چئویرن: ایشیق
ترجمه: ایشیق
ایشیق

اوزاقلاردا ایشیقلانان کندلر
سعید صادقی‌فر

هاوا قارانلیقلاشاندا هر زامانکی یولوم اردبیلین چؤللوک‌لرینه دوشور و شهرین قالابالیغیندان بیر آز آرا آچیرام . لاپ او اوزاقلاردا ایشیقلانان کندلرین چیراقلاری منی اؤزل بیر دویغویا آپاریر؛ سانکی اوزاقلاردان بیر نئچه کند منی گؤروب آردبیجیل دوزولرک چیراقلارینی یاندیریب سؤندورورلر. باشیمی ییرغالاییب چئوره‌مه گؤز گزدیرنده بعضی چیراقلار لاپ اوزاقلاردا بعضی‌لری ایسه لاپ یاخیندا گؤرسه‌نیرلر. گؤز قاپاقلاریمی بیر بیرینه یاخینلاشدیریرام؛ هله چوخ چتینلیک‌له کؤزرله‌نن چیراقلارین ایشیغی گؤزلریمه ساتاشیر . اؤزو – اؤزومه دئییرم گؤره‌سن او داغین دؤشونده یئرلشن پاریلتی هانسی کند دیر؟ او ایشیغی چوخ، او ایشیغی آز گلن کند هانسی بیر کند اولا بیلر؟ یوللارینی تانیدیغیم کنددیر می؟ یا هئچ بیر زامان آیاقلاریم اورالارین تورپاغینا توخانماییب‌می؟ بعضی‌لری منه ائله یاخین یاووق گلیر کی دئییرم ائله بیر ساعات اویناقلایا – اویناقلایا آددیملاسام اورانین آیاغینا چاتارام . بو اردبیلین شاختا کسن گئجه‌لرینده باشیمدا بیر توخونما پاپاق، جیب‌لریم اللریمی قیزدیریر. گئجه‌نی دوغا ایلا بیرگه آددیملاییرام . او سویوقدا بیر نئچه ساعات دوراندان سونرا ائله کی گئجه یارینی سووشور هر یان قیسا بیر سوکوت ایله بورونور، تکجه اوزاقلاردان یادا بلکه او یاخین کندلردن ایت‌لرین کؤنوله یاتان هوروشمه‌لری گلیر. نه بیلیم بلکه بو ایت‌لر بیر یئری قورویورلار کی سسلری گلیر یا دا سولک ایت‌لر سویوغو دؤزمه‌ییب هوروشورلر.
ساوالانین اته‌یینه باخدیقجا بیر نئچه کند پاریلداییر؛ سانکی اولدوزلار گؤیده دورماقدان یورولوب، بیرلیکده داغلارین دؤشونه ائنیب و اورالارا سریلیب‌لر. اولدوزلار سورو – سورو بیر بیرلریندن آیریلیب بعضی‌لری اتکلردن بیر آز آشاغا اوزلرینی اوفوق خطینه یاخینلاشدیریب، بعضی‌لری ایسه زیروه لره یاخین اوجالیقلاری سویوق گؤروب بیر – بیریندن آرالی دوروبلار و هر آخشام ایت قوردلارین اولاماسیلا گئجه‌لرینی سحر ائدیرلر.
گئجه چاغی ایشیقلانان کندلر نه قدر اوزاقلاردا اولسالاردا هوپدورما گوجلری چوخ اولور. دئمه‌لی گئجه گوزللیک‌لرینی سئون اینسانلاری اؤزلرینه ساری چکیرلر. آدام باخدیقجا دئییر: او پاریلدایان ایشیقلارا گئندن گئنه باخماق یئرینه قارشیمی سویوق بیر گئجه باغلاسادا هئچ اولماسا بو سرتلیی جانیما آلیب اورا گئدیم و یاخیندان اورالارا توخانیم. نه بیلیم بلکه ده ایشیقلارا یاخینلاشاندا او اوزاقلاردان پاریلدایان کندلر ائله ده گؤزل اولمادیلار. اوره‌ییمده بو سؤزلری دئیه‌رک قورو آرخین یانیندان کئچیب قوجا چینارین سیلپه‌یینده ایله‌شیرم؛ بیر ساوالانا باخیرام بیرده ایشیقلانان کندلره. توپورجه‌ییمی گؤیده دوندوران هاوادان درین بیر نفس آلیرام. اوره‌ییم سرینله‌ییب قابیرغالاریم تیتره ییر. هاوا ائله دوغرودان سویوقدور؛ ائوه گئتمه‌لییم.

چاپ

یک پاسخ

  1. سیزین بو گوده رمانیزی اوخودم سانکی اونو یاشامیشام چون من دقیقا او ساوالان ائتیینده کی کندلرده یاشامیشام منی چوخ اوشاقلیق خاطیره لریمه آپاردون و بیر توصیفه سیغمایان حیس دچار الدون چوخ گوزل ایدی و قلمون ده گوجلو

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوزاقلاردا ایشیقلانان کندلر/ سعید صادقی‌فر

ایشیق
www.ishiq.net

آذربایجان ادبیات و اینجه‌صنعت سایتی

اوزاقلاردا ایشیقلانان کندلر/ سعید صادقی‌فر

ایشیق
www.ishiq.net

آذربایجان ادبیات و اینجه‌صنعت سایتی

اوزاقلاردا ایشیقلانان کندلر/ سعید صادقی‌فر

ایشیق
www.ishiq.net

آذربایجان ادبیات و اینجه‌صنعت سایتی