عمران صلاحي: نغمه‌سي‌نين آلوويلا،كوله دؤنن نغمه‌كار
حسن ایلدیریم
آنام
ديليمين اوستونه سپدي
كلمه – كلمه سؤزلر
شعر ، گؤيردي
ايندي
آغلار – گوله‌ين آغاجين غم عطيرلي گول‌لري
آياغينا ياراشير
عمران صلاحي
عمران صلاحي اؤلكه‌ميز ايرانين دونيا شهرتلي شاعر و ساتيریکی و معاصر آذربايجان شعري‌نين گؤركملي و ديرلي نماينده‌لريندن بيري‌ايدي. او دونيايا، انسانا، حياتا يئني باخيش‌لا باخدي، او يئني دويوملارلا دويدو، دؤرونون، يوردونون باشينا گلن حادثه‌لري آچيق گؤزله، درين دوشونجه ايله قاورادي، ياشانتي‌لاريني، دويدوق‌لاريني بديعي اثرلرده جانلانديردي. آذربايجان و فارس ديللي ادبياتا، يئني سسلي، يئني نفس‌لي اثرلر باغيشلادي. شعرميز عمرانين بديعي گوزگوسونه چئوريلدي. بيز او گوزگوده اؤزوموزو گورور و دويوروق. دونیا‌ني يئني بير باخيش‌لا سير ائديريك، حياتي يئني‌دن معنالانديريريق.
عمران صلاحي، طنزلرينده زمانه‌سي‌نين اوزونه گولدو، ليريك شعرلرينده، دؤرونون روحونو، جانيني ترنم ائتدي. او، گولوشو حياتين اؤزوندن اؤيرندي و اونو، توفيق‌چي‌لرين اوسلوبوندا سيناقدان چيخارتدي و ملانصرالدين مكتب‌ينده يئتگين‌لشديردي. بئله‌ليك‌له اؤزونون ساتيريك اوسلوبونو ياراتدي و بو ساحه‌نين اونودولماز سيمالاريندان اولدو. او ساتيرا حاقينداكي يازي‌لاري و آراشديرمالاري‌لا دا بو ساحه اوه‌زرينده چاليشان‌لارين يولونا ايشيق ســــاچدي. بو چوخ يؤنلي فعاليت عمران صلاحي‌يه اؤلكه ميقياسيندا اوغور قازانديردي و اونو ايران ادبياتي‌نين گؤركملي سيمالاري سيراسينا داخل ائتدي، دونیايا تانيتديردي.
عمران نادر بير شخصيته مالك صنعتكار‌ايدي. او ليريك شعرلرينه بنزه‌ييردي. آلچاق كؤنول‌لو، اينجه روحلو، بؤيوك قلب‌لي، شريف بير انسان‌ايدي. داها دوغروسو او انسانليغين جانلي آبده‌سي‌ايدي و بير پارچا صفاايدي. ايچي‌نين دورولوغو، گونش‌لي گؤزلرينده پارلاياراق، محبتي‌نين ايشيغي آخيب اوره‌كلره جالانيردي. او شعرلرينده چيچكلنير، گولوش‌لرينده گول‌لندي. وارليغي گؤزه‌ل‌ليك‌لرين پارلاق جيلوه‌سي‌ايدي.
