اوخوماق زامانی: 7 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.


ستار گول‌محمدی‌- داغ هاوالی، یورد بویالی میصراع‌لار شاعری
حسن ایلدیریم

من، سئویملی شاعیریمیز ستار گول‌محمدی‌نین اوزونو گؤرمه‌دن؛اؤزونو، شعرلرینده گؤرموشم.سسینی کاست لرده ،قوشمالارینی گؤرکملی عاشیغیمیز، ععاشیق محبوبون شلاله‌یه بنزر سسینده دینله‌میشم. اونو اوخویا- اوخویا، دینله یه – دینله یه بَه‌ینمیشم

منجه هر بیر یارادیجی، دویغو و دوشونجه‌لرینی، ایده‌ال‌لارینی،دونیا گؤروشونو بیر سؤزله اؤز منلییینی، یاراتدیغی اثرلرینده عکس ائتدیرمکله،اؤز صنعتینده فردی اوسلوبونو، یارادا بیلیر. آنجاق، صنعت اثری تکجه یارادیجی‌‌سی‌‌نین شخصی حیس‌لری چرچیوه‌سینده قورونوب قالسا، زامان سوزگجیندن کئچیب، گله‌جک نسیللره چاتا بیلمز. صنعتکار(شاعیر) اینسانلارین اورکلرینده‌کی گیزلی حیس ‌و هیجانلاری اویاداراق، اونلارا ایسته‌تیک دویوملار آشیلاییب و دوشونجه‌لرینی اوخشامالی دیر . بو سعادته، حیاتی دریندن قاورایان، اینسانلارین حیات تجربه‌لریندن اؤیرنن ، اونلاری منیمسه‌ین،هامی‌‌نین گؤردوکلرینی، باشقا یؤندن گؤروب و گؤستره  بیلن شاعیرلر نائیل اولابیلیرلر. آنا دیلیمیزین گؤزل مئلودیاسی، آخارلی دئییم طرزی، چوخ معنا چالارلی سؤزلری نین دوزومو، توخونوشوایله، صمیمی، جانا سینر بیر طرز ایله ، حیس و هیجانلارینی میصراعلارا چئوریب باشقا اورکلره آخاراق، کؤنول‌لری اوخشاییب و اوخوجونون، دینله‌ییجی‌‌نین معنوی وارلیغینا چئوریله بیلیرلر.

یارادیجی شاعیرلر، کئچمیشی دریندن اؤیره‌نیرلر.گونوموزو ایتی باخیشلاری ایله سئیر ائدیرلر. دوغما یوردوموزون گؤزللیک‌لری بولاغیندان میصراع‌لارینی امیزدیریرلر.اینسانلارین آرزو و ایستک‌لرینی اؤزونونکولشدیریب،و بابالارین آچدیغی یول لارا قدم قویور لار. بالالارین، نوه‌لرین ایستک وآرزولارینا اوز توتوب، یئنی-یئنی جیغیرلارا یؤنلیرلر.  اونلار ،اؤز اثرلری ایله  گلجه‌یه آچیلان سحرلره بلدچی اولوب و اینسانلارین صاباحا دوغرو گئدن یوللارینا ایشیق توتورلار. بئله شاعیرلرین صنعتکار امه‌ییندن، گئجه‌لی-گوندوزلو آختاریشلاریندان دوغولان، صمیمی حیس‌لرله آشیلانیب، اینسانی آرزو و ایستکلری ترنم ائدن اثرلر، هامی اوچون گرک اولور.

بیزیم عزیز شاعیریمیز ستاردا، اوخوجو اوره‌یینه یول تاپان، نجیب آرزولو، صاف اورکلی، شاعیرلر سیراسیندادیر:

