تر آرخاسیندان هئچ زاد بللی دئییل
رضا کاظمی
شاعر یولداشینین اؤلوم خبرینی بیر ده اوخودو. اووجو ترله‌میش، سیقاری دا قورتارمیشدی داها موبایلینی یئره قویوب پئنجه‌یینی گئیدی. آیری بیر اس. ام. اس گلدیکده، ائودن ائشییه چیخدی. خیاباندا یاغیش چیلهییردی. کوچه آغزینداکی دوکاندان بیر پاکات سیقار آلیب بیرینی آلیشدیردی. پولونون قالانینی آلمادی. یولداشی ایندی خیابان اورتاسیندا اوزانمیش، قان آخیردی اوندان. اونون آچیق گؤزلرینه دوشوندو. او اؤلدویو شهرده یاغینتی‌لارین چوخ اولدوغونو سؤیلهمیشدیلر ساعات اوندؤرد خبرلرینده. بلکه ده، ایندی قار یاغیر اوردا. شاعرین جنازه‌سی قار آلتیندا قالیر یاواش یاواش. قاپیلاری آغزینداکی پیشیک مییولداییر. قاپینی آچیب اوشویه اوشویه ایچری کئچیر. موبایلی هله ده یئرده، آچیق کیتابینین اورتاسیندا. کاناپهده اوزانیب هاوا قارانلیقلایانا کیمی سیقار چکیر دالبادال.
*
موبایلی‌نین زنگییله یوخودان آییلدی. پئنجه‌یینی اینیندن چیخاریب سیقار کؤتویویله دولو کولقابینا باخدی. آغزی آجیمیش، بوینو ایسه آزآججا آغریییردی. بیردن یولداشینین اؤلومو یادینا دوشدو. موبایلی الینه گؤتوروب سؤندور دویمهسینی باسدی. بلکه ده باشقا بیر یولداشین اؤلوم خبرینی اونا دئمک ایستهییردیلر. موبایلی خالچانین اورتاسینا آتیب بوینونون دالینی اووکه‌لدی. بیر گون ده، اونون اؤلوم خبری یاییلاجاق بو شهردن او شهره. بیر حئکایه چویله شاعرین اؤلومو نه قده‌ر فرقلی اولمالی‌دیر دئیه دوشوندو. ائوین سیقار توستوسویله دولدوغونا گؤره، آیاقا قالخیب پنجرهنی آچدی. یاغیش یئنه چیلهییردی. یاش خیابان‌لاردا احتیاطلا گلیب گئدن ماشینلارا باخدی. یازیچییا خیابان اورتاسیندا اؤلمکدن چوخ، بئشینجی قاتدان کللهسی اوسته دوشمک یاراشیر. یوخ، هئچ کس اونون انتیحارینا اینانماز. نئچه دقیقه، ائله پنجره قاباغیندا ایکن یولداشینین شعرلرینی خاطیرلادی.
*
تاکسیچی‌یا هارا گئتدییینی دئمهدی. دال صندلده، قوجا بیر کیشی‌نین بؤیرونده ایله‌شیب الینده‌کی کامئرانی قوردالادی. رادیوداکی قادین، باشقا بیر دیلده اؤلکه‌نین هاوا دورومونو آچیقلاییردی. قولاغینی شکله‌دی. یولداشی اؤلدویو شهرده، سئل گلمک احتمالی وار ایدی لاپ. اوندا، شاعرین جنازهسینی سئل آپاراجاق ایمیش. ترلمیش شیشهدن ائشییه باخدی. تر آرخاسیندان هئچ زاد بللی دئییلدی. پئنجه‌یی قولویلا تری سیلمک ایستهدییینده، کامئرا الینده آغیرلیق ائله‌دی. یانینداکی قوجا کیشی اؤسکوردو. بایاقدان بری قوجانین الینده‌کینی چلیک کیمی دوشونن یازیچی، اونون دسته‌لی بیر چتیر اولدوغونو آنلادی. یولداشی شعرلرینده‌کی آدام‌لارین هامیسی چتیرسیز، هامیسی ایسه ایسلانیردی یاغیش آلتیندا. سوروجویه ساخلا دئییب بوکده‌لنمیش بیر کاغیذ پول اوزاتدی اونا ساری.