او صفاسي ايله، گولوش‌لري ايله ، اوره‌ك‌لردن غم – كدري سيليب، قارانليق‌لاري ايشيق‌لانديريب، اؤلومو بئله، گؤرونمزليك‌لره‌جن قووالاياردي. كؤنلونون گؤي قورشاغين چتيـــر كيمــي آچــاردي، كــي انسانلار طاغي‌نين آلتيندان كئچه – كئچه، اونون شعر، صنعتي‌نين ايشيغينا بلنه – بلنه، دورولوب و انسان اولماق‌لارينا گوونه بيلسين‌لر:
بولوتلار، يارپاق – يارپاق
اولدوزلار پاريلدايير
يارپاق‌لارين اوستونده
اوره‌كلر يارپاق – يارپاق
ايستكلر پاريلدايير
يارپاق‌لارين اوستونده
اولدوزلار ، بولوتلار، ايستكلر ، اوركلر
عمرانين شخصيتي بیللور كيمي پارلاق‌ايدي. اوزاقدان باخاندا، شخصيتي‌نين پاريلتي‌سينا غبطه‌ايله باخا – باخا شاشيب قاليردين، ياخين‌دان باخماق ايسته‌ديين زاماندا، بیللورونون قيراق بوجاغي‌نين چوخلوغوندان، اونون كيم‌ليييني سئزه بيلميردين. او، يئنه‌ده سنين اوچون ال چاتماز، آچيلماز قاليردي. گؤره‌سن اؤزو، بو گؤزه‌ل‌لييينه واقف‌ايدي‌مي؟بيلميرم. اولسايدي بئله اوزه چيخارتمازدي. اونون داورانيشي، دويوم – دوشونجه‌سي، يازي‌لاريندا، شعرلرينده اولدوغوكيمي ايدي: مهربان، اوتانقاج و ادبلي. عمران چوخلاري‌ايلا دوستلاشميش، بعضي‌لري‌ايله قايناييب قاریشميش، كيمسه‌لر‌ايله ده باغيرداش اولموشدو. آنجاق هرحالدا او، اؤزوايدي. اوزو اوتانقاج‌ليغين، اينجه، يوموشاق ايپه‌يينين پاريلتي سي‌ايله بورونن زاماندا يا خود اوره‌ييندن پرهيز پرده‌سي آتيلان زامانلاردا، همان تواضع‌كار، پاك، شريف و سئوينج باغيشلايان انسان ايدي. اونون وارليغي باهاركيمي ايدي. آمما اگر سن بيرآز آييق اولسايدين، كؤنول كؤنوله اونونلا ياشاسايدين، گؤرردين كي، هانسي‌سا بير مزه‌لي احوالاتين، گولمه‌لي بير سؤزون، بير آتماجانين آردينجا، اوتانجاق‌ليغيندان، گولر‌گولمز، گولوش دوداقلاريندان قاچيب، گؤزلرينده اويناشاردي. او بو وضيعتدن ياخا قورتارماق اوچون ايچينده چالخالاناردي، بو دؤنه گولوش اونون اللري‌نين ايتي و تله‌سيك حركت‌لرينده چيرپينا – چيرپينا سوساردي … بير آندا سنه ائله گلردي كي نه ايسه اونون جانيني جايناقلاريندا سيخير. كؤنلونون كدري جاني‌نين ديبينه ياتا – ياتا او دا ياواش ياواش دورولاردي. جاني‌نين ايشيغي اوزوندن سوزولركن سيماسي ايشيق‌لاناردي. بيردن – بيره سن دوياردين كي بو سئوينجين درين‌ليينده نه بويدا كدر گيزلنيب:
كوچه‌لري دولانير
قاپي‌لاري دؤيور
پيله‌لردن چيخير
غم
بير يئكه مجمعه ده
آي، منه پاي گتيرير.
عمرانين شعري حيات كيمي‌دير. ساده و چاليشقان انسانلارين حياتي اونون شعرلرينين قايناغي‌دير. اونون سئودييي و شعرلرينده تصوير و ترنم ائتدييي انسانلار، زمانه‌نين چتين‌ليك‌لرينه، آجي‌ليق‌لارينا دؤزورلر، آجي‌لارينا، غم‌لرينه، زارافاتلارين، لطيفه لرين شيرين‌ليين قاتيب ياشايا – ياشايا، دونياني گؤزه‌ل‌لشديريرلر. تاريخين باشلانغيجيندان گونوموزه قدر دونیا‌نين مادي و معنوي ثروت‌لريني يارادان انسانلار. شعر، صنعت، اونلارين وارليغي‌ايله معنالانير. اونلار بو اثرلري منيم‌سه‌ييب ياشاديرلار. هانسي صنعت اثري اولورسا اولسون، اگر بو اثر اينسانلارين آرزو و ايستكلريني، رؤيالاريني، حسرت‌لريني اؤزونده ياشاتميرسا دئمك تاريخين توزاناغيندا ايتيب گئده‌جك. هئچ اولاجاق:
گمي لر
يئلكن‌لرين آچيرلار
فقيرلرين آه‌يندا
يا خود:
قوجا آروادلار
نفتي قورتارميش چيراقلار كيمي
اوتوروبلار، پنجره قيراغيندا
ائله‌جه ده:
بولود گلير
تولوق كيمي زهر تؤكور
چيچك بو باغدا قورخودان
سحر دوراندا، تر تؤكور
بو پارچادا:
ياشيل آغاجلار
بير بيرين گورمه‌ميش ده تانيرلار
آغاج‌لارين ديلي بيردير
يام‌ياشيل‌دير
خلقي‌ليك عمران صلاحي‌نين شعرلرينين باشلي‌جا سجيه‌لريندن‌دير. بو شعرلر خالق حياتيندان، خالق روحوندان مايالانيب، اينسان‌ليق ايشيغي ساريلان، جانيني خالق جانينا جالايان، دویغو و دوشونجه‌لريني، خالقين آرزو و ايستكلري‌ايله يوغوران بير شاعيرين ياراديجيليق سوزگجيندن سوزولوبدور. بو شعرلر هئچ بير ادبي تحليله ، يوزمايا احتياج اولمادان خالق كؤنلونه يول تاپا بيليرلر. بو قوه‌دير كي عمرانين ان محرم و خصوصي حس و هيجانلاريني ایفاده ائدن اثرلريني ده عمومي‌لشديريب، اوخوجولارينين دویغو و دوشونجه‌لرينه جالايير.
عمرانين شعرلرينين «ليريك مني»، اوشاق تخيل‌لو، اوشاق دویغولو، ياراديجي بير وارليق‌دير. اونون آيدين ، پارلاق ، تميز ، مهربان قلبي، ايچ دونياسينا ياد اولان عيبجرليك‌لري ، پيس‌ليك‌لري گولوش‌له اريديب يوخ ائتمه‌يه جان آتير. او آجيغيني، نيفرتيني، داخيلي چيرپينتي، چاخناشمالاريني ایفاده ائدنده ده، كسكين، سرت ایفاده‌لردن دئييم طرزلريندن قاچينير، بو آن اونون لحنينده، سؤزونده قيناق اوزه چيخير.
او ان آجي، ان دؤزولمز آغير غم‌لريني، داخلي سارسينتي‌لاريني، سانجي‌لاريني ائله دييشديريب، باشقالاشـــــديرير و گولوشـــــه، زارافاتا، شيرينلييه چئويريردي كي سن مات قاليردين، عمرانين ان بؤيوك باجاريغي، گوجوده باخ بو ايدي.او آغلاييشدان گولوش توره‌ده بيليردي:
غنچه، معطل قاليب دير
باهار يئلي اونا دئيير:
گئج اولار ، بير آز تلس
هاوا ائله آغيردير كي
قوشلار اوچماق ايسته‌مير
آچيق قالسا دا قفس!
ايكي داغين دؤشوندن، ايكي قاينار بولاق، جوشوب چاغلار، بير بيرينه قوووشار، آرخ اولار، چايلارا، دنيزلره دوغرو آخار، بو ايكي بولاغين قوووشاغيندان قايناق‌لانير عمرانين شعري.