ستارام کؤنلومون تئلی

هز زامان اوخشاییب ائلی

دوستا اَسن سحر یئلی

یادا چووغون،‌ کوله‌یم من

ستارین شعرلری، ایستر فورما، ایتسر مضمون اعتیباری ایله خالق یارادیجیلیغینا، خصوصی ایله عاشیق شعرینه سؤیکه‌نیر. شاعیرین غزل،‌ چارپارا و باشقا شعر فورمالاریندا شعر یازماغینا باخمایاراق، اونون شعرلری، من دئییردیم کی، قوشما و گرایلی اوستونده قورولموشدور . بو شعرلرین بدیعی ایفاده اوصول‌لاری، بدیعی تصویر واسیطه‌لری، دئییم طرزی و… باشقا عنصورلری خالق یارادیجیلیغی ، خصوصی ایله ده عاشیق شعریمیزین  گؤزل عنعنه‌لری ایله سسله شیر . ستار  ،شعرلرینده مضمون و موندریجه‌ ایله  باغلی‌اولاراق، عمومیت‌له وصف‌دن، تصویردن داها چوخ، ترنم و روایت کیمی بدیعی ایفاده اوصول‌لاریندان بهره‌لنیر.. . “حیکمت دونیاسی” اونون ایده‌آل‌لاری نین دونیاسی دیر. شعرلرینده کی: حاق نیداسی، حیکمته چاغیریش، عیبجرلیک‌لری، لعنت‌له‌مه طرزی و گؤزللیک‌لری، خیرخواه‌لیق‌لاری اؤیمه شیوه سی، اینسانلاری دوغرولوغا، وطن¬پرورلییه، اوستون اخلاقی کیفیت‌لره سسله‌مه  یول‌لاری،  ایفاده ودئییم لری اوستادنامه‌لرمیزین بدیعی ایفاده واسیطه لرینی خاطیرلادیر. بو بیچیم اثرلرینده مودروک بابالارین یولونا اوز قویاراق، شعرلرینی، حیات فلسفه‌سینین ترجمانینا چئویرمیش اولور. ناراحات شاعیرین دویغو و دوشونجه‌لرینه ، ترنم ائتدییی آرزو و ایستکلرینه،بیزده شریک چیخیریق.

ستار، آذربایجانین دیلبر گوشه‌لری نین بیری، قدیم تاریخی، اسرارانگیز گؤزللییی اولان ،قاراداغ ماحالیندا دونیایا گؤز آچیب ؛اوجا داغلار،  قالین مئشه‌لر،گؤزل یایلاق‌لار ، درین دره لرقوینوندا  بویا- باشا چاتمیشدیر.   شانلی کئچمیشلی، ایستی قانلی اینسانلی ،  مونبیت طبیعت لی قاراداغ، یوردوموزون تاجی ساییلان عاشیق‌لار بئشییی‌دیر. او،ساز صدالاری‌‌نین، عاشیق هاوالاری‌‌نین بئشییینده بؤیویوب،دوغما یوردون اینسانلاری‌‌آراسیندا، دونیانین، حیاتین سیرلرینه واریب ،او خالقی ایله سئوینجیلی، غملی گونلر کئچیره- کئچیره شاعیر اولوب، سؤز قوشوب، دیلدن-دیله دوشوبدور. ایندی‌‌ایسه ائل شاعیری کیمی ساییلیب ،سئچیلن لر سیراسیا داخیل اولوبدور.

شاعیر بؤیوک منتدارلیق حیسی ایله. کیم‌لردن، هارالاردان قیدالاندیغینی ا وخوجولارینا بئله سؤیله‌ییر:

عؤمور یول‌لاریمی یاشامادیم تک

“وورغون”دان گوج آلدیم، “واقیف”دن کؤمک

“صابیر” خرمنیندن ییغیب بیر اَتک

خالقین کیملییینه، اؤزونه گلدیم

آییرماق اولارمی بیریندن، بیرین

هر صنعت اوجاغین، هر صنعت پیرین

بابام علسگرین، دده‌م شمشیرین

سؤزنمز اوجاغینا، کؤزونه گلدیم

“ستار”ام ای وطن عؤمورلوک یارین

چکیرم چینیمده معنوی وارین

“ایمراه”ین، “محبوب”ون، خان “کاماندار”ین

شیرین صؤحبتینه، سؤزونه گلدیم

منه ائله گلیرکی ،بو نهنگ سؤز اوستالاری، ساز بهادورلاری‌‌نین یارادیجی‌‌لیق بولاغیندان سو ایچن صنعتکار، اونلارین صنعت باغچاسیندان گول درن هر هانسی بیر شاعیر، اولو صنعتکارلار، بؤیوک شاعیرلرین، آچدیغی جیغیرلارلا آددیم‌لاسادا، اونلارین ایزلرینی ایزله‌سه ده، آنجاق اؤز سؤزو  -سوراغی اولمالی دیر. یوخسا ،صنعتده، ساده‌جه تقلیدچی کیمی قالیب و اؤز جیغیرینی آچا بیلمه‌یه‌جکدیر.  زامان- زامان  دیلدن – آغیزدان دوشوب اونودولاجاقدیر .آما، ستارین، دئمه‌یه اؤز سؤزو وار. بونا باخمایاراق کی،هله ده بو اولولارین سس‌لرینی،اون لرینی،کلام لارینین  عطیرلرینی دادلارینی، ستارین قوشمالاری نین میصراع‌لاریندا دینله ییر ،دویور. اونلارین دادینی  دادیریق.

بورادا ستارین شعر دونیاسی‌‌نی تمثیل ائدن، اونون یارادیجیلیق منظره‌سی‌‌نین سجیه‌وی خصوصیت‌لرینی عکس ائتدیرن بیر نئچه شعرینه توخونماق یئرینه دوشر دی:

داغلارا، شعرمیزده چوخ موراجیعت اولونور. منجه، داغلار حاقدا یازمایان شاعیریمیز چوخ آزدیر. بلکه‌ده هئچ یوخدور. چونکو داغ سؤزون گئنیش معناسیندا وطن سمبولودور. آذربایجان شعرینده وطن حاقدا شعر یازمایان شاعیر،‌ قوشما قوشمایان عاشیق- شاعیر یوخ‌دور. داغلاریمیز حاقدا ایسته نیلن قدر، ماهنی ، بایاتی ، عاشیق هاواسی‌‌، آتالار سؤزو واردیر.بیزیم شاعیرلر زامان- زامان داغلارلا دانیشمیشلار.داغلا دانیشماق، اینسانلا،‌ وطن‌له دانیشماق‌دیر. تاریخ‌له، زامانلا دانیشماق‌دیر.داغ، ایگیدلرین اینانج یئری، سیغیناجاغی‌‌دیر. داغ، اوجالیق،‌ یوکسک‌لیک، ووقار،‌ غرور ، دؤزوم و سیرلی‌‌لیک رمزی‌‌دیر. داغ آرتیق ادبیاتیمیزدا سو، گوندوز،‌ دنیز  کیمی تئز – تئز ایشله نیلن بیر بدیعی اوبرازدیر..

داغلار،ستارین شعرلری‌‌نین موتیولری‌‌نین بیرینه چئوریلمیش‌دیر. او داغلارا تئز-تئز موراجیعت ائدیر. موختلیف مقام‌لاردا، آنلاردا بیر سئوگیلی کیمی، بیر دوست کیمی، بیر آرخا کیمی،‌ یورد کیمی،‌ وطن کیمی داغلارا اوز توتور. او داغلاردان سؤز آچاندا؛ قایالاردا ایییدلرین ایزینی، یاشیل زمی‌‌لره جان وئرن بولاق‌لارین گؤزونو گؤرور. اونون شعرلرینده داغلار جانلی، گؤروملو، وصف اولونور. اونون داغلاری اینسانی‌‌لشیر و شاعیر سانکی عزیز و مودروک و چوخ سئویملی بیر اینسانلا دانیشیر. او بؤیوک هوس و محبت¬له داغلاردان سؤز آچاراق،‌ اوخوجودا داغلارا سئوگی‌‌ و محبت حیسی اویادیر. اونون شعیر لرینده کی،داغ هاواسی بیزیمده جیییرلریمیزه دولور.

کیم یاشیل قوینوندا چکسه بیر نفس

بیر عؤمور سینه‌سی چاغلار آ داغلار

ستار، داغلار اوغلودور. او،یوردونون گؤزللیک‌لری‌‌نین ایلکین‌لیینی داغلاردا گؤروب، اورالاردا تاپیبدیر.داغ هاواسی،‌ مین¬بیر چیچک قوخوسوندان،  مین بیر بولاق دورولوغوندان،   داغ چا یلارینین آخاریندان ، مین بیر دره‌نین هنرینیدن، سسیندن، قایالارین دیلیندن، مئشه‌لرین یاشیل ماهنی‌‌سیندان و … بیر چوخ گؤزللیک‌لردن تؤره‌نن هاوادیر. عادی کولک دئییل،‌ جانلی داغین دوغما نفسی‌‌دیر داغ هاواسی. بئله-لیک‌له بو هاوا گؤزللیک‌لر مایاسی‌‌دیر. طبیعت جوهری‌‌دیر. اینسان روحوایله، طبیعت جانی نین‌ قووشدوغو بیر وارلیق‌دیر داغ هاواسی. او هاوادا لوغمان نفسی واردیر. تورپاغا برکت، دوزن‌لیک‌لره یاراشیق وئرن داغلارین اَته‌یینده بویا-باشا چاتان، عؤمور – گونونو اونون یایلاقلاریندا، کندلرینده کئچیرن داغلار اوغلو، طبیعی‌‌دیر کی داغلارا باشقا جور یاناشمالی دیر. اونون اوچون داغلار، روح‌دور، سئوگی‌‌دیر، یاشاماق سئوگیسی‌‌دیر. صاف‌لیق، تمیزلیک،‌ غئیرت،‌ ارکان رمزی‌‌دیر.. داغلار بابک‌لرین، کوراوغلولارین، نبی‌‌لرین… آلینماز قالالاری‌‌نین یئرلشدییی بیر مکان‌دیر. داغلار شاعیر اوچون هم تاریخ، هم وطن، هم زامان، هم‌ده آرزولار بئشییی‌‌دیر. بیر سؤزله : اونون اوچون داغلار مقدس بیر وارلیق‌دیر:

دئیین اَسن یئللر چوخ تلسمه‌سین

وارلیغیمین واری بو داغلاردادی

قانیمدان سو ایچن حیات باغچامین

هر به‌هری، باری، بو داغلاردادی

هر بیر جیغیرینا سن باخسان درین

دویارسان کئچمیشین آیاق ایزلرین

تاریخه چئوریلمیش هر ایگید، ارین

داش اولموش مزاری بو داغلاردادی

هر بیر جیغیریندان مین بیر یول آشیر

هر جیغیر بیر عصرین یوکونو داشیر

بیزسیزده بو داغلار، ازلدن یاشیر

دونیانین باخاری بو داغلاردادی

آرزولار، اینسانین گؤروب – گؤتوردوکلریندن،  ایستکلریندن سو ایچر؛ اونون ایچ دونیاسی نین  سیرلری ایله یوغرولار ؛ معنوی وارلیغیندان قایناق‌لانار؛ اومیدلرینین ایشیغیندا گونو-گوندن بوداقلانار،‌ قول‌لانار و اونون منلیینی آیدینلادیب؛ عؤمور یول‌لارینا ایشیق ساچار. بو آرزولار نه قدردونیوی و اینسانی اولورسا، بیر او قدرده بشریت اوچون، دونیا اوچون گرکلی اولار. باشقالاری‌‌نین آرزولاری لا سسله شنده داهادا گؤزه للشرلر. آرزولار، آروزلارا قووشاندا بؤیوک بیر آرزو یارانار:بؤیوک اینسانلیق آرزوسو. آرزولار حقیقته چئوریلیب چییین اولان زامان، اینسانلیق اوزونه آغ گونلر گولومسه‌ییر. بیزیم شاعیرین‌ده آرزولار عالمی رومانتیک بیر عالم‌دیر.شیرین‌دیر، گؤزل‌دیر.. او آروزلار عالمینده، ماوی سمالاردا اوچان قوش آزادلیغینی، بوتون قایغی‌‌لاردان آزاداولان، اوره‌یینجه یاشایان اوشاق صافلیغینی، طبیعته جان وئرن سو آیدینلیغینی، اینسان اوره‌یینه، روحونا ایشیق چیله‌ین سئوینج شادلیغینی یاشاماق ایسته‌ییر. او آرزولاریندا ،سعادت، خوشبخت‌لیک جارچی‌‌سی اولماق اوچون گؤزل‌لیک‌لردن گوج آلاراق، چتین‌لیک‌لره سینه گریب، قاسیرغالاردان،‌ توفانلاردان کئچیب سئون‌لرین بخت اولدوزلارینی قوووشدورماق ایسته ییر.غم‌لری اورک‌لردن سیلمک، سئوگی نغمه‌سی اوخوماق عشقی ایله یاشاییر. حیاتین درینلیک‌لرینه واریب، اونون فلسفه‌سینی اؤیرنمه‌یه جان آتیر. دویماق، دوشونمک، حیکمت دونیاسینا یول آچماق اونون حیات آمالی دیر.. محبت سوراغلی، سئوینج نیشانلی، یاخشی‌‌لیق‌لار عشقی ایله یازیب یارادان شاعیرین اؤرو حاقدا آرزوسو دا نجیب و اینسانی اولور.

