چوخ سؤزوم وار دئیه‌م!
ع.ن. چاپار

 گؤزلریمین ببه‌یینده قوناق گلدیلر-
بوم – بوز بولوتلار …
هانسی اوره‌کلرین آهی‌دیر اونلار؟!!

منه-
بیرچوخلارین خاطیرلاتدیلار.
بیر چوخلارین کی –
ایندی ده بوزاریب آها دؤنورلر.
تولامادان دوشن
_  دار بیر بوجاغدا _
خیردا بیر کؤز کیمی ، یانیب سؤنورلر،
کول اولورلار،
بوز کول !…

منیم چوخ سؤزوم وار-
دئیه‌م ، یازام دا . . .
سؤزومه قووت‌دیرT
الیف . .
بئی . .
جیم . .
. . . .
یای . .

سود یولو ،
یئر – گونش،
اولدوزلار و
آی .. .
آنجاق ،ایسته‌ییرم رساملار کیمی _
عینا” شکلین چکم  بوز بولوتلارین!
رسم ائدم آهلارین یانغی تیمثالین!…

ایندی
توپا – توپا بوز بولوتلاری،
چکمک ایسته‌ییرم جیزمالاریملا.
نه الیف،
نه بئیه،
نه یای‌ا… مؤحتاج !. . .
دویغولاریم آج‌دیر –
دویغولاریم آج!!!

تولامادان دوشن،
– من ده –
کؤز کیمی …
داریش بوجاقلاردا یانیب سؤنورم.
کول اولورام ..
بوز کول . . .
منیم چوخ سؤزوم وار-
دئیه‌م ، یازام دا . . .
ایندیسه،
ویرگول ،،،،
سونا چاتیشمایان سؤزون اؤنونده –
قارا بیر نوقتا.
گؤیلرین کؤکسونده توپالاق دوران-
قارا بولوت تک.
یالنیز ، نه بیر نوقتا .. .
اولدوزلار قدر – و،
اتک – اتک . . .

منیم چوخ سؤزوم وار-
دئیه‌م ، یازام دا . . .
چوخ سؤزوم وار !!!….