بو بولاق‌لارين بيري آذربايجان خالقي‌نين، خالق يارديجي‌ليغي ايله چاغلايان، باياتي‌لي، قوشمالي، نغمه‌لي سينه‌سي‌دير، ديگري ايسه، فارس ديللي خالق‌لارين ترانه‌لر، مثل‌لر، دوبيتي‌لر، تصنيف‌لرله بزه‌نميش سينه‌سي‌دير. بو بولاق‌لارين جوهري، ماياسي عيني اولسادا، آنجاق بو جوهر بديعي بيچيم‌ده تظاهر ائدنده، اونلارين بويالاري، معنا چالارلاري، لحني، آهنگي، هر ديلين اؤزونه مخصوص سجيه‌لري ايله، ایفاده اولونور. هر ديلين اؤز گؤزه‌ل‌لييي ايله جيلوه‌لنير. عمرانين فارسجا شعرلرينه، آذربايجان ديلينين موسيقي چالارلاري، ایفاده الوانليغي، آناسي‌نين اوره‌ك دؤيونتولري‌ايله سس‌لشن آنا ديلينين ايشيغي دوشور. اونون فارسجا شعرلرينين ديليني شيرين‌لشديرير. آذربايجانجا شعرلرينده فارس ديلينين گؤزه‌ل‌ليك‌لري، فارس شعري‌نين بديعي قورولوش يؤنلري، ایفاده طرزي، شعرلرينين بديعي – ايسته‌تيك قورولوشوندا، بديعي تصوير واسطه‌لرينين توخونوشوندا، ایفاده‌لري‌نين رنگارنگ‌ليينده، اؤز عكسيني تاپير. بئله‌ليك‌له عمران فارس ديللي شعرلريني باشقا فارس ديللي شاعرلرين اثرلريندن فرقلنديرير. ائله‌جه ده آذربايجانجا شعرلري عيني وضعيت‌ده‌دير. بونلار هر ايكي ديلده اؤزونه مخصوص بير بديعي اوسلوبا مالك‌ديرلر. عمرانين يارديجي‌ليغيندا ، ايكي مدنيت‌ين، ايكي ديلين بير بيرينه قارشي‌ليقلي تاثيري گؤزه‌ل، دولغون عكسيني تاپا بيلميشدير:
بير دسته گول
چيراق يانير اوزاق‌لاردا
اولدوز يانير اوزاق‌لاردا
هر اولدوزدا بير سئوگي وار
هر سئوگي‌ده بير دسته گول
هر گول‌ده بير عطير
هر عطيرده بير كپنه‌ك
هر كپنه‌ك‌ده بير شاعير
يك دسته گل
در هر چراغ دوري
ستاره‌اي مي‌سوزد
در هر ستاره‌اي عشقي
در هر عشقي گلي
در هر گلي عطري
در هر عطر پروانه‌اي
در هر پروانه شاعري
عمرانين شعرده ايلك معلمي، اونون «ليلا ننه»سي اولموشدور. او سؤزلو، كؤزلو سينه‌سين نوه‌سينه آچيب، اونو سيرلي سئحيرلي عالمه آپاريب، او عالمين آل الوان فضاسيندا گزديريب اوره‌ييني مين بير رنگه چالان، مين بير نغمه قونداغينا بوکوب، روحونو قاينار سؤز چشمه‌سينده، يويوندوروب، دورولدوب، اونا ساده، صاف، صميمي و آيدين بير ديل، باغيشلاييب، عمران ياراديجي‌ليغي بويو بو عالمين فضاسيندان آيريلا بيلمه‌ييب.
سينه‌نده‌کي خاطره‌لر، بؤيوک باغدي
گؤزلريندن بولود کئچدي
ياغيش ياغدي
«ليلا ننه» گل باياتي اوخو منه
باياتي لارلا، بير کؤينک توخو منه
ناغيل دئنه کئچميش‌لردن
…
«ليلا ننه»
قوربان سنه
قويما يانام
آچ گؤزونو، من عمرانام!
عمران بو ساده، دورو، آخيجي ديلي تکجه آناسيندان، ننه‌سيندن دئيیل، يورد يواسيندان قووولوب ديده‌رگين دوشموش، تهرانين حاشيه‌سينده مسکن سالان، وطن‌داش‌لاريندان دا اؤيرنميشدير. او بو يول‌لا، بو ديل واسطه‌سي‌ايله زنگين خالق ياراديجي‌ليغي‌ايله تانيش اولموش، اونلاري اؤيرنميش، منيمسه‌ميش و شعري‌نين آيريلماز بير حيصه‌سينه چئويرميشدي.
عمرانين شعري، ياشاديغي دؤرون اجتماعي سياسي حادثه‌لريندن تأثيرلنمه‌سي ايله برابر اوشاق‌ليق دؤرونون، اوشاق‌ليق عالمي‌نين آب و هواسي‌ايله ده دولودور. عمران شاعرليي‌نين ايلكين چاغلاريندان، فولکولوردان دورلو – دورلو فايدالانميش‌دير، ايلک اثرلرينده شفاهي خالق ادبياتي‌نين ان ساده، اويناق و اوشاق دونياسينا داها ياخين داها اویغون اولان نمونه‌لريندن، او جمله‌دن دوزگولردن چوخلو استفاده ائتميشدير:
ياشارام من، ياشارام
گونش کيمي ، ياشارام
گونش کيمي سحرلر
داغدان، باغدان آشارام
بو ماراقلي و گؤزه‌ل شعرلرله برابر، باياتي‌لاريميزدان، باياتي‌لارين بديعي عالميندن، روحوندان، بو ياراديجيليق نوعونون تؤرتدييي احوال – روحيه اوزرينده بير چوخ شعريني قوشموشدور:
ميدان چيخيب‌دير آيا
آي ائنيب‌دير ميدانا
توزلو آي ايشيغيندا
«آتين اويناتدي گئشدي.»
عمرانين شعرلرينده خالق ماهني‌لاري‌نين ، بسته‌کار نغمه‌لري‌نين ده تاثيري آچيق – ساچيق گؤزه چارپير. عمران ماهني‌لاردان بير ياراديجي کيمي بهره‌لنميش‌دير:
سن گلنده پنجره‌لر آچيلير
يئل اوينايير پرده‌لرين تئلينده
«پنجره‌نين ميل‌لري
آچير قيزيل گول‌لري.»
بونلارين هامي‌سينا رغماً، عاشيق دونياسي عمران اوچون باشقا بير دونيادير. منه ائله گليرکي عمرانين شعرلرينده ان گؤزه‌ل سس‌لنن موتيولردن بيري ده عاشيق شعري، موسيقي‌سي‌دير. عمرانين شعرلرينده سس‌لرين چوخ مهم رولو وار، اونون شعرلرينده سس‌لر، سانکي رسم‌ده‌کي رنگ‌لرين رولونو اوينايير. اونو سس ترپدير. سس اونو گؤزه‌ل عالم‌لره چاغيرير، گؤزه‌ل‌ليک، شيرين‌ليک، آيدين‌ليق عالمينه چکير. بو سس‌لرين چوخو عاشيق‌لارلا باغلي‌دير. البته بو طبيعي بير حال‌دير. چونکي عاشيق دونياسي آذربايجان خالقي‌نين زنگين و رنگين معنوي دونياسي‌نين گوزگوسو دئمک‌دير. عاشيق ياردايجي‌ليغيندا انسان گؤزه‌ل‌لييي ايله طبيعت گوزه‌ل‌لييي بير بيرينه قوووشور. بير بيريني تامام‌لايير بوسازلي – سؤزلو دونیادا اورکلرين ان درين قات‌لاريندا گيزلنن حس‌لر، دویغولار، چيچکلنير، روحا قيدا وئرير، اونو اؤز عطرينه بورويور، اؤز رنگينه بله‌يير:
محبت
عاشيق لارين سازيندا
چالينيردي
محبت نغمه‌سي شاعيري ، شعر دونياسينا چکير:
عاشيق‌ين سسي چؤلده يانير
سسي اوجالير، شعريم اويانير
او اوره‌ييني بو سسين صدا لارينا آچير:
عاشيق‌لارين سسيني من ايچرم
عاشيق لارين سسينده من اوره‌ييمي سره‌رم
عاشيق‌لارين نفسيندن قيزيل گول دره‌رم.
بوســس سانکي دنيزدير. بوسس گؤزه‌ل‌ليک عاليميندن قاوزانان موسيقي‌دير:
بوسسين ساحيلينده
گؤزه‌ل باغ لار، باغ لاردا
شيرين – شيرين ميوه‌لر
بو سسين ساحيلينده
بيري مني گؤزله‌يير
يئلکن‌لريم دومانلاردا آچيلير
و گئتديکجه سازين سسي ، عاشيغين آوازي اونون روحونون، قلبي‌نين، دویغو و دوشونجه‌لري‌نين چاغلار و جوشغون احوال روحيه‌سي‌نين ترجمانينا چئوريلير:
سازين سيمي دالغالانير
دالغالار داشا ديير
جالانير
ايندي منيم اوره‌ييم
يئلكن‌سيز بير گيمي کيمي
دالغالارين ايچينده.
عمران صلاحي‌نين اجتماعي شخصيتي و صنعتي‌نين فورمالاشماسيندا ان اؤنملي رول اوينايان عامل‌لردن بيري ده، اونون ياشاديغي، ادبي – مدني محيط اولموشدور. بو محيط 40 نجي ايللردن باشلاميش 80 – نجي ايللره قده‌ر تاريخي – اجتماعي بير دورو احاطه ائدير. بو ايللرده ايرانين اجتماعي، مدني، سياسي، اقتصادي ساحه‌لرينده، بؤيوک دييشيکلر اوز وئرميش‌دير. ادبيات و اينجه صنعت ده بو دييشيکلرين تاثيريندن اوزاقدا قالماميش، بلکه ان درين ايزلري گوجلو تاثيرلري‌ايله اجتماعي حادثه‌لر بو ساحه‌لرده داها آرتيق اؤزونو عکس ائتديرميش‌دير.
عمران بئله بير چاغلار قاينار، ادبي – اجتماعي محيط‌ين يئتيرمه‌سي‌دير. اونون ياراديجي‌ليغي، اجتماعي شخصيتي بو دورده يئتگين‌لشميش، بو فضادان شعرلري تأثيرلنميش‌دير. عيني حالدا اونون اؤزونون ده بو فضانين يارانماسيندا اؤنملي رولو اولموشدور. بو دؤرده عمران اؤلکه‌ميزين بيرچوخ تانينميش و آپاريجي ادبي، مدني شخصيت‌لري، صنعتکارلاري ايله سيخ علاقه‌ده اولموشدور. بو شخصيت‌لر مختلف دونيا گؤروشلو، باشقا – باشقا آداملارايديلار. اونلارين ياراديجيليق عالم‌لري، فيكير و دوشونجه طرزلري، مختلف و بعضاَ ده تضادلي‌ايدي. عمران بونلارلا علاقه ساخلاياراق، اؤز نادر شخصيتي‌ايله اجتماعي حياتيندا ياشاما ميداني‌نين دايره‌سي‌ني گئنيش‌لنديرميشدير. هر هانسي بير شخصيت‌ده، داورانيش و گؤروشده انساني سجيه‌لري سئچيب، اونلاري قابارداراق، اؤزونون معنوي عالمي‌ايله، انساني ديرلري، اولچولري‌ايله اویغونلاشديرا بيلميشدي. اؤز من‌ليييني بئله بير رنگارنگ ، مختلف دوشونجه‌لر، داورانيش‌لار ايچيندن گيزلي و گؤرونمز بير خط کيمي کئچيريب اونلاري بير – بيرلرينه جالاميشدي. منيم فيکريم‌جه، عمران صلاحي اينديه‌جن گؤروب، تانيديغيم شخصيت‌لر ايچينده ان دموکرات، آلچاق کؤنللو، بؤيوک اوره‌کلي، بؤيوک آمال‌لي، قدرتلي بير شخصيت‌ايدي. بونا گؤره ده هامي اونو سئويردي. اونونلا فخر ائديردي. بو يگانه بير محيط، اؤزونه مخصوص بير فضاايدي. بئله بير خاص موقعيت چوخ آداملارا نصيب اولمور.
عمران بو فضادان باشقا ، آيري – آيري دونيالار، ياراديجي‌ليق‌لار، شخصيت‌لرله، اثرلري واسطه‌سي‌ايله تانيش اولور، او چوخ اوخويان، اطرافلي معلوماتي اولان بير شخص‌ايدي. عمران اوخودوقلاريندان ياراديجي بير شاعير و يازيچي کيمي فايدالانيردي. اونلاردان اؤيرنيردي اؤيرنديکلريني منيم‌سه‌يير و شعرينده، يازيسيندا، اونلاري ایفاده ائديردي.
عمرانين شعرينه ان گوجلو تاثير بوراخان، ايکي بؤيوک نهنگ شاعيري خصوصي ايله قيد ائتمه لي‌يم، ناظم حکمت و رسول رضا، بو ايکي استاد شاعر، بؤيوک صنعتکار عمرانين ياراديجي‌ليغيندا چوخ مثبت تاثير بوراخميش‌لار. عمران اونلاري تقليد ائتمه‌ييب، بلکه اونلاردان ياراديجيليق سيرلريني اؤيرنيب و اثرلريني معاصر دونياايله سس‌لشديره بيليب‌دير. شعري پخته‌لشيب، چوخلو تجربه‌لري ييه‌لنيب، دویغو و دوشونجه‌لريني حيات، انسان و وارليق حاقدا درين‌لشديريب. بويول‌لا بديعي – ايسته‌تيک عالمي‌ده زنگين‌لشيب، شعري‌نين بديعي تصوير واسطه‌لر، ایفاده، معنا چالاري الوانلاشيب، آيدينلاشيب و معاصر دونيانين قاباقجيل شعري‌ايله آياقلاشماغا، سس‌لشمه‌يه حاق قازانيب‌دير.
عمران بؤيوک شاعرلردن، خالقدان، حياتدان اؤيرنه– اؤيرنه،بیللورلاشيب ، شعري ده ساده‌لشيب ، آيدينلاشيب. عيني حالدا درين‌لشيب و حياتي‌لشيب‌دير. ايللر بويو آراييب آختارديغي بير عالمه چاتيپ. افق‌لري گئنيش‌لنيب ياراديجيليق دونياسي بؤيويوب. او افق‌لردن کئچه – کئچه، شعري‌نين يئرسيز بیر بزه‌يي تؤکولوب، اونون روحونون چيلپاق‌ليغي‌ايله بديعي عالمي‌نين گؤزه‌ل‌لييي وحدتيندن، قوووشماسيندان يئني بير عالم يارانيب، بوتون اينجه صنعت اثرلري‌نين، شعرين، ادبياتين، سو ايچدييي بير عالم. دوم – دورو، بیللور، ايشيق‌لي نغمه‌لر عالمي! «نغمه لشمک»، اوره‌کلرين ان صميمي حس‌لري‌نين، دوم – دورو دویغولارين، جانلانديغي بير عالم‌دير. عمرانين شعري بو بولانماز صنعت بولاغي‌نين گؤزوندن سو ايچيردي. آرزولارين، گؤزه‌ل‌ليک‌لرين، شعريتين، بيرلشدييي، سئحيرلي صنعت بولاغي:
ال لريمي اوزالتديم
آي ايشيغيني يئره سرديم
سبد سبد آلما درديم
دانيشسام، سپه‌لنر
آيين دورو بولاغينا، گول چيچک
هاوا نه ايچمه‌لي‌دير
آلما‌لارين عطري کيمي بير سئوينج
کؤينييمده گيزلنيب… .
باخ بئله نغمه‌لري اؤته – اؤته، بيزيم گؤزه‌ل سسي‌لي «دورنا» ميز شرقين گؤي‌لرينده اوچاراق سئوگي نغمه‌سي‌نين ان اوجا زيروه سينه اوچدو. بو «ياشيل باش سونا» ياشيل دريالارا، ياشيل آدالارا اوزدو، شرقين باشلانغيجيناجان، كي عومرونون ان گؤزه‌ل نغمه‌سيني اوخوسون. دونيا شاعرلري ايله بيرگه، انسانليق نغمه‌سي اوخودو. انسان سسي‌نين، انسان نفسي‌نين ان گؤزه‌ل نغمه‌لريني آلچاق‌ليق‌لار عيبجرليك‌لر، يارامازليق‌لارين حؤكوم سوردويو بير زمانه‌ده، شعري ياخشي‌ليق‌لار، گؤزه‌ل‌ليك‌لر، دوستلوق‌لار، قارداشليق‌لارين، گؤزه‌ل انساني خاصيت‌لري‌نين، گوزگوسونه چئويررك، دونيا قاباغينا توتاراق، شعر و ادبياتي صلحون، دوستلوغون بايراغي كيمي قالديرديلار، اؤزوده دونيانين ان اوجا يئرينده، شرقين دامي آدلانان پاميرده (اورادا بيزيم بير گؤزه‌ل انسان‌ميز دا ابدي خاطره‌سي‌ايله اويوماقدادير: حسين حراستي) نغمه اوخودو، پكن دانشگاهيندا، كاشغرده، اورمجي‌دا، آنا ديلنده شعرلر اوخودو. قارشي‌لاندي سئودي، سئويلدي. شاعرلر ايچينده پارلادي. او شعر اوخويا اوخويا او دياري اوره‌يي‌نين ايشيغينا بويادي. بيرده يوردوموزون سسي، نفسي، ايپك يولونون، مدنيت‌لرين قوووشدوغو بير دياردا سس‌لندي، عمرانين شعرلرينده جيلوه‌لندي:
آييلير
ياتان باغ
باهارين نفسينده
آچيلير
چيچكلر
قوش لارين دورو سسينده
يئل اسير
كول‌لره
اود يوخوسوندان اويانير
قوشولور
گؤل‌لره
پاريلدايير جاوانليق
پرده‌لري تيتره‌دير.
