بیر سورو قویون چوبانین الینین آلتیندا اوتلاییب-گزیردیلر، آمما اونلار هئچده اوتلادیقلاری اوتلاردان یارارلاناممیردیلار. چون اونلار نه قدرده اؤزلرین یئدیردیب بسلدسه‌لرده ؛ سونوجدا چوبانا سود، ات، یون و هابئله دریلرین وئرمک زوروندا ایدیلر.
بو دوروما باخمایاراق اؤزلریده بونون فرقینده دئییلدیلر، آخی اونلار قویون کیمی یاشاماغا قرارلی ایدیلر. اونلار بئله سانیردیلار اگر چوبان اولماسا آجلاریندان اؤلمه‌لیدیلر یادا ییرتیجی قوردلارا قوربان اولمالیدیلار.
بس انسان اولان چوبان اونلاری نه اوچون قورویوب؟ بسلدیر؟
آخی او اؤزو سونوجدا بو قویونلاری ساغیب، کسیب، یئیب و باشقالارینا یئدیزدیرمی؟
نه ایسه…!
بو قویونلار ایچینده بیر آلقیلی و چیخارلی قوچ واریدی، بو قوچ داها قویون کیمی یاشاماغا دؤزممیردی. آخی او بیر قوجا قوچدان قویونلارین “قو”یا دؤنوب اوچماق ماسالین ائشیتمیشدی. ائله جه ده بو ماسالی ائشیتندن بری نه گوندوزلر یئمه‌یی و نه گئجه لر اویماغی واریدی.
او بونو بیلیردی اگر بو ماسال گئرچکلشسه؛ او داها چوبانین چیخدیغی یاماجین و قوردون قورخوسوندان بیر یوللوق جانی قورتاراجاقدی و اؤزگورجه‌سینه یاشاماغا قووشاجاقدیر..!
او باشلادی باشقا قویونلاریدا عُصیان ائتمه‌یه چاغیرماغا، آمما اونلاردان بیر یانیت گلمه‌دی و بو ایشی تک باشینا یاپماغا قرار وئردی.
گونلرین بیر گونو او چوبانین هابئله اونون ایتینین گؤزلرین ایراق گؤروب سسیزجه سورودن آیریلیب اورمانا دوغرو قاچیب و گؤزدن ایتدی و چوبان اؤزونه گلیب اونون اولماماسینی فرق ائدینجه او داها ال چاتماز و گؤز گؤرمز یئرلره اولاشمیشدی.
او سورودن آیریلدیغی سورجده “قو”یا چئوریلممدی؛ اومودون ایتیرمه‌یه باشلادی و گئت-گئده اؤزون تک و یالقیز حسّ ائدیردی. او داها آرتیقراق قوردلارین سسیندن قورخوردو، چون بو دؤنه نه چوبان واریدی و نه اونون ایتی …
بیر نئچه گوندن سونرا اورماندان دره‌یه سو ایچمه‌یه ائنرکن گؤزو “کئییک”لردن اولوشان بیر سورویه ساتاشدی. سو ایچمه‌دن اؤنجه اونلارا یاخینلاشیب ، اؤز کئچمیشیندن اونلارا سؤز آچدی. اونلاردا اونو قوروماق و اؤز گوونلری آلتیندا آلماق حاقیندا اونا سؤز وئردیلر.
قوچ اونلاردان سوروشدو: سیز قوردلاردان قورخموسونوز؟
کئییک‌لر یانیت وئردیلر: قوردلارین نمنه‌سیندن قورخمالییق؟
قوچ تیتره‌یه-تیتره‌یه سؤیله‌دی: اونلارین ییرتیجی خویوندان و ایتی دیشلریندن!
قوجامان کئییک‌لرین بیری سؤیله‌دی: اونلارین ییرتیجی خویو و ایتی دیشلری وارسا بیزیمده دوشمنه قارشی بیرلیگیمیز و ساوونماق اوچون بوینوزوموز وار.
قوچ بو سؤزلری کئییک‌لردن دویدوقدان سونرا اورکله‌نیب و اونلارلا بیرگه داغا دیرماشماغا و زیروه‌لرده اؤزگورجه‌سینه یاشاماغا قرار وئردی.