*
یئددی گؤز کؤرپونون قاباغیندا آیاق ساخلادی. داش دؤشه‌مه‌لرین اوستو آغاج یارپاغیندان دولموش، پارکدا هایکوی سالان همیشه کی اوشاقلاردان ایسه هئچ خبر یوخ ایدی. پئنجه‌یی‌نین دویمه‌لرینی آچیب کامئرانی قولتوغونون آلتینا آلدی. اوزاقدان بیر قادین گلیردی. جیبیندن سیقار پاکاتینی چیخاریب بیرینی آلیشدیرماق ایستهدیکده، پاکاتین بوش اولدوغونو گؤردو. بوش پاکاتی یئنه جیبینه قایتاردی. قادین باشی اوسته چتیر توتموش، یاواش یاواش اونا یاخینلاشیردی. الینی باشینا چکیب ایسلاق توک‌لرینی بیر یانا دارادی. سو دامجی‌لاری آلنیندان بوینوناجاق سوزولوب کؤینه‌یی‌نین یاخاسینا هؤپدو. کامئرانی قولتوغو آلتیندان چیخاریب، سسی چیخار چیخماز ـ «مندن عکس سالیرسیز؟!»، دئدی. قادین آتماجا ائشیتمیش کیمی ایتی آددیملارلا اونون قاباغیندان سوووشدو. بیر آز اویانلیق آنجاق، آیاق ساخلاییب اونا ساری دؤندو. او بیر سؤز دئمهدن کامئرانی قادینا ساری اوزاتدی. قادین کامئرانی چتیرین آلتیندا ساخلاییب گؤزلویونون دالیندان اونا باخدی. او الینی جیبلرینه سالیب کامئرایه زیللندی. قادین ـ «بیر، ایکی، اوچ… » دئدییینده، او گولومسهیه بیلمهدی.
*
شکیلی قاباغینا قویوب بیر ده اونا باخدی. ایسلاق یارپاقلار آلتیندا باسدیریلمیش شاعر جنازهسیندن باشقا، کؤرپونون یاریسی گؤرسه‌نیر، بیر ده قادینین گؤزلرینه دونوخموش اؤزو. جومجولوق سودور. اؤلوب گئتدیییندن سونرا، یئنه بوردا، ائله یاغیش آلتیندا دوروب شکیله باخان‌لارین گؤزلرینه زیلله‌نه‌جک. ترحیم اعلامیه‌سی اوچون یاخشی شکیل‌دیر یوخسا یوخ دئیه دوشوندو. گؤره‌سن یولداشینین هانسی شکیلینی دیوارلارا یاپیشدیردیلار؟ بیردن بو شکیلی اونون اعلامیه‌سینه وورسالار، چتیرله آددیملایان قادینین گؤزلری اونا ساتاشیب بیر نئچه آددیم اویانلیق حتمن آیاق ساخلایاجاق. سونرا، بلکه اعلامیهنی اوخومادان تئز یولونو توتوب گئتدی. بلکه ده یئنیدن دیوارداکی اعلامیه‌یه باخدی. هلبت اعلامیه‌ده اونون تصادوف اوزره اؤلمه‌یینی ده یازاجاق‌لار. خیابان اورتاسیندا اوزانیب گؤیه دونوخوب‌دور. اوستونه یاغیش یاغیر، گون شاخیر، قار یاغیر… موبایلی بیر آز اویانلیق دوشوب. بایاق یئنیجه آلدیغی سیقار قوطوسونون دا ایچی قانلا دولموش. موبایلینا بیر اس. ام. اس گلیر. یئریندن هئچ ترپنه بیلمیر. خیابانین او تاییندا بیر قادین الینده چتیر توتموش، اونون سوزوله سوزوله ایرلی گئتدییی قانینا باخیر. شاعر یولداشی دالبادال اس. ام. اس یوللاییر.
