بو ایل بایرامدان بری حالیم هرگون خارابلاشیردی. یای باشلاناندان اؤلومله گوله‌شیردیم. داوا- درمان، او دوکتور بو دوکتور کار وئرمیردی. مرداد آیی‌نین اون‌بئشینده اون گون ده خسته‌خانادا قالدیم. اونون دا فایداسی اولمادی. هر هانسی دوکتور گؤروردو، دئییردی:
– قوجالیقداندی. الیمیزدن ائله بیر ایش گلمز. آپارین، ائوده استراحت ائله‌سین!
یاواش- یاواش اوشاقلاریم دا الیمدن بئزیردیلر. اوغلوما هر واخت زنگ ووروردوق دئییردی:
– بو گئجه نگهبانام؛ صاباحدان دا ماموریته گئده جم؛ گله بیلمه‌رم.
قیزیم اؤزو بیزدن قاباق زنگ وورور، دئییردی:
– آنا، واللاه اوشاقلاری تک قویا بیلمیرم. فرهادین دا ایت اخلاقی وار. او اوشاقدان دا پیسدی. سحر- آخشام گؤز یاشی تؤکورم. اوره‌ییم اوردادی، آمما اؤز الیمده دئییل، گله بیلمیرم.
تک اللی آروادین دا منیم جنازه‌مه گوجو چاتمیردی. اونون دا آللاهیندان ایدی من اؤلم، بو وضعیتدن یاخاسی قورتولا. میراث اؤلوم ده گونده بیر دفه منه باش ووروردو؛ قونشولار تؤکولوب، منی اوزادیردی‌لار قیبله‌یه طرف. اوچ- دؤرد ساعات معطل اولوردولار. نه اؤله بیلیردیم، نه ده فره‌صاتلی دیریله بیلیردیم. قونشولار مایوس اولوب، دئییردیلر:
– بوندان اؤلن چیخماز؛ دورون گئده‌ک!
اورژانس نومره‌میزی تانیمیشدی. داها بیزیم تئلفون زنگیمیزه های وئرمیر، چاغریشیمیزا گلمیردی. حقیقتن، اؤز الیمده قالمیشدیم. گئجه- گوندور فیکیرلشیردیم: «گؤره‌سن من اؤلندن سونرا نئجه اولاجاق؟!»
بوگون آخشام اوغلوم نگهبان دئییلدی. ماموریته ده گئتمه‌میشدی. ساغ اولسون؛ گلیب، منیم قول- قیچیما بیر آز ماساژ وئردی، بارماقلاریمی اوغدو، تورمالادی، ننه‌سی چؤره‌ک‌خانادان قاییتمامیش دا، چیخیب گئتدی. او گئدندن اون دیقه سونرا من بیردن بیره چوخ راحاتجاسینا اؤلدوم؛ روحوم بدندن چیخدی. چوخ یونگولشمیشدیم گؤیده اوچوردوم. پنجره‌دن ائشییه چیخدیم؛ کوچه‌یه بیر گؤز دولاندیردیم؛ آروادیم الینده سنگک، قونشونون کیشیسی ایله خیمیر- خیمیر دانیشا- دانیشا گلیردی. چوخ تعجوب ائله‌دیم. آخی، او هر زامان او کیشینی پیسله‌ییردی؛ ایندی ائله بیل بیرجوت قوزو کیمی دولانیردیلار. تئز ائوه قاییتدیم. چوخ ماراقلی‌ایدیم آروادیم منیم اؤلمه‌دیگیمی بیلندن سونرا نئیله‌یه‌جک؟! امینم الینی قولاغینا قویوب، ائله قیشقیراجاق، هارایینا قونشولار تؤکوله‌جک؛ ائله قیشیقراجاق ائو تیتره‌یه‌جک. سؤزون دوزون آختارسانیز، بتر تعجوبلو ایدیم. ائله دوشونوردوم کی، من اؤلندن سونرا یئر کوره‌سی کُنْ فَیَکُونُ اولاجاق؛ ائوده دؤرد دوواردان توتموش، آینا- شمعداناجا یاس توتاجاقلار؛ هئچ اولماسا آرواد اوچ دؤرد دفعه هوشدان گئده‌جک؛ کوچه قاپیسینا قارا علم آساجاقلار؛ قاپی- قونشو قارا گئیه‌جک؛ قیزیم، آروادیم، باجی‌لاریم اوز- گؤزلرینی جیریب، داغیداجاق‌لار. هئچ بیلمیردیم بو ایشلرین منه بیر خئیری وار یا یوخ؟!
