری؟
اندیرسئیدیز سیز اینسانی، کیم یوللانمیشدی سیزلری؟
اولمپین دوز زیروه‌سینده، زئوس باشدا اوتورموشدو
سومئر-بابیل تانریلاری بول-بول آدلار گؤتورموشدو!
چینین، میصرین، مایالارین، باشقا-باشقا تانریلاری
بو گون اونلار یاساقلانیب، وار اورتادا آیریلاری!
بیر بیلیم، بیر گوج ایسته‌ییر، پوزانمادیم یالانلاری
گلن گئتدی، یالان نئجه، دوستاق ائتدی قالانلاری!؟
اینسانلارین خیاللاری نه دن اولدو ائله تانری؟!
اصلی تانری یاراتمیشدی، گؤندرمیشدی بئله تانری!
بیلمک اوچون، نئچه ایللر، ائللر ایچین سوراقلادیم
اله گلن کیتابلاری فیکیرلشیب، وراقلادیم
گؤردوم اینسان ایللردی کی، یالانلاری گئرچک بیلیر!
یانسیلاییر اؤلمزلری، اؤلوم توزون اوزدن سیلیر
من ده تاپدیم اینام بیر گون، تانریلار یئره انمیشلر
“فون دنیکن” دئیه‌ن تکین، تازادان گؤیه دؤنموشلر!
دامغالار قویموشلار بوردا، گؤستره یول قالانلارا
آمما نه‌دن دوز ایزلری اولدو قایناق یالانلارا؟!
گؤی اوزونون تانریلاری، یوللاریزی ایزله‌ییرم
اؤلوم منه چاتاناجان، گؤزوم یولدا گؤزله‌ییرم
سؤیلمیشدیز گلجکسیز، دوز اولایدیز ایلقاریزدا
گلسز گؤررم یالان نئجه، سولار سیزین کناریزدا!
آرزولاریم دویماساز سیز، قورخوم بودور دؤنمه‌یه‌سیز
جوابسیز قالا هر سورغو، دوشرگه‌مه یئنمه‌یه‌سیز
یالان منی سالا دیلدن، گئرچک کیمی اؤلمز اولا
یالواریرام گلین کؤنلوم، هر آن بوردا ایشیق قالا
*****
ایندی بوردا دایانمیشام، دینله‌میرلر هئچ سؤزومو
گؤز یاشلاریم یاغمور تکین بینمیر الده اوزومو
قارانلیق یوردومو آلیب، سوکوتو داغلارا سالیب
ارنلریم اؤلوب گئدیب، یئر-گؤیومو مانقورد چالیب!
دوزلر اوستون قارالیرلار، وارلیقلاری تالاییرلار
گئرچکلری باسدیریرلار، یالانلاری قالاییرلار!
چولقالیرلار یالانلاری، آغیر وارلیغیم دانیرلار
اؤلموشلری وار ساییرلار، وار خالقیمی یوخ سانیرلار!
*****
بو دورومو گؤره-گؤره، قورخومدان یالقیز باخیرام
اومود یوخوم گلجگه، گئچمیشه دوغرو آخیرام!
اونوداراق یالانلاری، درین خیالا جومورام
اسکی پالتار بورونرک، باشقا دونیایا اومورام
نئچه مین ایل اوزاقلاشیب، چیخیب بو چاغدان گئدیرم
چاتجاق بیر متین شهره، ایشینه دیققت ائدیرم
بو شهرین آدی “اوروک”، اوخویورام دوداقلاردان
باشلاییرام دولانماغا، یاخینلاردان، اوزاقلاردان
تانیش گلیر سؤز-صؤحبتی، سئویندیریر هر کس منی
دینله ییرم قوپوز سسین، واله ائدیر او سس منی
اوزان سؤزون ائشیدنده، آنلاشیلیر “تانری” سؤزو
نه آنلاملی سؤزلر واردی، نه سایقیندی اوزان اؤزو
بو شهرین پادیشاهی، چوخ آیریملی بیر خاقاندی
آیا بنزر داغا تایدی، آنجاق ظالیم بیر ترخاندی!
اونا دئییلیر اوروکدا: یاری تانری، یاری اینسان!
“قیلقمیش” آدلانمیشدی او، خالقینی بئزدیرن ترخان
هر ایشینده یامان ترخان، بیر چوبانا سؤزون دئییر
“انکیدو” آدلانان یولداش، قیلقمیشه دوزون دئییر!
چوبانلا خانین دوستلوغو، لاپ گؤزه‌ل بیر گؤرکم اولموش
اوزلریندن گؤرسنیردی، دوستلوقلاری مؤحکم اولموش
گئجه‌نی ایکی یولداشین، گؤزلری گؤیه باخیردی!
او زاماندا گؤرونوردو، اولدوزلار یئره آخیردی!
چوخ چالیشقان بو ائللره، آچیلار باغلی قاپیلار
بو اولوسون شرفینه، تانریلار گؤیدن تاپیلار!
باخ یازیرلار لوحه‌لرده، ایشلریندن ائللریندن
اونودماییب گئچمیشلرین، قالیر ایزلر دیللریندن
بیر گئجه-گوندوز اوروکدا زامان اؤلچولور، ساعتله
یاسالار اوردا آخاردی، کسر قیلینجلا، قودرتله!
من گزیریم اوردا آنجاق، فیکریم قالمیش قیلقمیشده
انکیدویلا بیلیم نئجه، یولداش اولموش قیلقمیش ده؟!
دؤنرکن ترخان ارکینه، آختاریشلاری بوراخدیم
لاپ اوجا دیوارلار اوستن، بویلانیب دؤرد گؤزله باخدیم:
گؤزله نیلمز منظره ایدی، گؤیله ترخان دارتیشیردی!
تانریلارلا آنلاشدیقدا، اونلار یئره چاتیشیردی
تانریلار ارکه اندیلر، بیر گونده قوناق قالدیلار
گؤیلردن خبرلر وئریب، خبرین یئرین آلدیلار
دؤنوب گئدنده دئدیلر: “انکیدو یئری ترک ائتسین!”
ناراضی قالسادا ترخان، سیرداش یولداش، گره‌ک گئتسین!
من ده گئچدیم آرابایا، منده اوچدوم گؤیه ساری
تانیق اولدوم وارلیغیملا، نه ائتدی اینسانلا تاری!
گؤستردی او سررلاردان، تازا گلمیش بو اینسانا
اؤیرتدی او گیزلی سؤزلر، هویوخ قالمیش بو اینسانا
شاشدیم گؤرجک باغلاییرلار، کیشینین ال-آیاغینی
هوشدن آپاریب سؤکورلر، یازیغین باش-قولاغینی
چالیشیرلار قافاسینا، باشقا برنامه تؤکلر!
بو تازا اینسان دؤننده، کؤهنه فیکیرلر چؤکلر!
چتین سیناقدان چیخمادی، اسکی فیکرین گؤی ساخلادی!
اوغورسوز آدامین لشی، یئرلینی گلدی داغلادی!
یولداشین لشین گؤرنده، دالغین اولدو قیلقمیش‌خان
آختاریردی اؤلمه‌مزلیک، داشقین اولدو قیلقمیش‌خان!
دئدی اوروک کاهینلری: “اوتناپیشتیمی تاپارسان!
سن اؤلمه‌مزلیک رمزینی، دنیزده اوندان قاپارسان!”
دوشدو قیلقمیش چؤللره، آران گئچدی، داغلار آشدی
زیل قارانلیقلار کسرکن، دئولریله قارشیلاشدی
دئولری ایشدن سالارکن، اورمانا گیردی سووشدو
سیناقلاردان بیر-بیر گئچیب، سوندا دریایا قووشدو
اوج-بوجاقسیز گؤی دنیزده، گلن دئییر: “اوتناپیشتیم!”
گؤیده دوشموشدو دنیزده، هردن دئییر: “اوتناپیشتیم!”
چوخ-چوخ آرام بو دریادا دالغالار هردن قالخیشیر
اؤلمه‌مزلیک آختارانلار، بلکه ده اوردا چیرپیشیر!
قیلقمیشده چیرمالاندی، “اوتناپیشتیم!” هارایلادی
یاری تانری، یاری اینسان، بیر یالواردی، بیر آغلادی
اوتناپیشتیم دوغرو گلدی، سوروشدو بو کدریندن
ایناملی باخیشلاریلا، خانا آنلاتدی دریندن:
“بو گؤی دنیزین ایچینده، تیکانلی بیر بیتگی بیتر!
جوم اونو تاپ در یئیرکن، اؤلمز اولاسان، درد ایتر!”
دالدی قیلقمیش دنیزه، دردی سودان آختاردیغین
چیخدی دریادان داش اوسته، تولازلادی زور تاپدیغین!
سویوندو ایستیر یویونسون، سونرا یئسین تر بیتگینی
اورادان گئچن بیر ایلان، یئتدی یئدی تئز ایتگینی!
اوتناپیشتیم باخدی دئدی: “توپراق سنی، آلار اولسون!
گئت خالقینا یاخچیلیق ائت، آدین اینسان قالار اولسون!”
ترخان اوزولدو دنیزدن، “خالقیم!” دئیه-دئیه، گئتدی
دویغولاردان آرالاندیم، گؤزلریمه چاغیم یئتدی
*****
خیاللاردان آیریلارکن، وطنیمده ظولمت چؤکموش
“زهتابی” آدلانان ارن، کسرانین کاخینی سؤکموش!
قارانلیغا سورگون اولموش، “تورال” دؤنموش ایشیقلارا
گئرچکلر اوزه چیخاراق، گئچمیش چؤنموش ایشیقلارا
گؤرورم کی یوردوموزدا، یالانچینین رنگی سولوب
گونش قالخیب گونئیییمدن، دوشمنلریم گؤرمز اولوب
آلوولار یوردو شنلیکده، بایراملاشیر دیلداشلاریم
اسمکده‌دی بایراقلاریم، دورماقدادی یولداشلاریم
گونون آیدین میشوو داغیم، گونون آیدین ساوالانیم
گون آیدین قارلی داغلاریم، گون آیدین آذربایجانیم!
ایضاح:
بو شعر، اریک فون دنیکین تانریلارین آرابالاری (ارابه خدایان) کیتابیندان، قیلقمیش ناغیلیندان و رحمتلیک پروفسور محمد تقی زهتابی‌نین ایران تورکلرینین اسکی تاریخی کیتابیندان، تاثیرلنره قوشولموشدو. شعر ۱۳۸۱ اینجی ایلین آبان آییندا یازیلیبدی.
زئوس: قدیم یونانلیلارین تانریسی
اولمپ: یوناندا داغ آدی
اوروک: سومئرلرین شهرلریندن بیری
قیلقمیش، انکیدو، اوتناپیشتیم: قیلقیمش ناغیلینین شخصییتلری
