اوخوماق زامانی: 4 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: نریمان ناظیم
ترجمه: نریمان ناظیم
نریمان ناظیم
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

بایرا‎ملیق

اوغلانجیق گوزگو قاباغیندا دایاندی. ایکی الی‎ایله کاپشئن ین دؤشونو تومارلاییب، قولتوغونو یئللندیردی. سونرا آرخاسیندا دایانمیش آناسینی گوزگوده سوزوب، گولومسه‎دی. بیر داها اینینده‌کی کاپشئنه باخدی. گولوش دوداغلاریندان چاغلاییب اوز- گؤزونه یاییلدی. شیلتاق چپیش کیمی ایکی ایاغی اوسته گؤیه قالخدی؛ سیچیراییب، ماغازادان ائشیگه قاچدی. آرواد
“و آ آ… امی‎ی‌ر… اوغلان بیر دایان گؤروم نه‎جوردی آخی…”- دئیه‎، قاپی‎یا چیخدی.
ائشیکده, ماغازایا ساری گلن کیشی آتیلیب اوینایاراق قاچان اوغلانی ایزله‎یره‎ک تعجوب‎دن دوداغلارینی گولونج بیر شکیل‎ده بوزموشدو. بایرام قاباغی ایدی. بازار چوخ تونلوک ایدی. بیر آندا اوشاق گؤزدن ایتدی. آمما آرواد اوشاغین آردینجا یولا دوشدوکده, ماغازاچی اوغلان قاپی‎نین آغزیندان سسلدی:
– آی خانیم! کاپشئن‌ین پولون وئرمه‎دین… آی خانیم…!
اوشاغین قاچماسینی تعجوب‎له ایزله‎ین کیشی بیردن- بیره اؤزونه گلدی:”هه؟! کاپشئن. نه کاپشئنی؟!”
اوغلان- “عنابی- نخودی کاپشئنی آلیب پولونو وئرمه‎میش گئدیر”- دئیه، ایشاره ایله آروادی گؤستردی.
کیشی درحال گؤتورولوب, آروادی حاقلادی:
– آی باجی… آی باجی هارا گئدیرسن بس؟ آلدیغین جینسین پولون وئر آخی, پی‎ی‎ی!!
– نه‎ خبریندیر قارداش، من قاشمیرام کی, قوی گؤروم اوشاق نئجه اولدو- دئیه، آرواد یئنی‎دن یولا دوشدو.
کیشی‎نین سسی اوجالدی:
– دایان بیر گؤروم آ اَ… اوشاق! اوشاغا نه اولاجاق، پولو وئر هر یئره گئدیرسن گئت‎دآ, سنین قاباغیوی کسن وار؟
آرواد تله‎سیک کیفین آچیب الی اسه- اسه پولو ساناییب، کیشی‎یه ساری اوزالتدی:-“گل آل! بودا سنین پولون.”
کیشی”-یاخشی… بس هانی قالمیشی؟”- دئیه، الینی آروادا ساری آچدی. آرواد تعجوب‎له سوروشدو:
– اون بئش مین تومن دئییل مه‎یه؟
– هه اون بئش مین‎دی.
– بس‎دای نه ایستیرسن؟ ایکی مین‎نین ده اوغلان اؤزو چیخیب.
کیشی‎نین گؤزلری قییلدی:
– بورا باخ گؤروم، منی ساریمیسان, یوخسا عاغلین آزیبدی؟ اونو گؤر هئچ اون بئش مینه تیکرلر!؟ هله پیس- پیس دئییرسن قاشمیرام کی!!
آروادین دوداغی اسدی:
– من قاچان آدام دئییلم, گؤزلریوی سیل، آدامووی تانی! دئییرم اوغلان او یئددی‎مین دئییب, ایکی می‎نین‎ده چیخیب, دئییرسن یوخ , او او، بو دا من- دئیه، آرواد قاییدیب, یئیین آدیم‎لارلا ماغازایا ساری گئتدی.
کیشی اونون دالینجا ماغازایا گیردی:”- سن هانسی کاپشئنی وئریبسن بونا؟ – دئیه, اوغلاندان سوروشدو.
– او عنابی- نخودی کاپشئنی.
– نئچه دییبسن؟
– اون یئددی مین دئدیم, ایکی مینین‎ده اونا چیخدیم.
کیشی توپ کیمی آچیلدی:
– آی سنین او بوینون سینسین. اوولیندنده بللی‎ ایدی سندن آلیش وئریشچی چیخمایاجاق. گئده به‎سن کورسان؟ آخی او شوقریبی اوخو دآ آ… دئیه‎. آروادا ساری یؤنلدی:
– منی باغیشلا باجیم, سن دئین اولسون, ایکی مینی‎ده تخفیف، چیخارت اون مین‎ده وئر قورتار!
بو آندا اوغلان دیللندی:
_ آغا وآللاه قیمتینی اون یئددی مین تومن یازمیشدین.
کیشی لاپ جین‎لندی:
– سن دای دانیشما. دانیشما دئدیم. اون یئددی مین تون یازمیشدی. هله پیس- پیس‎ده دیپلوم آلیر. هئی، آی او سنه درس وئره‎نین آتاسینا لعنت گلسین…
آرواد توموب قالمیشدی. نهایت –”یوخ، قارداش منیم او قده‌ر پولوم یوخدور. کاپشئنیوی گنیررم- دئیه, ماغازادان چیخدی. کیشی ده آروادین دالیسینجا ائشیگه چیخاراق:
– بس یاخشی، اون مین‎ وئر کاپشئنی قایتار، پولووو آل!
آرواد بیر قده‌ر دوروخسوندو. سونرا دئدی:
– دئدیم کی, منیم او قده‌ر پولوم یوخدور آغا.
بو آندا اوغلان یویوروب، کیفی آروادین الیندن قاپاراق:
– بس بو کیف قالسین گئت کاپشئنی گتیر!
کیشی غیظیله اوغلانا باخدی:
-لا الاهه الا اللاه. گئده به سن نییه بئله گیژسن؟ آخی او کیف نه یه ده‌یر؟‎ او اؤزو دئییر پولوم یوخدو, سن کیفی گیروو ساخلاییرسان؟!- دئیه، حیرصیله کیفی اوغلانین تایندن چکیب، آلدی.
آروادین دوداغلاری اسدی، آمما آغزینداکی سؤزونو یئدی. تکجه بیر باخیشلا کیشی‎نین آغزینی باغلادی. یولا دوشدو. کیشی‎ایسه کیف الینده, اونون دالیسینجا یول‎لاندی.
آرواد بازارین ایچینده, بو تیمچه‎دن او تیمچه‎یه, او د‌ؤنومدن بو دؤنومه هئی گیریر- چیخیر… آمما اوشاغدان ایز- اثر یوخدور. سانکی بیر دامجی سو اولوب، یئره باتمیشدی. گئتدیکجه اونون نیگرانلیغی, هیجانی آرتیر, سورعتی چوخالیر، یئریشی قاچیشا چئوریلیردی. ماغازاچی‌ کیشی‎ده نفسی چیین‎لریندن چیخا- چیخا، آروادین دالیسینجا لهله‎ییردی. ماغازاچی‎لارین چوخو و ‎بازاردان کئچن‎لرده, آغیزلاری آچیلی دایانیب، تعجوب‎له اونلاری سوزوردولر.
هاچاندان – هاچانا اوشاق «آینا – شام‎دان» ماغازاسینین گوزگولرینده اؤزونه باخا- باخا تاپیلدی. او, بؤیوک گوزگولرده، اینینه گئیدیگی یاراشیقلی کاپشئنی‌نین تاماشاسیندان فرح‎لنیردی.
اوغلانجیق قاباق- قاباغا قویولموش گوزگولرده, اؤزونو نه بیر نه ایکی، بلکه اون لارجا گؤردوکدن داها آرتیق ماراقلانیب, هیجانلانیردی.
آرواد اوشاغی گؤرجک جیگر دولوسو بیر نفس آلیر, دیزه چؤکوب, “- امیر… بالا بویووا قوربان اولوم! به سن بورادا نه گزیرسن؟- دئیه، اونو باغرینا باسدی. کیشی ایسه تووشه‎یه‎رک اونلارین باشی‎نین اوستونده دایانیب، کاپشئنی آلماغا تله‎سیردی.