بو فیکرده ایکن، قالخیب اوتوردوم پذیرایی‌نین پرده‌سی‌نین شیشی‌نین قیراغیندا. ائوین هرطرفینی یاخشی گؤرمک ایسته‌ییردیم. بیر او قده‌ر چکمه‌دی آروادیم قاپی‌یا آچار سالیب، ایچه‌ری گیردی. جنازه‌مه باخمادان روسری سینی گؤتوردو، مانتوسونو چیخاریب آسدی ایشقابا. سونرا آشپازخانایا گئدیب، آلدیغی چوره‌گی قیرمیزی قایچیمیزلا کسیب، بوکوب قویدو فریزر موشامباسینا؛ اونلاری دا قویدو فریزره. اؤز- اؤزومه دئییردیم: «تئز اول باخ منه! من اؤلموشم. سونرا، هیجانیم داها دا شدتله‌نیردی، آمما اونون عئینینه ده دئییلدی. او اؤز ایشینده ایدی. اوجاق‌گازین آلتینی یاندیردی؛ چایدانی شیردن دولدوروب، قویدو گازین اوستونه. تله‌سیردیم؛ باغریم چاتلاییردی. دیری اولسایدیم، یقین بو هیجاندان سکته ائدیب، اؤلردیم. گئتدیم آشپازخانایا. بیر عؤمور حیات سوردویوم آدام، منیم اؤلدوگومو بیلندن سونرا نه ائده‌جه‌گینی بیلمک ایسته‌ییردیم.
ائله کی چای دم آلدی، آروادیم عادت اوزره اؤزونه بیر دولو لیوان رنگسیز چای بوشالتدی. گئنه ده عادت اوزره سسلندی:
– عاباسقولو، چای ایچیرسن؟
اوپن‌ین اوستوندن باخیردیم جنازه‌مه. من ائله اؤلمه‌میشدیم کی سسیم چیخسین. آرواد یئنی‌دن سسلندی:
– عاباسقولو بسدی دا، نه قده‌ر یاتاجاقسان؟! دور بیر چای ایچ!
منیم جینقیریم دا چیخمادی. آروادیم عادت اوزره منی سایمادی. بوشالتدیغی چایی آستا- آستا ایچدی. آز قالیردی اؤدوم داغیلسین. بابا من اؤلموشم با! آروادیم یئنی‌دن بیر ده سوروشدو:
– عاباسقولو چای ایچیرسن؟
گئنه مندن سس چیخمادی. آخی اؤلودن سس چیخمازکی! آروادیم دئدی:
– کیشی اؤلمویوبسن کی، هئچ اولماسا سسین چیخسین!
آروادیم چایینی ایچندن سونرا ایچدیگی چای لیوانینی یویوب، آسدی ماگ یئرینه. آشپازخانادان ائشییه چیخیب، هالا گلدی. تزه‌دن آشپازخانایا قاییتدی. ال تلفونو ماسانین اوستونده قالمیشدی. اونو دا گؤتوروب، یئنی‌دن گلدی هالا. عادت اوزره همیشکی یئرینده، موبلون اوستونده اوتوردو. بیردن گؤزو ساتاشدی منه. گؤردو بوینوم اییلیب، آغزیم آچیق قالیب، گؤزلریم دیره‌نیب تاوانا. اوجادان سسله‌دی:
– عاباسقولو! عاباسقولو!
مندن سس چیخمادیعینی گؤرنده، تئز الین آتدی آیاقلاریما؛ بوم- بوز ایدی‌لر. بیردن بیره اؤز- اؤزونه گؤز یاشلاری سئل کیمی اوزوندن آخماغا باشلادی. ائله او حالدا، ال تلفنونی گؤتوروب، اؤزوندن خیردا باجی‌سینا زنگ ووردو. آغلایا- آغلایا دئدی:
– مهین، یازیق اولدوم. عاباسقولو اؤلوب.
مهین چوخ تعجوبله او طرفدن بیر ایکی دفعه دئدی:
– آ، آخی من گؤرنده اؤلنه اوخشامیردی. نجور اولدو بیردن بیره اؤلدو؟
اؤز- اؤزومه دئدیم:
– زیر با زیرین قیزی، اؤلموشم دا. اؤلومون نجورو یوخدو کی.