اؤزوم اؤزلویومه جان آتماق اوچون

یولچو تک یوللاردا ایزیم قالایدی

اؤزومو، اؤزوم تک یاشاتماق اوچون

هر دیلده، دوداقدا سؤزوم قالایدی

منجه شاعیر اوچون ان بؤیوک و مقدس آرزو ، اورکلرده یاشاماق، کؤنوللرده سسلنمک ،دوداقلاردا نغمه‌یه چئوریلمک آرزوسودور. شاعیرین بو آرزوسو چییین اولورسا او اؤلمزلییینه قوووشموش اولور.نه یازیق کی بو سعادت چوخونا قیسمت اولمور.

مقدس کیتاب ” تورات”دا بئله بیر دئییم‌وار: «دردیمی کیمه دئییم؟». بو ایفاده موختلیف چالارلاری ایله بؤیوک متفکرلرین، بیلیک صاحیب‌لری‌‌نین، سؤز اوستالاری‌‌نین کلام‌لاریندا ابدی‌‌لشمیش‌دیر. شعر دونیاسینداکی شیکایت‌نامه‌لرایسه، ائله بو دویقو و دوشونجه‌لردن یارانمیش‌دیر. اولو “فضولی‌‌”میزین اثرلری نین چوخو، بو احوال – روحیه نین بدیعی انعکاسی‌‌دیر سانکی:

دوست بی‌‌پروا، فلک بی‌‌رحم، دوران بی سکون

درد چوخ، همدرد یوخ، دوشمن قوی، طالع زبون

سایه‌ی اومید زایل، آفتاب شؤوق گرم

رتبه‌ی ادبار عالی، پایه‌ی تدبیر دون…

قایغی‌‌کئشلرین، اینسان سئورلرین،دریندن دوشونن‌لرین حیات پایی،  بؤیوک  اینسانی  آغریلاراولموش‌دور.. باشقا بؤیوک سؤزاوستادلاریمیزین‌دا یازی‌‌لاریندا و شعرلرینده بئله مضمونلارلا تئز-تئز راستلاشیریق. بؤیوک صابیریمیز دونیایا غم پنجره‌سیندن باخیرام، دییه- دییه یانیب یاخیلمیشدیر.. اؤلمز میرزه جلیل‌یمیز: دونیادا اَن بؤیوک درد ،آنلاماق دردی دیر – دییه  همیشه  گؤینه میشدیر …. دونیا ادبیاتیندا بو مضمونلار اولدوقجا موختلیف بیچیملرده، فورمالاردا بول-بول ایشله‌نیلیب‌دیر.

ستارین¬دا “کیمه دئسین آدام دردین دونیادا” آدلی شعری‌‌ده شیکایت‌نامه کاراکترلی شعردیر بو “بئش‌لیگ”ین هر بندی‌‌نین سونونداکی، قایتارما میصراع سانکی قیرمانج‌دیر، چیرپیلیر یارامازلیق‌لارین باشینا. دار دونیادا، هر شئی باش-آیاق اولوب: قارا آغی باسیب. یالان دوغرونو اودوب. آلچاق اوجانی مینییب. دوستلوق، غئیرت، کیشی‌‌لیک، نجیب‌لیک، پاک‌لیق و صاف‌لیق پوچا چیخیبدیر. دونیا ساریلیق آزارینا توتولوب. سانکی پولون-قیزیلین هوسی بوتون عالمی ساریییب دیر. دووران ، ایکی اوزلولرین، یالتاق‌لارین، فیریلداقچی‌‌لارین، دله-دوزلارین دوورانیدیر. نه عیبجر، نه چیرکین‌دیر بو زمانه.  بو اوزدن دیرکی ،شاعیرین سینه‌سینده سؤزلر قوور ائدیر، فیکیرلر اونو دیدیر، داغیدیر، اونسوزدا:

