بیز هامی‌میز یاخشی‌ییق!…
سوسن نواده‌رضی
هردن قاش قارالان چاغی، ایشدن قاییداندا تویوق قیچی آلیب آپاراردی ائوده سوپ پیشیرردی، یا دا بیر پونزا بویون- قاناد آلیب پیشیریب ایکی یئرآلما، بیر چیمدیک دوز، بیر قاشیق دا –اولسایدی- روب آتاردی ایچینه، هم تیلته‌سینی یئیه‌ردیلر هم ده ات- دریسینی سوموکدن آییریب، ات‌دؤین‌له ازیب هره‌سی بیر ایکی- تیکه بورمالاییب قوهوم- قونشو سوروشاندا، آبگوشت یئمیشیک دئیردیلر.
آما آیدان– آیا دئییل، گوندن- گونه دئییل، ساعاتدان- ساعاتا قات- قات آرتان باهالیق دوشندن بری، اوچ- دؤرد آی اولاردی ائولریندن سووزو ایله یئرآلمادان سئوای باشقا پیشمیش اییسی چیخمیردی. هله اونو دا دویون- قارین دئییل، اؤلمه- دیریل، قارین‌لارینی آز-ماز باسدیراجاق قدر یئییه بیلیردیلر آنجاق.
بالاجا قیزی ساپ ساری سارالمیشدی. اوغلو ایسه، یاشی‌نین لاپ یئییمجیل چاغیندایدی. گونو گوندن اری‌ییب سولوردو بالالاری گوزونون قاباغیندا. اری ده بیر بوجاقدا میسیب، سیغاری سیغار اوسته قویوب، بونون جانی‌نین مایاسینی، آلین تری ایله، مین بیر میننته قاتلاناراق گوج بیللاهنان قازاندیغینی هاوایا پوفله‌ییردی کی، مثلن غصه‌لی‌یم، چاره‌سیزم، زمانه بدبختی‌یم… ایل‌لر اؤنجه ساغ الی‌نین بارماقلاری ایشده اره‌یه گئتمیشدی. ساغ اولسایدیم ائله ائلردیم، بئله ائلردیم دئیه، گؤتوبوشلوغونو اؤرتباس ائله‌ییب، تنبل‌لیینی یاسالایاردی. حالبوکی، غیرتی اولان آدام، بارماقلاری سهل‌دیر، ال‌لری ده، قول‌لاری دا گئتسه، بیر تیکه چؤره‌ک اوچون بوینونو چیینیه قویوب باشقالاری‌نین امه‌یینه گوز تیکیب تاماح ساللاماز.
نه ایسه، او گون ده سحری تئزدن دورورب ائوی- ائشیگی ییغیشدیریب، ائو اهلی‌نین چای- چؤره‌گینی حاضیرلاییب، یولا دوشمک ایستیردی کی، اوغلو سسلندی: گئدیرسن آنا؟ ناهارا نه قویدون؟
ناهار؟… ناهار؟… نه دئسین، نه جواب وئرسین… نه‌ییمیز وار کی نه قویام آی بالا، دئمک ایسته‌دی اما اوره‌گیندن گلمه‌دی. آخی اومودسوزلوق آجلیغین آجیسینی داها دا دؤزولمز ائده‌ر. او بونو یاخشی بیلیردی.
“بیر تهر گئچینین،گله‌جم سوپ قویام شاما” دئدی، چادیراسینی باشینا آتیب غم‌لره بوغولان اوره‌یینه داش باسیب ائودن چیخدی…
زنگی ووردو، خانم قاپینی آچدی، ایچری گیردی. “خانم، آغا گئدیب یا ائوده‌دیر؟”- دئیه سوروشدو. “راحات اول، هئچ‌کیم یوخدو، اؤزومم فقط”- دئدی خانم.
چادیراسینی آچیب قول‌لارینی چیرمالاییب ایشه باشلادی. خانیمین آخشام یئمه‌یینه قوناغی واریدی. ۳ دانا ایری تویوغو قویموشدو ات تخته‌سی اوستونده تمیزله‌ییردی. جام‌لاری سیله- سیله تویوق‌لارا باخیب درین آه چکدی. اوغلونا “سوپ پیشیره‌جم” دئمیشدی. خانیم تویوق‌لارین دریسینی چیخاردیب، سومویونو آییریب، یان یؤؤره‌سینی قوپاردیب سالدی بیر نایلونا، اونو دا آتدی زیبیل قابینا… آخ! بو زیبیل ایله او بئش- آلتی اؤونه سوپ پیشیره بیلردی. نئچه دؤنه آغزینی دولدوردو خانیمدان اجازه آلیب او نایلونو زیبیل قابیندان چیخارتسین، آما اوزو کسمه‌دی. کوره‌یی تیر چکدی.
خانیم سئوینجک اونا دئدی: ” هله، موشتولوغومو وئر، مکّه‌یه آدیمیز چیخیب، گلن آی گئدیریک!”، “موبارکدی، ساغلیغینان ایشاللاه!” دئیه جواب وئردی و اؤز- اؤزونه فیکیرلشدی کی، دؤرد ایلده بو اوچونجو مکّه‌سی دیر خانیمین…گئنه کوره‌یینده ایلدیرم شاخان کیمی اولدو. زیل سسی ایله “آاااخ….” دئدی. “نولدی سنه؟ حالین یاخشیدی؟” دئیه سوروشدو خانم. ” هن، یاخشی‌یام خانم، هر شئی یولوندادیر، بیز هامی‌میز یاخشی‌ییق” دئدی…
قاش قارالماقدایدی. یورغون- آرغین، ازیک- یئنجیک ائوه دؤنوردو. بیر تویوقچونون قاباغیندا دوروب بیر آز وار- گل ائله‌دیکدن سونرا باخدی توکاندا هئچ‌کیم یوخیدی. گیریب اوزونه اوز باغلاییب دئدی: “تمیزله‌دیییز تویوق‌لارین سوموک- دری‌لریندن ایستیردیم یاریم کیلو.”
” ائی داااد! اون دیقه قاباق گلسه‌یدین آتمامیشدیم ائشییه.” دئدی تویوقچو. “نئیله‌یک، جانین ساغ اولسون” دئدی و چیخدی. تله‌سیردی. یوباناندا اری دئیینیب ساواشیردی. یئتیشمک همن چادرا چارقاتینی گول‌میخا آسدی، دینجینی آلمادان باشلادی اؤز ائوی‌نین ایشلرینه. اوشاق‌لار آنالاری‌نین الینه باخیردیلار. خانم گیلده یئمه‌دیگی خؤرک و میوه‌نی اونلارا گتیرردی همیشه. کیشی بیر قورو یورولما بیله دئمه‌دن باغیردی: “منه سیغار آلدین؟”
اونا قئیقاجی باخماغا دا اینجاری قالمامیشدی. کؤره‌یی تیر چکیردی… قیزینا دئدی: “مداد- کاغاذ گتیر آللاها بیر مکتوب یازاق، خانم آپارسین مکه‌یه، آلله گینه ایسته‌میش اونلاری”
«سلام آللاه. بیز هامی‌میز یاخشی‌ییق!…»
3 پاسخ
چوخ یاخشی . سئودیم.اوز آدینیزا ، شخصی کانالیمدا کوپی ائله دیم. ساغ اولون.
Yaxşı yazıdı Susən xanım. Ueni-yeni yaradıcılıq uğurları.
همیشه یاخشی اولاسان خانم رضی. حقیقی یاخشی . گوزل فضاسازلیق باجاریرسان.