یازیچی حمید آرغیش، «داوام ائدیر حئکایهمیز» آنتولوگیاسینین دؤردونجو جیلدینی حاضیرلاماق مقصدیله ادبی جمعیتیمیزه چاغیریش ائدیب.
حمید آرغیش، ۱۳۹۰-جی ایلده نشر ائتدیردیگی «هشتاد ایل حئکایهمیز» کیتابیندان سونرا بو لایحهنی داوام ائتدیرمک قرارینا گلیب. توپلادیغی حئکایه آنتولوگیاسینی دؤرد جیلدده «داوام ائدیر حئکایهمیز» آدی آلتیندا اوخوجولارا تقدیم ائتمگی پلانلاشدیرمیشدیر. ایندیهدک بو آنتولوگیانین اوچ جیلدی تاماملانیب، نشر ائدیلمیشدیر. تاماملانمیش جیلدلر حاقیندا معلومات:
– بیرینجی جیلد: ۴۳۲ صحیفه؛ باشلانغیجدان ۱۳۲۶-جی ایله قدهر
– ایکینجی جیلد: ۲۸۵ صحیفه؛ (۱۳۲۶-۱۳۵۷) ایللرینی احاطه ائدیر
– اوچونجو جیلد: ۴۰۵ صحیفه؛ (۱۳۵۷-۱۳۸۰) ایللرینی احاطه ائدیر
دؤردونجو جیلد ایسه (۱۳۸۰-۱۴۰۰) ایللری آراسیندا اثری نشر اولونموش چاغداش یازیچیلارین حئکایهلرینه حصر اولوناجاق.
حمید آرغیش بو جیلدین حاضیرلانماسیندا «خانیم رقیه کبیری»نین ده امکداشلیق ائدهجهیینی بیلدیریب. او، آدی چکیلن دؤورده اثرلری چاپدان چیخمیش بوتون حئکایه و رومان مؤلفلرینی اؤز بیوگرافیالارینی و اثرلری بارهده لازیمی معلوماتی بیر آی مدتینده آشاغیدا معین ائدیلمیش عنوانلارا گؤندریلمهسینی خواهیش ائدیبدیر.
حمید آرغیش اؤز چاغیریشیندا وورغولاییر:
«متنلرین سئچیمی توپلونون علمی معیارلارینا اۇیغون آپاریلاجاقدیر. هر جور سوال و مراجعت اوچون آشاغیدا گؤستریلن واسیطهلرله علاقه ساخلایا بیلرسیز. بو آنتولوژینین حاضیرلانماسیندا پایی اولان آذربایجانین چاغداش یازیچیلارینا اؤنجهدن تشککورلریمی بیلدیریرم.»
Arghish@gmail.com
tabrizlikadin@gmail.com
تلگرام: @Arghish
@kabiriR
یک پاسخ
دئو بیر ایش بو.. امگی کئچن هر کسه باشاریلار.