سئوینج آخیب اوزده یاشا دؤنوبدور

اورکلر برکیییب داشا دؤنوبدور

باش آیاغا، آیاق باشا دؤنوبدور

وجدان اوجوز، عار دَیرسیز، سؤز خطا

کیمه دئسین آدام دردین دونیادا؟

اینسان آخی دردینی، اورک سؤزونو باغیرداشی، یولداشی، اَن یاخین بیلدییی سیرداشی ایله بؤلوشر. بس بو نئجه زمانه دیر ، بو نئجه دووران دیر کی، حتی ساغ گؤزون، سول گؤزه بئله اینامی یوخدور. هله، وای اوندادیرکی، اینسان بو فاجیعه‌نی اؤز ایچینده یاشایا. باخ بئله:

عدالتدن صؤحبت آچیر کی دینیر

آمما اؤزو عدالت¬دن دیکسینیر

الده یاراق قودرت آتین کیم مینیر

اوزدن ایراق دؤنور “ستار” جلادا

کیمه دئسین آدام دردین دونیادا!

دردینی هئچ کیمه دئیه بیلمه‌ین‌لر ،ناغیل‌لاردا اولدوغو کیمی صبیر داشلارینا، قویولارا، داغلارا، داشلارا، سولارا، یول‌لارا… هارالارا، نه‌لره کی دئمه میشلر. شاعیرلرایسه سؤزدونیاسینا اوز توتورلار، دردلرینی میصراع‌لارا کؤچورورلر..

 بیزیم شاعیرده ،ایچینده آلیشیب یاندیغی آندا، سؤزلری سینه‌سینده شعله‌لندییی واختدا، ائل دونیاسینا، عاشیق صنعتینه اوز توتور؛ “کرمی‌‌”لرین یانغی‌‌سینا اوره‌یینی بوکوب؛ ساز هاوالارینین بئشیینده اودونو سؤندورمک ایسته‌ییر. “دئه‌گلسین” شعری بو احوال روحیه‌دن دوغموشدور. بو شعرین سؤزلری، ریتمی، داخلی اینتوناسیاسی، مضمونو چوخ ماراقلی دیر. بوشعیرده شاعیر دویغو و دوشونجه‌لرینی ایسته‌دییی مضمونو باجاریق‌لا جانلاندیرا بیلمیش‌دیر. بدیعی جهتدن توتارلی  و دولقون اولان بو شعرین ریتمی، قافیه سیستیمی، میصراع‌لارینین اؤلچو و بؤلگولری، بندلری نین باغلیلیغی، بیر-بیرینی  یاخشی تاماملایا بیلمیشلردیر. شعر سانکی موختلیف عاشیق هاوالاری‌‌نین نوت‌لاریندان، خال‌لاریندان هؤورولموش بیر موسیقی پارچاسی‌‌دیر. بورادا داخیلی گرکین‌لییی، ریتمین ایتی‌‌لییی‌‌نی،‌کسگین‌لییینی ایفاده ائدن (4+4+3) میصراع بؤلگولری ایله برابر قافیه‌لنمه‌ سیستمی، یئرلی – یئرینده ایشلنمیشدیر. “دئه‌گلسین” شعیری میصراع دوزومو باخیمیندان “مخمس‌”لر، “دیوانی‌‌”لرین بند قورولوشونا اساسلاناراق؛ قوشمالارین چارپاز قافیه‌لی بیرینجی بندلرینین  تیکرار‌لانماسی‌لا ،اوچ بند،واحید بیر مضمونو ایفاده ائتمکله، قوشمالارین بدیعی‌‌ قورولوشوندان یارارلانیب، یئنی بیرقافیه لنمه سیستیمی  قورماقلا ، ماراقلی بیر شعر فورماسی یارادا بیلمیشدیر.شاعیری سارسیدان دردلرین دئشیلمه‌سی، داخلی هیچقیریق‌لار، چیرپینتی‌‌لار، عؤمور عذاب‌لاری، دونیانین پیس اوزوندن جانا گلمیش، دوشونن، یانان، سئون بیر اینسانین داخلی سکسکه‌لری‌‌بو شعرده اوز بدیعی عکسینی چوخ دولقون وماراقلی شکیلده   تاپا بیلمیشدیر:

سازین کؤکدن، الین تئلدن دوشمه‌سین

گؤر نه قال‌دی باشیمداکی قال عاشیق

آلیشمیشام یامان اودلو چاغیمدی

بیر یاخیندان اوره‌ییمی آل عاشیق

یامان یئرده کرم دوشوب یادیما

اصلی دردی آلیب مندن حال عاشیق

نه گونده‌یم هئچ اؤزومده بیلمیرم

بوگونومه غم هاواسی چال عاشیق

محبتین یاراسی وار سینمده

عشق اودونا یانانلارا دئه گلسین

سؤزه باخماز بیر سئودا وار باشیمدا

احوالیمی قانانلارا دئه گلسین

منه ائله گلیرکی، بو میصراع‌لار، بو سؤزلر ،”کرمی”هاوالاری نین مشایعتی ایله شاعیرین قلبیندن قوپور. او عاشیق دونیاسی‌‌نین، خالق یارادیجیلیغی‌‌نین بوللور بولاغیندان سوزولوب گلن، جان وئریجی، روح وئریجی نغمه‌‌لر ایله، دورولدوقجا، کور ه لدیکجه، یاندیقجا سانکی تمیزلشیر، نغمه‌لشیر. دونیاسی، سئون‌لرین دونیاسینا قووشور.. سئوگی دونیاسی‌‌نین اؤلمز قهرمانلاری فرهادلارین، مجنون‌لارین، کرم‌لرین، یاندیغی اودلا یانماق ایسته‌ییر. او ملهم‌ینی کرم لرین یانغی سیندا، مجنون‌لارین فریادیندا، فرهادلارین عنادیندا تاپیر. اونلارین عؤمور داستان‌لارینی ترنوم ائده‌ن عاشیق‌لارین سازیندا ابدی‌‌لشمیش، یانیقلی هاوالارا اوره‌یینی بوراخماق ایسته‌ییر. شاعیر بو حیس‌لری، بو دویوم و دوشونجه‌لری آیدینجا سینا وایناندیریجی بیر شکیلده اوخوجولارینا چاتدیرا بیلمیش‌دیر.

ستارین شعرلری‌‌نین مضمونو، بدیعی قورولوشو،اونلارین معاصیر آذربایجان شعرینده کی موقعی حاقدا تام فیکیری ،اونون شعرلری‌‌نین چاپ اولوب یاییلماسیندان سونرا ، داها دوزگون سؤیله‌مک اولار. من اؤتری حالدا اونون شعرلری‌‌نین بیر نئچه‌سینه نظر سالیب ،اونلار حاقدابیر نئچه سؤز دئدیم . هله‌لیک بیر بئله.

ستارا اوزون عؤمور و یارادیجیلیقلا بزنمیش حیات آروزلاییر، الینی سیخیرام.

اشتراک گذاری در print
چاپ

2 پاسخ

  1. سالاملار و سایقیلار اولسون سیزه.منسیزدهن خواهش ائلئرم ستارین کیمه دئسین ادام ددین دونیادا شعرین تکمیلین سایتیزدا قویون.

  2. من هر زامان ستارین آدی گلنده هر نه دن اؤنجه شعرلریندن بو بند یادیما دوشر:
    اوره ییمده آرزیلار تکجه سنی آرزیلار
    وارلیغیم توکنسه ده اینتیظار قفسینده
    باشیم اوستدن کؤچسه ده دورنالار قاتار- قاتار
    سنی گؤزله یه جه یم اومید پنجره سینده…
    بو بندده اولان بدیعی تصویر وسئوگی دونیاسینین لاپ قیزغین چاغلارینی کئچیردیییم گونلر منی خیاللارین اوجسوز- بوجاقسیز دنیزینه توللایار.
    حؤرمتلی ایلدیریم موعللیم،گؤزل و فایدالی بیر یازی اوخودوم. آللاه سیزی ائلیمیزه و ادبیاتیمیزا چوخ گؤرمه سین…

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *