بیر آخشام کافه‌ده
ائلشن وفالی

منیم بئش اَریم وار. نه آز، نه چوخ. دوز بئش دانا. بیری بیله‌مه قوش‌دیلی اوخویور. ییرمی‌دؤرد ساعات زنگ ووروب، گؤزه‌للیییمدن دئییر. فیلم‌لرده هامی‌نین بیری‌بیرینه دئدییی گؤزه‌للیکلردن یوخ، گیزلین گؤزه‌للیک‌لردن دئییر. بدنیمده سیاحت ائله‌ییب، دریمین یوموشاقلیغیندان، ساچلاریمین عطریندن، قولاغیمین اینجه‌لیییندن، گؤزومون قره‌گیله‌سیندن، دیزیمین بوکویونون حساسلیغندان دئییر. اؤزومون حیس ائله‌دیکلریمدن او دانیشیر. کله‌کؤتور سسله یوخ، یوموشاق و احساسلی بیر سسله قولاغیما میزیلداییر.
ایکینجیسی ایله فیلمه باخیریق. مبل ایچینه قویلانیب، چیراقلاری سؤندوروب، گؤزلریمیزی تیکمیشیک تلویزیونا. میز اوسته قهوه، بیر آز توت‌فرنگی، بیر کاسا فیندیق بادام، بیر آچیق لپ‌تاپ. فیلمدن سونرا دانیشیریق. او منه فیلمین باش تاپیلمایان یئرلریندن دئییر. اما اوّلجه مندن نه دوشوندویومو دئمه‌می‌ ایسته‌ییر. ائوده بیر پیشیک‌ده وار. پیشیک مبل اوستونده یاتیب. خورولتو سسی گلیر. او ایسه دانیشیر؛ دال‌با‌دال. فیلمدن ائله معنالار چیخاردیر کی نئجه، دئیه‌سن کارگردانین‌دا بئینینه چاتماییب. سونرا دانیشماقدان یورولوب گئدیریک خیاوانا. خیاوان هله قارانلیقدیر. چییین – چییینه یئرییریک. یاغیش یاواش – یاواش چیله‌ییر؛ آمما بیز هله فیلمین عالمینده‌ییک. دوشونجه‌لریمیزدن دانیشماق، دونیانی بیزه گئنیشلندیریب. دولانماقدان یورولموروق. بیر هافیلتی سسی گلیر، بیر ماشین سسی. خیاوانین آسفالتی پار – پار پاریلداییر.
اوچونجو اَر قارینپادی، آمما زیرنگ قارینپالاردان. منیم پیشیردیییمی‌ بَیَنمیر. اؤزو گلیر آشپازخانایا. دئییر ائله بیر شئی پیشیریم بارماقلارینی دا یالییاسان. بونو دئیه – دئیه اؤزوده بارماقلارینی یالاییر. آیی کیمی‌ بیر شئیدیر، آما دوزلو و مهربان. یئمک پیشیرمه‌نین یول – یؤنده‌مین اؤیرتمکده صبیرلیدی. میزی دؤشه‌مکده‌ده سلقه‌لیدی. یوغون هیکلینه باخمایاراق اینجه ظریف سلقه‌سی وار. لیوان دوزمکده، خیارا دوز سپمکده، سالادی قاریشدیرماقدا گؤرمه‌لی استیلی وار. دوغورداندا پیشیردییی چوخ دادلی‌دیر.
دؤردونجوسو لاپ دوشاب اَردی. دبک‌دیر. سفئه‌دیر. هئچ نه‌یی جیددی توتا بیلمیر. دلقک‌دیر. ایییرمی‌دؤرد ساعات هیریلداییر. گئدیر گلیر منله باش – باشا قویور. داریخاندا دئییر گل گول – گول اوینایاق. بیردن بیره بوزی سالیر پالتاریمین ایچینه. دلی تکین قیشقیرتیمدان کئف ائله‌ییر. ساری دیشلری همیشه ائشیکده‌دی. همیشه سفئه بیر شئییه قاققا چکیب گولور. هردن آخشاملار ایچیب کئفله‌ننده لاپ سفئه‌له‌ییر. دئییر ایندی اون میلیون پولون اولسئیدی نئیلردین. دئییرم بیلمیرم. دئییر من بیلیرم. دورور ائوده بیر جیبی دولو پوللو کیشینین اداسین چیخاردیر. چوخ گولمه‌لیدی. مندن ایسته‌ییر دورام گئده‌ک بیر باهالی رستورانا. دئییرم منی‌ده اؤزووه تای سفئه‌لتمه؛ آما اوره‌ییمده اونونلا خیال قورماقدان خوشلانیرام.
بئشینجی اَریم یوللارین یورقونودو. همشه سفرده‌دیر. اتوبوسدا باشیمی‌ قویارام چیینینه یاتارام. منله ایشی یوخدور. اؤزو گؤزه‌ل بیر یئر تاپیب چادیر قورماغی باشاریر. آغاجلارین آدین بیلیر. کپنک‌لره عاشیقدیر. گوللرین هامیسین تانییر. بیر گول دَریب گؤزلریمی‌ یوماندان سونرا گولو بورنومون آلتینا توتور. دئییر گولون آدین دئ. دئینمیرم یادا ترسه دئییرم؛ آما او هئچ واخت سهو ائله‌میر. گئجه‌نی تانییر. اونون گیزلین و نابلد سسلرین ائشیدیر. آخی او شه‌هرده ده یاخشی بیر موسیقیچی‌دیر. یاخشی‌دا سسی وار. هردن اوخویور. مندن‌ده اوخومامی‌ ایسته‌ییر. دئییر بیلمیرسن آدامین اؤزو اوچون اوخوماسینین نه کئفی وار. اونون یانیندا کئف چکمک آسان ایشدیر.
***
یولداشیمین اللّی ایکی یاشی وار. ائولنمه‌ییب. قهوه پولومو حسابلاییر. دئییرم گلن سفر منیم نؤوبمدی. سوروشور ارلریم نئجه‌یدی؟ ائله اوجادان دئییر کی یانیمیزداکی اوغلانلا قیز دؤنوب باخیرلار بیزه. بیر – بیریمیزین گؤزلرینه باخا – باخا پیققیلداییب، گولوروک.
منبع: “آذری- ائل دیلی و ادبیاتی” درگیسی، نومره ۱و ۲ یئنی نشر دؤرو (۱۹ و ۲۰)