نه يازيق كي، اونون نجيب جانيندا قيوربليب ياتان اؤلوم واخت‌سيز باش قالديريب، شاعيرميزين مهربان قلبيني چالدي، زهرله‌دي. عمران هله «چين سفري»نين شعرلريني قوشماميش، خاطره‌لريني يازماميش (يازماغا باشلاميشدي) اؤلومونون شعريني قوشدو. غملي پاييز گئجه‌سينده، اؤلوم‌ايله حياتي اوزلشدي. اولوم ايله اؤلوم چاتيشديلار. اونون بدنيني پاييز خزاني‌نين ساري‌ليغينا ساريديلار. گئدر‌گلمز عالمه آپارديلار.
بودور: «خانه هنرمندان ايران» سارايي‌نين سكي‌سي. سول طرفده خطابت كورسوسو. ساغ طرفده عمرانين بؤيوك بير تمثالي. او تمثال‌دا عمرانين هميشه‌كي مهربان باخيش‌لاري انسانلاري سوزمكده‌دير. اونون عزيز خاطره‌سي يول‌داش‌لاري‌نين، دوستلاري‌نين، سئون‌لري‌نين توپلاشديغي جومالارا باش چكير. بير شيرين سؤز، بير آتماجا ايله اونلارين دوداق‌لاريندا گولوش اكيپ و يوخا چيخير. حسرتلرين، كدرلرين ايچينده ايتير. اونسوزلوغون آغير غمي جاماعاتين ايچينده دالغا‌دالغا ياييلير.
مني گؤي‌لردن سوروش
بلكه سنه دييه‌لر
بوردا بير يارالي دورنا ايزلندي
ديمديگينده بير دامجي ياش
سوروشسان هاراگئتدي
دييه جكلر: ناغيل لاردا گيزلندي… .
یک پاسخ
فراخوان شعر و مقاله
در دفتر عشق، هست نام “آرش”
خوشبختی خلق است مرام ” آرش ”
خلقی اگر آگاه شود یا خندان
آن وقت جهان شود به کام ” آرش ”
——————————————————————–
در آستانه سومین سالگرد درگذشت ” حمیدآرش آزاد” روزنامه نگار، مترجم، نویسنده و شاعر و طنزپرداز کشورمان تصمیم داریم تا با انتشار ویژه نامه ای تحت عنوان ” بررسی آثار و نوشته های حمید آرش آزاد” یاد و نام آن عزیز از دست رفته را گرامی بداریم.
لذا از همه دوستان،اساتید،شاعران ونویسندگان عزیزدرخواست داریم ،تابا ارسال آثار ارزشمند منظوم ، منثور وطرح های خود ما را در این راه یاری فرمایند.
مهلت ارسال آثار دوستان تا آخر تیرماه ۱۳۹2 می باشد.از الطاف بزرگوارانه ای که خواهید فرمود پیشاپیش سپاسگزاریم.
برای ارسال آثار ارزشمندتان می توانید از طریق:تلفاکس :5243487-0411
ایمیل:arashazad_si@yahoo.com
وآدرس : تبریز- خیابان فارابی شمالی-نرسیده به پل منصور-نبش کوچه بنفشه- پلاک 118- دفتر نشریه پیام آذربایجان اقدام فرمایید.
با تشکر
آرش آزاد 09143135764