کیسه هوروت- هوروت اوزومه باخیردی. آیاق‌داشی منی گؤرونجه کیسه‌نین دالیندا گیزلندی. دئیه‌سن بو قدر اوزوبرک و دؤزوملو اولدوغومدان، اوزو- اوزومدن اوتانیردی. هله ده اینانا بیلمیردی، یاشامین آجی- آغریلارینا، یئرلی- یئرسیز ائشیتدیغیم سؤزلره رغمن، گئنه ده بایرام حامامی یادیمدان چیخمامیشدی. آرخامی کیسه‌یه دؤنده‌ریب «اصلن هوروت- هوروت باخما، بیر ده بیر چئری باخ. من، هر گون یووونان بیر آدام، کیسه‌یله نه ایشیم وار؟»،- دئدیم.
کیسه دئدییین، او دا قدیم کیسه‌لر؛ بایرام حامامیندا، ایلی باشاباش، حامامین بیر بوجاغیندا، آسلامادان آسلانمیش قوپ‌قورو کیسه‌دن نه چیخار؟ روٍشور اوستونه یاغ کیمی یاییلان، خجّه سولطان خالانین کیسه‌سینه، کیسه دئیرلر. بیر حامام اهلی، بلکه ده بیر محله اهلی- کیشی‌لردن ساوایی- اونون کیسه‌سی‌نین آلتیندان گئچرمیشلر بایرام‌آخشاملاری. بابالی دئینلرین بوینونا؛ یئنی‌یئتمه چاغلاریمین قولاق گوناهکاری‌یام. قولاق- قولاغا گز‌ن پیچیلتی‌لاردان بئله بللی اولوردو کی خجّه سولطان خالا بیر ایکی حاجی‌نین دا اؤزل جان‌سورته‌نی‌یمیش. اولسون دا… بیزه نه؟ اونون اَلی یارانمیشدی کیسه توتماغا، جان سورتمه‌یه. کیشی جانی، خانیم جانی، اوشاق جانی… جان، جاندی دا، نه فرق ائلر؟ آنجاق بیر جان اولسون، بیر روشور، بیر کیسه، بیر ده خجّه سولطان خالانین قوّتلی الی.
دئیه‌سن ایندی هر ایشین قایدا- قانونو دَییشیب. بایراما بیر هفته قالمیش، بایرام حامامیندان سؤز گئدردی. بوقچا حاضیرلاناردی. حامامچی‌نین، جان‌سورته‌نین بایراملیغی آلیناردی. هانی او گئچمیش گونلر؟ کیشی‌لر چرشنبه آخشامینی قنیمت بیلییب، سحریسی بوقچا قولتوقلاریندا، مچیدلرین میناره‌لریندن اذان سسی قالخمامیش، جنابت‌لی جانلارینی دَلـله‌یین قووتلی اللرینه تاپشیراردیلار. ایندیسه، تقویمین واراغی‌نین دؤنمه‌یینه بئش دقیقه قالمیش، حاماما گیریب، اوچ دقیقه‌یه لیلیخلانیب، بایرام سوفراسی‌نین باشیندا ایله‌شیرلر.
آیاق‌داشینی داها آرتیق اوزدن آپاریم دئیه، گؤتوروب، دابانلاریمین بیر ایل‌لیک چیرکینی دویونجا سورته‌له‌دیم. هر نه اولسا بو ایل، من پیادا، زامان‌سا آت دالیسیجا قاچاجاغیمیزی دوشونوردوم. ساهمان، تمیز آیاقلارلا قاچماق داها دا جانا‌سینر اولور. آیاق‌داشینی یئرینه قایتاراندا، کیسه‌یه اوره‌ییم یاندی. روشور اولماسا دا اولماسین. مشدی عیباد دئمیشکن: «او اولماسین، بو اولسون» روشور یئرینه صابینی کیسه‌نین اوستونه چکدیم. سورت‌هاسورت، سورت‌هاسورت… اما نه قورت یئکه‌لیکده چیرکلر جانیمدان چیخدی، نه ده اتیمین دریسی قیزاردی. بونونلا بئله کیسه‌نی آسلامادان آسلایاندا، اوزومه گولوردو دئیه‌سن. اوسته‌لیک ایچیمده قایناشان غم- کدره رغمن جانیم دینجلمیشدی. آیاق داشی منه هوروت- هوروت باخیردی.
۹۲.۱۲.۲۸
یک پاسخ
fogolade çox gozal adame mixler bo facein naren yazelarina!!nagader da ozon olsa bashlasam olmaz ke gotolmamesh doram yazezen bashendan!!!