خلوت کوچه‌میزده
ع.ن. چاپار
هر زامان بو سسی ائشیدیرم من
هرگئجه، هر سحر
کوچه‌میزدن کئچن بیر آیاق سسی …
آیاق جینگیلتیسی بو خلوتلییه
یئنی بیر حزن ایله سس یاییملاییر؛
او سس، بیر سوکوتدان قاوزانیرسادا
یئنه بیر سوکوتا یول آلیب گئدیر! …
هر زامان بو سیرره اویورام نه‌دن؟
هارادان بیر نفر؟
– بو یولو سئچن –
بس آلیر نفس؟! ..
او نفس هارادان آلینیرسادا
بو سس‌سیز کوچه‌یه بیر یاراشیق‌دیر
آیاقین او سسی،
تک – نفسله یوخ ،
یالنیز ، اوره‌ییمین نبضیله وورور !!!
هر زامان بو سسی ان گئری‌لردن
– ان دینج بیر بوجاق –
عکس ائدیر همن.
بودا بیر هوس …
جینگیلتی اویانیر هر داش ایچیندن
داشلاردا آیاغا خوش گلدین – دئییر .
خلوت کوچه‌میزده قاباران سوکوت
او سسدن داهادا قابارمیر، کئییر ….