یقین، اؤلمه‌گیمی ده گؤزو گؤتورموردو! کئشگه دیری اولایدیم، آچایدیم صاندیغی، تؤک‌ایدیم پانبیغی. مهین آرتیردی:
– دای ‌نئینه‌مک. اونونکو دا بوراجان ایمیش. آللاه رحمت ائله‌سین. اولان اولوب، کئچن کئچیب. آمما باجی جانی سن راحات اولدون. بالام جانی، منیم گئجه- گوندوز فیکیریم سنین یانیندا ایدی. آللاه بیلر بو بیر ایلی سن نه‌لر چکیبسن! بسدی دا، آغلاما! اؤلن ایله اؤلمزلر کی. دور زنگ وور اوغلونا- قیزینا، دی گلسین‌لر. بیز ده بیرآزدان گله‌ریک.
مهین آرتیردی:
– باجی، والله سن گره‌ک بیر چؤره‌ک ده الین ایله نذیر وئره‌سن. واللهی، جانین قورتولدو. اصلن غصه یئمه! یادینا سال او زمانی کی، تونبه‌تین قونشونون آروادی ایله آرانی سازلامیشدی. او پیسمیرخ قهبه‌نی دئییرم ها! اوندا سنین باشینا اویون قالمادی گتیرمه‌سین. شرکتین منشی‌سی یادیندادا؟ اوچ ایل گئجه- گوندوز اونو دولاندیردی. سنه قان اوددوردو، باشینا شامین موصیبتن گتیردی.
اؤز- اؤزومه دئدیم:
– پیی، گؤره‌سن مهین بولاری هاردان بیلیر؟! حتمن آروادیم دئییب دا! عجب، من دئییردیم به، آروادیم ائوین سیررینی هئچ کیمه دئمز. اه، من اؤلموشم، جهننمه گورا بیلسینلردا!
آللاه ریضاسی، اوغلوم منیم اؤلمه‌گیمی بیلن همان، اؤزونو یئتیردی. البه‌هل بانک کارتیمی ننه‌سیندن آلیب، گئتدی کی، پزشک قانونینی گتیرسین. ائودن چیخماق همان، اول عابر بانکا گئدیب، حسابیمدا نه واریدی اؤز حسابینا بوشالتدی. اوچ، دؤردیوزمین تومن حسابیمدا پول ساخلادی. بئیلانکی‌یا یئتیشمه‌میش بیر مطبه گیردی. دوکتور ایله دانیشدی. اونو گؤتوروب گتیردی باشیم اوسته. قیزیم، آروادیم باجیسی مهین‌له اوتاقدا ائوین، شرکتین مالینا نقشه چکیردیلر. من هله ایندی باشا دوشدوم کی، من اؤلمه‌میشدن قاباق، اوغلوم نییه گلمیشدی بیزه. دئدیم کی، بوگون آخشام اوغلوم نگهبان دئییلدی، ماموریته ده گئتمه‌میشدی. ساغ اولسون گلدی منیم قول- قیچیما بیر آز ماساژ وئردی، بارماقلاریمی اوغدو، تورمالادی. هله ننه‌سی چؤره‌ک‌خانادان قاییتمامیش، چیحیب گئتدی. سن دئمه، نقشه‌ایمیش. قاباقجادان منیم آدیما وصیتنامه یازیب، اؤزومه بارماق باسدیرمیش. خوشوم گلدی اوغلومدان. ننه، بالانین مخصوصن اومویدا مهینین الینی حنادا قویدو.
دوکتور جسدیمی معاینه ائدندن سونرا دئدی:
– آللاه رحمت ائله‌سین. اوچ ساعات اولار کی اؤلوبدو. بیر ایکی خط جیزما قارا یازیب گئتدی. او گئدندن سونرا اوشاقلار زیقینا-زیقینا دوکتورون خطینی اوخودولار: «بیمار پیرمرد ۸۵ ساله است که بعلت کهولت سن و در اثر سکته قلبی فوت نموده است.»
هله دوکتور قاپیدان چیخمامیشدی کی، قونشولار تؤکولدولر ائوه. بیر جیغان- ویغان دوشدو گل گورسن! اوغلوم، باشین چالیردی دووارا. قیزیم -«ای وای دده دئیه- دئیه، اوزون جیریب، قویدو یئره. آرواد هوشدان گئتدی.
بیر او قده‌ر چکمه‌دی منیم اؤلمه‌گیمی عراقدا صدام حسین ده بیلدی. من، او ساعاتدان رسمی اولاراق اؤلولره قوشولدوم. ایکی اوزلو دونیانین بیر اوزونده اؤرت- باسدیر، ماتم؛ او بیری اوزونده هامی اؤز ایشینه مشغول ایدی.
سون