آرواد اوشاغی ماغازادان چیخارتدی؛ سایخاش بیر یئره آپاریب قولاغینا نه‎سه پیچیلدادی. سونرا الینی کا‎پشئنین دویمه‌سینه اوزالتدی. اوشاق دوداغلارین ییغیب، قیسدی. توواراق اؤزونو دالییا چکدی. ایکی الی ایله کاپشئنین یاخاسیندان یاپیشیب، قولاقلادی. آرواد بیر داها اوشاغین بویون اوخشادی:
– امیر بالا بویوا قوربان بو کاپشئن ‎ اینووه خیردادی. بونو وئر, گئده‎ک آیری‎سین آلاق! ها, آ بالام‎سان- دئیه‎, آستا- آستا کاپشئنین دویمه‎لرینی آچیب, زیپینی آشاغا چکن کیمی اوشاق آغلاماغا باشلادی.
آرواد, کاپشئنی اوشاغین اینیندن چیخارتماغا چالیشیردی‎سا, اوشاق‎دا عناد‎ کارلیق‎لا, اؤزونو آناسی‎نین الیندن قورتارماغا جان آتیردی. ‎کیشی آتجاق حوصله دن چیخدی: “-دی بابام قورتار دآ آ …!”- دئیه،  ال آتیب کاپشئنین اته‌ییندن یاپیشیب, چئویردی، کؤبودلوقلا سیییریب اونو اوشاغین باشیندان چیخارماغا چالیشدی. آمما کاپشئنین اوزو آستار اولسادا, دویمه‎لری باغلی‎ اولدوغونا گوره, کیشی اوغلانجیغی بیر آز اؤز دالیسیجا سوروندورندن سونرا، کاپشئنی اونون اینیندن چیخاریب، یولا دوشدو. آرواد دلی‎جه‎سینه بیر آز یول کیشی‎نین دالیسیجا قاچدی. کیشی بیر پول بوکومونو جیبیندن چیخاریب آروادا ساری آتدی. پول یئره سپه‎لندی. آروادین دیشلری قیجیردی:
– تووو سنین او نجابتیوه… آی ‎ی‎ی نا کیشی- دئیه، قه‎هر بوغازینی بیچه- بیچه, اییلیب یئردن پول‎لاری دوشورمه‎یه باشلادی.
* * * *
آرواد اوغلانجیغین بیله‌ییندن یاپیشیب بازار اوزونو سورویوردو. اوغلانجیق‎دا آیاق‎لارینی یئره دؤیه- دؤیه قیشقیر- باغیر سالاراق دیرنیردی. آروادین صبری دای توکندی:
– یئتیم قالاسان دئییرم, اینووه کیچیک‎دی. ننه‎سیز قالاسان دئییرم اینووه کیچیک‎دی- دئیه, آرواد دلی‎جه‎سینه اوشاغی شاپالاغین آغزینا وئردی.
بیر نئچه نفر قاچیب اوشاغی آروادین الیندن آلدیلار. یاشلی بیر قادین آروادین قولوندان توتوب, اونو آغزی بازارا آچیلان مچیدین حیه‎طینه چکیر, بیر سکی‎نین اوستونده اوتوردارکن:
-قیزیم! آدام آجییاندا اؤزونو ساخلار. نه‎خبریندیر؟ او طیفیل اوشاغی اؤلدوروسن آخی؟!
باشقا بیر قادین‎دا, اوشاغی آناسی‎نین یانینا گتیردی. آروادا بیر آز سو ایچیریب, اوشاغیندا اوز- گؤزونو یویوب اوووتدولار.
* * * *
قیشین سون گونلری‎نین ایلیق گونشی اینجارسیزجا توتغون بولوت‎لاری سویونوب، چیخیردی. آرواد ائله‌جه اوتوردوغو سکی‎ده توموب قالمیشدی. اونون گؤزلری, مچیدین حیه‌طینده‎کی حوووضون اورتاسینداکی سو لوله سیندن داشلانان سویا تیکیلمیشدی.
اوشاق قوزو تکین آناسی‎نین یانیندا دایانمیشدی. پؤرتوب، قیزارمیش گؤزلرینی آناسینا زیلله‎میشدی. آرواد گؤزونون آلتی‎ ایله اوشاغین یازیق گؤرکمینی سوزدو. بیر آنداجا بوتون وارلیغی قه‌هه‌ره چئوریلیب بوغازینا ییغیلدی. بیردن ال آتیب، اوشاغی اؤزونه ساری چکدی؛ بوتون وارلیغی ایله باغرینا باسدی. بوغازینا ییغیلان قه‎هه‎ر گؤزلریندن آخماغا باشلادی.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *