چئویرن: مقصود تقی‌زاده هریس (نیسگیل)
ترجمه: مقصود تقی‌زاده هریس (نیسگیل)
مقصود تقی‌زاده هریس (نیسگیل)

چؤرک خیرداسی آلیرام، آی… چؤرک خیرداسی!

اونون کیچیک و یورغون آددیملاری کوچه نین آسفالتینین اوزه‌رینده سوروتله‌نیردی. یاناقلاری گونشین آلتیندا چارپاناق قویموشدو. ساریمتیل تئللری قیزارمیش قولاقلارینین اوستونده قیوریلمیشدی. اَینینده کی اسکی و بنؤوش رنگه چالان کؤینه‌یی یونگول یئلین اؤنونده یئلله‌نیردی. ایکی بالاجا الی فورغونون ایکی دسته سیندن یاپیشیب، اونو ایره‌لی سوروردو. نیگران و سولانمیش گؤزلری کوچه‌ده رنگ به رنگ قاپیلارا تیکیلیب و قولاقلاری قاپیلارین آچیلماق سسینی ائشیتمک اوچون شکلنمیشدی.

فورغونون ایچینده بیر کؤهنه نایلون تلیس و اونون ایچینده یاری‌یا قده‌ر چؤرک خیرداسی ییرغالانیردی. فورغونون ته‌یری جووولده‌یه- جووولده‌یه فیرلانیب و اوغلانجیغازی آرخاسینجا چکیردی. حیط لردن اوشاقلارین گولوب- اویناماق سسی و خییاواندان جور به جور ماشینلارین نریلتیسی ائشیدیلیردی. بعضی قاپیلارین اؤنونده سون سیستئم ماشینلار دایانمیشدی. اونلارین پارلاق رنگ لری بالاجا «حسن»ین گؤزونو قاماشدیریردی. هردن ده اونونلا یاشید اوشاقلار آل- الوان گئییملری ایله آتالارینین الیندن توتوب، آتیلا- آتیلا اورادان سوووشوردولار…

بو های- کویون ایچینده گاهدان بیر یورغون و یالواریش دالغالی سس دویولوردو:-«چؤرک خیرداسی آلیرام آی…چؤرک خیرداسی!»

نئچه آن سوووشدوقدان سونرا کوچه نین سونوندا یئرلشن بیر ائوین قاپیسی آچیلیب و بیر گنج قادین الینده بیر کیسه چؤرک خیرداسی- ائشییه بویلاندی. حسن چؤرک کیسه سینی گؤرن کیمی قادینا ساری جومولدو. کیسه‌نی اونون الیندن قاپیب، فورغونداکی تلیسه بوشالتدی.

گون باتان چاغینا یاخینلاشیردی. حسن ییغدیغی چؤرک خیردالارینی باققال ایسماییلا ساتماق اوچون کوچه‌نین سونونداکی خییاواندان اوتایا آتلامالی ایدی. اونون بالاجا اوره‌یی بویونکو قازانجیندان و تلیسین آغیزا قده‌ر دولماسیندان سئوینیردی. تلیس آغیر اولسا دا، حسن تؤوشه‌یه- تؤوشه‌یه فورغونو قاباغا ساری ایته‌له‌ییردی. خییاوان شولوق ایدی. او، گؤز- گؤز ائله ییب فورغونی خییاوانین اورتاسیینا قده‌ر آپارمیشدی کی بیردن- بیره چؤرک خیرداسی ایله دولو تلیس فورغونون اوستوندن سویروشوب یئره دوشدو. خیردا چؤرک‌لر خییاوانا سپه‌لندی. حسن تلیسی قالدیرماق ایسته ینده بیر بؤیوک ماشینین تورموز سسی هنده‌ورده اولان آداملاری هورکوتدو…

نئچه آن سوووشموشدو کی خییاوانین اورتاسی شولوقلاشدی. آرخادان گلن ماشینلار دا  دایاندیلار. حالقا وورموش آداملارین اورتاسیندا بیر فورغون اوزو قویلو دوشوب و اوندان بیر آز آرالی بیر اوغلان اوشاغی- اوز- گؤزونده قیرمیزی قان- یئره سره‌لنمیشدی. ماشینین ته‌یرینه یاخیلان قان، گؤرنلری اؤز یئرینده دوندوروردو. تلیسدن تؤکولن قورو چؤرک‌لر اوغلانین هنده ورینده یئره سپیلمیشدی.

او آرادا حسنین دوستو- ایبی- فورغونو بیر یاندا ساخلاییب ایره‌لی گلدی. او، اؤز دوستو و قازانجداشی حسنی خییاواندا قان ایچینده گؤرنده هویوخوب یئرینده دوندو. اونون معصوم گؤزلرینده قورخو و بیر ده یولداشینین اؤلومونون آجیسی دالغالانیردی.

حسنی یئردن قالدیریب بیر یانا چکدیلر. ایبی دؤزنمه‌ییب ایچین چالا- چالا ساغ الده کی کوچه‌یه دؤندو. بو حادیثه‌دن بیر گون سوووشموشدو کی ایبی یئنه‌ده هر گونه تای فورغونونو گؤتوروب چؤرک خیرداسی ییغماق اوچون یولا دوشدو. قضادان اونون گوذاری دوننکی- حسن اؤلن یئره- دوشدو. خییاوانین اورتاسیندا بیر آز قوروموش قان و نئچه تیکه یئره سوواشمیش چؤرک خیرداسی گؤزه چارپیردی. ایبی بو منظره نی گؤرن کیمی کؤوره‌لیب، گؤزلری دولدو. آرتیق دایانانماییب اوردان اوزاقلاشدی.

یئنه ده گونده کی کیمی اوشاقلارین گولوب- اویناماق سسی کوچه لره دولموشدو. ماشینلار نریلده ییردی و شه‌هر سس- کوی ایچینده ال- آیاق چالیردی. ایبی، یولداشی حسنی خاطیرلایاراق قه‌هرلی بیر سس له باغیریردی:- چؤرک خیرداسی آلیرام، آی… چؤرک خیرداسی!

                                                                                          یاز ۱۳۷۹

چاپ

3 پاسخ

  1. آللاهین آدییلا
    /سلام، حؤرمتلی یازار و شاعیر رقیه خانیم کبیری. بو حکایه نی اوخویوب و نظرینیزی و اوندان اؤنملی گؤزل و یئرلی اؤنری لریزه گؤره اورکدن سئوینیب و اولدوقجا فایدالاندیم. البت کی بیزیم بو یولدا چوخلو چاتیشمازلیقلاریمیز واردیر کی هر نه دن آرتیق اوخوماغا و سیزین کیمی قایغی کئش لرین یول گؤسترمه لرینه احتیاجیمیز واردیر. بویوردوغونوز کیتابلاری دا چالیشاجاغام اوخویام.یئنه ده تشککورلریمی بیلدیریرم. ساغ اولون…

  2. چؤرک خیرداسی .. حیکایه نی ده اوخودوم. منجه یازار هر ندن آدتیق بو حیکایه نین مضمونونا اهمیت وئریب. یازی فرماسی و نئجه یازیلسین آرخا پلاندا قالیب سانکی. من ایللرجه اوخودوغوم و اؤیرندیکلریم تجربه دن بو یازاریمیزا یازمالیام. بعضن یازیلارا ایده آلیستی دوشونجه ایله یاناشدیغیمیزدا ایپین اوجون قاچیرا بیلریک. دونیانین چوخلو یازارلاری فقر و ثروتدن یازیبلار. و البته بیزلر ده یازمالییق. اما من فقردن، چورک دن نئجه یازماغی آلمان یازاری هانریش بول دان اؤیرنمیشم. هانریش بول کیتابلارین اوخوماغینی دوستجا سیزه توصیه ائدیرم. اوماریم بو توصیه می اؤزومو اوستون توتماق آنلامیندا حساب ائتمه یه سیز. نئیه کی هامیمیز اوخویوب، اؤیرنمه لییک. بو آن یادیمدا اولان ایکی کیتاب آدینی سیزه یازیرام. ۱- عقاید یک دلقک(اعلا کیتابدی خصوصا جزء نگاری اؤیرنمک اوچون) ۲- نان آن سال ها . انشاالله اوخویوب بو کیتابلاری و روایت طرزینی بینرسیز.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

چؤرک خیرداسی

مقصود تقی‌زاده هریس (نیسگیل)
www.ishiq.net

آذربایجان ادبیات و اینجه‌صنعت سایتی

چؤرک خیرداسی

مقصود تقی‌زاده هریس (نیسگیل)
www.ishiq.net

آذربایجان ادبیات و اینجه‌صنعت سایتی

چؤرک خیرداسی

مقصود تقی‌زاده هریس (نیسگیل)
www.ishiq.net

آذربایجان ادبیات و اینجه‌صنعت سایتی