هر یانا باخیردین آغاریردی. داغ- دره‌نی، باغ- باغاتی، کندی- چؤلو قار بوروموشدو. گون اورتا چاغی مدرسه‌نین زنگی چالیندی. اوشاقلار های- کوی‌له ائشییه چیخیب، قار گولله‌سی اویناماغا باشلادیلار.
صیاد، احمد و بایرام‌دا بیر- بیرلرینه قار گولله‌سی آتیردیلار. اونلار اوینایا- اوینایا گلیب، کندین اورتاسیندان آخان چایین قیراغینا چاتدیلار. اورادا یورولوب، بو اویوندان ال گؤتوردولر.چایدان کئچیب ائولرینه ساری گئتدیلر. اونلار یول اوزونو دانیشردیلار. صیاد دئدی:- گلین گون‌اورتادان سونرا اووا گئده‌ک!
احمدله بایرام‌دا راضیلیق وئردیلر. قرارا گلدیلر ناهار یئدیکدن سونرا کوچه باشینا ییغیشیب، بیرلیکده گئتسینلر.
گون‌اورتادان بیر او قده‌ر کئچمه‌میش، صیاد کوچه باشینا گلدی. اونون آردینجا بایرام، سونرادا احمد گلدی.آزجا دانیشدیلار. صیادلا احمد قاییدیب، ایت‌لرینی سسله‌دیلر. سونرا کندین ایچیندن کئچیب دره یوخاری یولا دوشدولر. چوخ گئتدیکدن سونرا بیر داغ اته‌یینه چاتدیلار. بیر آز اویان بویانی گزدیلر. کول- کوسا باش اوزاتدیلار. هارادا تله گؤردولر باخدیلار. بیر نئچه ککلیک‌دن، دووشاندان گؤروب قوودولار. آمما هئچ بیر شئی توتا بیلمه‌دیلر. گون باتانا یاخین یورغون- آرغین قاییتدیقدا، بایرامین گؤزو بیر دووشانا دوشدو. تئز سسله‌دی:- اوشاقلار! دووشان، دووشان!
اوشاقلار دووشانین دالیسینجا قاچیب ایت‌لری کوشکورتدولر. دووشان یئیین- یئیین قاچدیغینا گؤره، اوشاقلار بئله فیکر ائتدیلر کی، اونلاری گؤروب، قاچیر. آمما نئچه آددیم قاچمامیش دووشانی بیر تولکونون قووالادیغینی گؤردولر. بیلدیلر دووشان هئچ اونلاری گؤرمه‌ییبدیر. بو آندا تولکو اؤزونو دووشانا یئتیریب، اونو بوغالادی. دووشان تولکونون الیندن قورتاریب، دؤندو اوزو یوخاری قاچماغا. تولکو بیرده اونو قووالاییب توتدو. دووشان چالیشیردی یئنه‌ده تولکونون الیندن قورتاریب، قاچسین. آنجاق تولکو دووشانین بوینونو آغزینا سالمیشدی.
دووشانین دالیسینجا قاچان اوشاقلار، اونلارا یئتیشدیلر. تولکو اوشاقلاری گؤره‌ن کیمی دووشانی بوراخیب قاچدی. دووشان کیری‌ییب قالمیشدی. صیاد اؤزونو یئتیریب دووشانی توتدو.
یارالی دووشانین اوره‌یی تاپ- تاپ چیرپینیردی. اونون اوره‌یی‌نین دؤیونتوسونو ائشیتمک اولوردو. دووشان تمنالی باخیشلاری‌ایله صیادین اوزونه باخیردی…
ایت‌لرده تولکونو بوراخماییب، دالیسینجا قاچدیلار. احمدله بایرام داغین بؤیروندن تولکونون قاباغینی آلماق ایسته‌دیلر.ایت‌لر تولکونو قوووب، داغ یوخاری چیخماغا مجبور ائتدیلر. تولکو داغین او اوزونده‌کی مئشه‌لییه آشماق ایسته‌ییردی. آنجاق احمدله بایرام الی آغاجلی اونون قاباغینا چیخدیقلاری اوچون، درحال دؤنوب، بیر اوچوروما ساری قاچدی. بیرکولون اوستوندن آتیلدی. یئره دوشنده قول‌لاری ایکی داش آراسینا کئچیب، بورخولدو. او حالدا اؤزونو ساخلایا بیلمه‌ییب اوچورومدان توللاندی. گوپپولتو ایله یئره دیدی. احمدله بایرام گلیب اوچورومدان آشاغی باخدیلار. تولکو قایانین آیاغیندا یئره سریلمیشدی. اونلار احتیاطلا قایادان ائنیب، تولکونون یانینا گئتدیلر. ایت‌لر اونلاردان قاباق چاتمیشدیلار و تولکویه هوروردولر. احمد تولکونو بلله‌دی. چوخدان اؤلموشدو. ائله بو آن قوجاغیندا دووشان اولان صیاد یئتیشدی. اوچوده سئوینیردیلر. احمد دئدی:- تولکونو نئیله‌یک؟
بایرام دئدی:- آپاراق کنده!
صیاد دئدی:- اؤلو تولکونون نه‌یینی آپاراق، نه اوچون اؤزوموزه یوک ائده‌ک؟
احمد دئدی:- تولکونو آپارماق چتیندیر. گلین قویروغونو کسیب آپاراق.
صیادلا بایرام بو سؤزله راضیلاشدیلار. تولکونون قویروغونو کسیب یولا دوشدولر.
بایرام دئدی:-کنده یئتیشن کیمی دووشانی کاباب ائله‌ییب، یئیه‌ریک.
احمد دئدی:- هن! بیز گلنده آنام تندیر سالیردی!
– هئچ اوره یینیزدن گلر بو حئیوانی کسه‌سینیز؟ گؤرون نئجه اوره‌یی چیرپینیر! باخین، گؤزلری‌ایله آداما یالواریر.
بایرام دئدی:- بس گون اورتادان ایندییه قده‌ر نه‌یه اؤزوموزو یورموشوق؟
صیاد دئدی:- یورولساقدا، من قویمارام بو حئیوانی اؤلدوره‌سیز.
احمد دئدی:- بایرام! صیاددا پیس دئمیر؛ دوزدور بیز اؤزوموزو چوخ یورموشوق، آمما آدامین اوره‌ییندن‌ده گلمیر بونو کسه.
بایرام سوروشدو:- بس اونو نئیله‌مک ایسته‌ییرسینیز؟
صیاد دئدی:- یاراسینی باغلایاق ساغالسین. اوچوموزون اولسون؛ هر گون مدرسه‌دن قاییداندا اونونلا اوینایاریق.
احمد دئدی:- او چؤل حئیوانی‌دیر، ائوده قالماز؛ اوره‌یی توتولار.
صیاد دئدی:- یاواش- یاواش اؤیره‌نر.
احمد دئدی: -گؤزوم سو ایچمیر.
بایرام دئدی:- اولسون، گؤرسک چوخ داریخیر، گتیریب یئنه بوراخاریق چؤله.
اونون بو سؤزونو احمدله صیاددا قبول ائتدیلر. سونرا گولدولر. اونلار دره اوزو آشاغی یولا دوشدولر. یول اوزونو بئله اوخویوردولار:
صیادلاری توولارام،
داغدا- داشدا قوولارام.
من خیرداجا اووچویام
اووچولاری اوولارام.
