آلتی آیلیق بیر یارانین آغریسی!
مسعود اسلامی
ایستر ایسته‌مز پئشمانلیغین سونسوزلوغوندا یاشادیغینی اؤیره‌نیب کیمسه‌یه هئچ نه دئمه‌دن اؤز ایچینده جهنم یاشاییر، گئجه گوندوزو خیاوانلاردا سوووشور. مین ایلدیر اوره‌یینده آلتی آیلیق بیر یارا وار! نه حکیم یانینا گئده بیلیر نه کیمسه‌یه دئیه بیله‌جه‌یی اوچون جسارتی وار! گئت گئده یارا بؤیویور؛ آغری چوخالیر. خرچنگ خسته‌لییی کیمی هر یئرینه زوغ آتیر. اؤز اؤزونه دئییر: «نه ائده بیلرم؟ بودا منیم آلنیمین یازیسی ایمیش، بلکه ده بو آغری باشقالارین دا فیکیرینی آغریدیر! دؤزمک‌دن باشقا نه ائدهبیلرم؟»
دووار ساعاتی ایشله‌مکدن یورولوب دایانسا دا زامان دایانماییر. آغری ایت اؤلوسو کیمی اته‌ییندن یاپشیب سورونور! گئت گئده قوجاغی سویویور! عملینین سونوجوندا اسیر اولدوغونو دوشونور. قوجاغی سویودوقجا اوره‌یی آجیشیر. بو آرادا فیکیرینین تئل‌لریندن یاپیشیب خیاوان اوزونو سورونور. اوردان سوووشاندا بوزکیمی دونورسا دا جهنمی‌لر کیمی اود توتوب یانیر. سو دالیسیجا قاچیر؛ یتیشجه‌یین ایلغیم‌لار سونگو کیمی گؤزلرینه سوخولور! اؤزونو بوراخیب کیمسه نین قوجاغینین ایستی‌لییینده قیزیشیر؛ اود توتور یانیر! یئرایله گؤی آراسیندا ان داش اوره‌ک کیمسه‌نی آختاردیغیندا اؤزونو تاپیر، -«لعنت گلسین فیکیریمه. لعنت گلسین ال‌لریمه» دئییر! -«بو درد منی اؤلدورسه ده کیمسه‌یه دئیه بیله‌جک جسارتیم یوخدور!» باشقا بیر عایله نین خوشبختلییینه فیکیرلشیب دئییر. -«گؤره‌‍سن او عاییله اؤز آختاردیقلارینی تاپا بیلیب‌دیلر؟ منی سئویرلر؟ یوخسا اونلاردا منی اؤزلری اوچون دوشمن سئچمیش‌لر؟ آخی من نه ائدهبیلرم؟ کیمسه‌یه دئیه‌جک سؤزوم نه دیر؟، کیمدن نه سوروشا بیلرم؟ کئشکه فیکیریم پاتلاییب ال‌لریم اودتوتوب یانایدی» دئییر! گاهدان دا دئییر:-«بو شهردن کؤچوب گئتسم آلتی آیلیق یارانی ایتیریب راحاتلاشارام بلکه! سن گؤردویون آلتی آیلیق آغری دئییل او، بلکه ده بؤیویوب لاپ گؤزل گؤیچک بیریاشام پایی‌دیر بیر عایله اوچون. گئت گئده گیزلین حیس‌لریم سیلکه‌له‌ییب سئوگیمی اویادیر بوآغری اوچون! بو نه آغری، نه یارادیر تانریم ؟ منی اؤلدورن بو آغری دیر یوخسا سئوگی! لعنت گلسین بئلنچیک سئوگییه! طبیعی دیر کی، هریارانین آغریسی اولار. آنجاق بو آغری سوموک‌لریمی پوکالدیب بدنیمی ایشدن سالیر. هر کس اؤز عملینین گیروووندا اولدوغونو دوشونمه‌لی و اؤزو اؤزونو جاوابلامالی‌دیر! بو ایشدن نه سنین باشین چیخار نه ده منیم.»
