عؤمورلوک آجی
قاسیم پناهی
حیات یولداشی بیر فنجان چای گتیریب قهوه رنگلی راش آغاجیندان دوزَلمیش دؤرد کیشیلیک ماسانین اوستونه قویدو. رامیز عادتن حامامدان چیخاندان سونرا بو پنجره قارشیسیندا اولان ماسانین آرخاسیندا اوتوروب بیر فنجان چای ایچیب قزئت اوخویاردی. باهاردا کئفینین ساز واختیندا گلیب رامیزین یانیندا اوتوروب کامفا توخویاراق اونونلا کئچمیش گونلردن دانیشاردی؛ آنجاق بو سون واختلار نه ۴۳ یاشینا آیاق باسمیش رامیز قزئت اوخویوردو، نه ده کی باهارین کامفا توخوماق یادینا دوشوردو.
حامامین قاپیسی آچیلدی. رامیز بوغلارین آراسیندان چیخاراق باهار توخویان کامفاسینی گئییب دستمالینی باشینا آتیب پنجره‌نین قارشیسینا گلیب ساچلارینی قورولایاراق، بیر آز ائشیگه باخدی؛ سونرا اوزونو باهارا چئویردی:
– گؤره‌سن بو لعنته گلمیش قار نه واخت قورتاراجاق؟ دؤرد گوندور بیر باشا یاغیر. اوره‌گیمیز پارتلادی بو دووارلارین آراسیندا.
سونرا ماسایا ساری دؤنوب یوموشاق سسله تکجه اؤزو ائشیده بیلن کیمی: بو کوله‌گین ده لاپ جینی توتوب، اؤزونو اورا ـ بورا چیرپیر. زحلم گئتمیش بو قیش بیته‌سی دئییل سانکی!
باهار مطبخدن سسلندی:
– آ کیشی، قاردا قورتاراجاق! اؤزو بیلن یاخشیدی. نه ایشینه‌دی؟ چایینی سویوتما!
رامیز ماسانین آرخاسیندا اوتوروب چایینی ایچه‌رک باخیشلارینی پنجره‌نین او تایینا سالیب اؤزلرینی یئره توللایان قار دنه‌لرینی گؤزدن کئچیرتدی. کوچه‌ده ـ خییاواندا بیر نفر تاپیلمیردی. سکی¹ ده کی آغاجلارین اوستونه بیر آزدا یاغیرسا کسینلیکله بئش آلتیسی سیناجاق دئیه دوشونوردو. بیردن بیره یئنه او دهشت دولو قارلی گئجه یادینا دوشدو. ال ـ آیاغی تیتره‌مه‌گه باشلادی. بو آندا یئنه باهار سسلندی:
– رامیز سنه تورشولو آش بیشیریرم؛ بو هاوادا لاپ یاپیشاجاق.
– هه باهار یاپیشاجاق،(بیر داها لاپ یاواشجاسینا) یاپیشاجاق.
– بیر ماهنی آچسانا رامیز! اوره‌گیم سیخیلدی. سن ده کی بو نئچه گونده هئچ دانیشیب گولمورسن. بو قار یاغماسایدی اوشاقلارا زنگ آچاردیم گلردیلر، داریخمادان چیخاردیق.
اوشاق دئدیکده رامیزین اوره‌گینده بیر آتوم بومباسی پارتلادی؛ سانکی پنجره‌دن آسیلمیش ایسلاق گؤزلریندن ایکی داملا یاش یاناقلارینا سوزدو، آما باهار گؤرمه‌سین دئیه تئز یاناقلارینی سیلیب: -هه باهار، دؤز بیر ماهنی آچیم سن اوچون قاداسی!- دئییب جئب تئلفونوندان بیر ماهنی آچدی.
“قار یاغیر نارین،نارین
اوزو گولور داغلارین…”
سونرا سیقار قوتوسوندان بیر گیله سیقار چیخاریب ماسا اوزه‌رینده کی چاخماغی‌ایلا آلیشدیریب یئنه‌ده پنجره‌یه زیللندی…
گئجه یارینی کئچمیشدی بیردن ـ بیره فاجعه باشلاندی. توپ تفنگ سسی قورخولو شوون سسینه قاریشدی. هامی یوخودان دیک آتیلدی. آتاسی الینی آتیب دوواردان آسیلمیش کلاشینکفونو گؤتوردو. آناسی دا رامیزله ـ لاله‌نی باغرینا باسدی. ایسماییل پنجره‌دن ائشیگه باخدی. تانک‌لار قارشیلاریندا اولان هر بیر شئیی ازیب کئچیردیلر. آردینجا عسگرلر ائولره گیریب قارشیلارینا چیخان هر بیر جانلینی گولـله‌یه باغلاییردیلار. فاطمایا ساری دؤنوب: – اوشاقلاری گؤتور کنددن ائشیگه چیخ، یوخسا هامیمیز بورادا هلاک اولاریق! – دئیه دال قاپینی گؤستردی.
– بس سن؟
– کیشیلیکدن اوزاقدیر بو حئیوانلارین قارشیسیندان قاچماق. منیم فیکریمده اولما، اوشاقلاری گؤتور کنددن چیخ!
– (فاطما آغلایاراق)اؤزوندن موغایات اول!
– گئدین،گئدین!
فاطما لاله‌نی قوجاغینا آلیب رامیزین ده الیندن یاپیشیب دال قاپیدان ائشیگه چیخدی. قار دیزه چیخمیشدی. یازیقلار ماجال تاپیب پالتاردا گئیه بیلمه‌میشدیلر. چتینلیکله ائولرینین دالیندا اولان تپه‌نی یوخاری چیخیب دؤنوب کنده باخدیلار. سویوق ائولردن ساواش آلولاری گؤیه قالخمیشدی. بیریسی آنام وای باغیریردی، بیریسی بالام وای؛ آنجاق هر بیر گوللـه آچیلمامیشدان اؤنجه «یاشاسین آذربایجان!» سسی گؤیلرین یئددینجی قاتینا اوجالیردی. رامیز ائیواندا گیزله‌نیب دوشمانا گوللـه آچان آتاسیندان گؤزلرینی چکه بیلمه‌ییردی. آناسی الیندن یاپیشیب:-گلین بالاریم! دئیه رامیزی چکیب آرخاسینجا آپاردی. او سویوق گئجه ده صاباحا کیمی قارلی مئشه‌ده یول گئتدیلر، آنجاق سسلر قولاقلاریندان چکیلمیردی. گونشین ایلک شوعالاری یئر اوزونو ایسیندیرن زامان، اؤلوم آیاغینا گلمیش فاطما نه تهر اولورسا اؤزونو قونشو کنده یئتیریب، ائولرین بیرینین حیطینه گیردی. رامیز سورونه‌رک آرخاسینجا گلمیشدی، آنجاق لاله‌نین سسی چیخمیردی.
ائوین قاپیسینا یئتیشمه‌دن فاطما آیاقلارینین اختیارین الدن وئریب آشدی. گؤوده‌سی قاپییا توخوندو. (تاراق) تاختا قاپی آچیلدی. پال- پالتارلاری قیروولی بیر قادین ییخیلدی قاپینین آغزیندا و بیر قیز قوجاغیندان دوشدو اوتاغا. ائو یییه‌لری قورخودان دیک آتیلمیشدیلار. اونلاری گؤرجک ال آیاقلاری تیتره‌مه‌گه باشلادی. کربلایی رحمان اؤزونو ایره‌لی وئریب قیز اوشاغینی قوجاغینا آلدی. الینی اوز گؤزونه چکیب، اللرینی سیخدی. سونرا قولاغین اوره‌گینین باشینا قویدو. گؤزلریندن یاش سوزولدو. – سویوقدان دونوبدور!- دئییب، اوزونو آییله‌سینه چئویریب: – نه یه باخیرسیز؟ اونلاری گتیرین ایچه‌ری! – دئیه، رامیزله آناسینا ایشاره ائله‌دی…
بوتون اولایلار بیر فیلیم کیمی گؤزلرینین اؤنوندن کئچن رامیز، باهارین – رامیز ـ رامیز! گؤر نه گؤزه‌ل گون چیخیب! سسی‌ایله اؤزونه گلدی. بارماغلارینین آراسیندا فیلتئره یئتیشیب سؤنن سیقارینین آغریسینی هئچ بیلمه‌میشدی. فیلتئری ماسانین اوزه‌رینه آتیب پنجره‌یه ساری یئرییه‌رک:
بورودون کفنه قاراباغیمی
آتام هاردا قالدی بیلدین‌می ای قار؟!
چئوریلدی قولچاغا باجیم الینده
آنام هاردا قالدی بیلدین‌می ای قار؟!
پنجره‌دن ائشیگه باخیب الینی شوشه‌یه چکدی:
– هه گؤزه‌ل گون چیخیب. باهار زنگ ائله اوشاقلار گلسین! بو قار یئنیدن باشلارسا من صاباحا چیخا بیلمه‌رم.
۱)پیاده رو