گئجه‌لر یاتا بیلمه‌ییر! بونون چوخ ایشی گئجه‌ایله باشلانیر! بو یارانی او گئجه، یاخشی تانیییر! یاخیندان گؤرسه اونون دا اوره‌یی دؤیونتویه دوشر! هله هاراسیدی کی، گئت گئده یارا بؤیودوکجه گؤزل‌لشیر! گؤزلری یاشام چیراغی، اوره‌یی نفرت دوشرگه‌سی‌‌دیر! هرنه اولسا دا، اون دؤرد یاشیندا بیر قیزا بنزه‌ییر! آلتی‌آیلیق یارانی نه تهر اون دؤرد یاشیندا گؤزل بیر قیزا بنرتمک مومکون‌دور!؟ کیم بو ایشی گؤره بیلر اصلن؟ کیم خرچنگ خسته‌لییینی سئور؟ بو سئوگی دئییل سارساقلاماق کیمی‌بیرشئی‌دیر! «ایت دریدن ال چکیب، دری ایتدن ال چکمه‌ییر»! آیری بیرعایله‌نین کیشیسی دونیاسین دییشدییی آلتی آیلیق آغری ایله نه باغلی‌لیغی اولا‌بیلر؟ یازیچی یوخوسوزدور، یوخسادا عاغیلینی ایتیریب! دوشوب شهرین جانینا آلتی آیلیق درین بیر یارا یوخسا اون دؤرد گئجه‌لیک آی پارچاسی، یوخسا دا اون دؤرد یاشیندا ان گؤزل بیرقیزی ایزله‌ییر!؟ بو نه دئمک‌دیر، کیمیسی اوره‌یینده یارا بسله‌ییر، کیمیسی بوراخیب خیاوانا قاپینی قاپاییر!
بورا پولسوزلار دئییل، دینسیزلر شهری‌دیر!؟ گئت ایشینی- گوجونو تاپ، سنه نه کیمسه نه ایتیریر نه تاپیر! «حؤرمتلی بیرکیشی ایدی دونیاسینی دییشن» او کیشی. هامی اون بیر یاشیندا بیر قیزکیمی سئوردی اونو!؟، او دونیاسینی دییشن گوندن نه‌لر اولدو کیمسه بیلمه‌ییر !؟ عاغیل کسمه‌ین نه اولایلار یاراندی! یازابیلمیرم!
بیر زامان بو یارانی ایتیرن سئوینیردی، ایندی تاپان سئوینیر. هرکس منیمدی دئیه آنالیزا حاضیرلانیر! کئشکه اینسان‌لار حیوان‌لار کیمی هر سسی ائشیدیب دوشونوردولر! گون گونو اؤتور، یازیچی یورولماییر. «یای‌وار، قیش‌وار، هله چوخ ایش‌وار »! بورا «سنی آختاریرام » مرکزی‌دیر. تاپیب تاپمادیغی هله بللی دئییل. هر یئره گئتسه ده یارا ایزینه دوشوب آرخاسیجا سورونور! کئشه کیمسه‌نین ویجدانی یاتمایایدی. یاتمیشدیسا اویانمایایدی بیر یوللوق! اویاندیغی حالدا باشقالارینی دا آییلدیب سارسیدیر آرتیق! نه‌لر فیکرینده اولدوغونو بیلمه‌ییرم. نه آختاردیغینی دا، هرنه آختاریرسان آختار، آنجاق تاپماق اوچون اؤزونه قاییتمالیسان! یورولمادان آختاردیغینی اؤزونده تاپا بیلرسن! او گؤزل قیزدا یارایا باخیب اؤزونو ایتیردی؛ یالنیز آختاریشلار اولایلارین مینلر ایل اؤنجه باغلاندیغی قاپیلارینی آچیب ایچریده نه اولدوغونو گؤستره بیلیر! دایان یورولما! ایز به ایز قاباغا گئده بیلسن گؤردوکلرینه ایناناجاقسان، هله‌لیک رکلاملار!…
آی اوره‌ک‌لرین درین یاراسی! نه اوچون ایزیمه دوشوب منی بوراخماییرسان. هر آددیم باشی بیر رکلام! گؤزلمه‌دن گؤزلریم گؤینه‌ییر! نه اولدوغونو صاباح بو زامان ایزله‌یه بیلرسیز! گون گونو گودور، هامی منی! ال وورمادان دئشیلیرم! صاباحا جان نئچه‌سی اؤلوب نئچه‌سی ده دیریله بیلر! بو قیز، گئت گئده بؤیویوب بیر یارا کیمی دوشور دینله‌ییجی‌لرین جانینا! سنین بؤیوک آرزین نه‌دیر؟ دئ هامی ائشیدیب بیلسینلر. آرزیم بودور منیم ده عایله‌م اولایدی کئشگه!؟ بورا رکلاملار شهری‌دیر! هرسؤز باشی سؤز الدن چیخیر، یازیچی چاشیر! داریخماغا گلمز؛ داوامینی گؤزله‌یین لوطفن!
یارا بؤیویور، یولوخوجو خسته‌لیک کیمی دوشور انسان‌لارین جانینا. دوغرودان دا بو یارا زامان سوره‌جینده اییله‌نیب، قوخوسو انسان‌لاری بوغور! بونو سئون‌لر آرخالارینا باخمادان قاچیرلار! اصلینده بو یارا دئییلمیش، آغیلا گلمه‌ین باشا گلن بیر اولاییمیش! زامان کِش کیمی اوزاندیقجا باخانلار اورک آغریسی توتورلار! آنالیزا حاضیرلاشان‌لار آرخالارینا باخمادان قاچیرلار! موردار قوخوسو بورنومو گؤینه‌دیر! اوزونو گؤرمه‌یه گؤزلریم گلمه‌ییر! بیر زامان اون دؤرد یاشیندا بیر قیزا بنزتدیییم بو یارا گئت گئده گؤزللشیرسه ده، زهله گئتدی اولدوغونو دوشونورم! یازدیقجا جانیم اویوشور! اؤزونو بوراخیب یاراتدیغی یارالارا فیکیرلشیرم! بیر نفرین اشتباهی باشقا گوناهسیزلاری سوچلاندیرا بیلیر! چوخ زاماندی اونو گؤرمورم، بلکه ائودن قاچدیغی کیمی ده اؤزوندن قاچیب! آنجاق هر یئره گئتسه قارا با قارا دالیسیجا گئده‌جه‌یم! گئده بیلمه‌سم ده، نه چوخ دؤنوم دؤنگه، من ده قویوب قاچاجاغام! بو ایشین سونوجو هله هله آیدینلاشمایاجاق! ائشیت قولاق‌لارین آغریماسین؛ گؤر، گؤزلرین ایشیقلانسین، -«هفته‌لر وقت آییریب سنی آختاریرام یوخسا آختاریرام سنی»!؟ بو قیزین سسی تورکیه‌دن گلیر. من هله رئکلام‌لاری ایزله‌ییرم! او،اوچ دفعه تورکیه‌یه گئدیب باشقا بیر یارانین نه تهر یاراناجاغینی ساغلاییر! گوناه بیر یوکدور کیمسه بوینونا آلابیلمز! -«اوز-گؤزونه نه گلیب؟» سوروشورام. «یوخوم گلمه‌دن یاتیم دئیه اؤز دیرناق‌لاریملا قوپارتمیشام» دئییر! سئوگی، یوخسا نیفرت اونودولاسی دئییل. گؤزله گؤزون وار اولسون، بو هفته گلیب باشینا نه گلدیییندن دانیشاجاقدیر داریخما…!
«یئتیمه وای وای دئینلر چوخ اولار » !؟
زامان اوزاندیقجا گون‌لر،ان کیچیک حصه‌لره بؤلونور؛ هفته‌لر یوزلر ایلین آغریسین بئینیمه بوشالدیر! دؤزه بیلمه‌دن بوراخیب گئتدیییمی دوشونورم! سیز ده داریخساز بوراخیب دالی قاپیدان گئده بیلرسیز! …
