اوخوماق زامانی: 3 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: نریمان ناظیم
ترجمه: نریمان ناظیم
نریمان ناظیم
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

nariman-nazim3
خسته
نریمان ناظیم

 بو گون یئددینجی گون‎دور کی بو تختین اوستونده‎یم. سحر آخشاما بو توتغون جامدان گؤیه باخیرام. جامدان گؤرونن چینارلارین یارپاقلاری گوندن – گونه رنگین آتـیر, سارالیر, ایکیندی چاغلاری کولک اسنده یارپاغلار بوداغدان اوزولوشور, گؤیده هرله‎نیر؛ اوزو آشاغی گئد‎ه‎نده منیم گؤزومدن ایتیرلر. گؤیده آرا- سیرا بولودلار گزیشیر. هره‎سی بیر شئیه بنزه‎ییر. بیری خوروزا, بیری تولکویه. آغی‎ وار, بوزو وار. گاه سئیره‎ک‎لشیر, گاهدان چیته‎نیر، قارالیر.

ایسراغا گون سحردن بولودلار ییغیشیب گلدیلر. بیر- بیرینه قوووشدولار. ائرته‎سی گون, سحر چاغی گون چیخاندا, یارپاقلار ایشیم- ایشیم ایشیلداییردی. تر- تمیز! کئشکه بو جام‎لاری ‎دا یویوب تمیرله‎یئیدی.

 گون اورتادان سونرا, پرستار گلدی یئنه‎ده قولوما سیروم باغلادی. «حب‎لریوی آتـیسان» دئیه, جاواب آلمادان قیمیشیب گئتدی. مندن باشقا بیر نفر ده بو اوتاقدا یاتـیب, سحر- آخشاما مورگوله‎ییر. گئجه‎لر خورولتوسوندان یوخو گؤزومه گئتمیر. دوکتورا دئمیشم حب‎ وئریب, آمما او شووغریبی‎ ده آتاندا بیلمیرم نییه منی قارا باسیر.

او گئجه یوخو گؤردوم کیشی گلیب د‎بئهله‎ییر. دئییر پولومو وئر. حیرصیم باغیرساغیمی کسیردی. قیشقیرتـیمدان پرستارلار تؤکولوب گلمیشدیلر. منی آییلتدیلار, گؤزومو آشجاق, بیلدیم یوخو ایمیش. ائله بیل دونیانی منه وئردیلر و اکبر آغایا دئییره‎م اوغونوب گئدیر. دئییر کیشی ائله‎ده بیر ایش اولار؟

دوغروداندا بو کیشی‎نین حاققی منیم بویونومدا چوخدو. کارا گلن آدام‎دی. او اولماسایدی, هئچ منیم دویونوم آچیلمازدی. البته اوشاقلیق دوستومدو. نئچه ایل باهم معللیم‌ایدیک. سونرا “دانشسرای عالی”‎ده باهم اولدوق, او ریاضی اوخودو, من ادبیات. بئش- اون ایل بوندان قاباق گلدی تهرانا. بازنشسته اولاندان سونرا ‎دا بو بیمارستانین حسابداریسیندا ایشله‎ییر. ماشاللاه کئفی چوخ سازدی. کئشکه ائله من‌ده بیر آیری رشته اوخویایدیم. دئین اولمادی آی بابا ادبیات‌دا اولدو رشته, (فعولن فعولن فعولن فعول).

الغرض, عؤمرو وئردیک بادا. دؤرد ایلدی بازنشسته‎یم. بیر پیشیک‎‎ده قاپیمدا میولداماییب کی گل سن ده بو ایشین قولپوندان یاپیش، بئش قیران پول آل! کیچیک بیر شه‎هردی. هامی منی تانیییر. کیمین قاپی‎سینا گئدیم. بابام ،آدام قات- قات ات تؤکور. بو شه‎هرده بیز ده بیر گون اؤزوموزه بیر آدام ایدیق. بو گون ایش باشیندا اولانلارین چوخو منیم شاگیردلریم اولوب، هر ایداره‎‎یه گئدیرم گؤروسن بیری میزین دالیندان قالخیر، سالام آقای قدیری، بویورون! بویورون میزین دالیندا ایله‎شین! گئدیر الینده چای آلیر گتیریر. من اوتاقدان چیخمایینجا میزی‎نین دالینا کئچمیر. دئییرم منیم هله‎ده سیزه نیسبت شاگیردلیک حیسسیم وار. خییاواندان کئچنده سالامدی‎ کی یاغیر. سالام آقای قدیری, سالام اوستاد, سالام جناب قدیری.

بؤرکومو گؤتوروب قویماغدان آستاری قیراق آلا گئدیب, بو گون صاباحدی کی سؤکوله. من بو بورکو کئفین ساز واختی آلمیشدیم. دؤره بورک‎دی. قاباقلار قیشدان- قیشا قویاردیم. آمما بیر نئچه ایلدی اوشاقلار دئییرلر آغا سن آللاه همیشه بؤرک قوی. ماشاللاه ائله یاراشیر سنه! بیلیرم نییه دئییرلر. آخی باشیمین توکو تؤکولوب, اوتانیرلار. من ده اوره‎کلرین سیندیرمیرام. چؤله چیخاندا بؤرک قویورام.

یئریمدن دورا بیلسه‎ایدیم, بو جام‎لاری بیر سیلیب, تمیزلردیم. چوخ داریخدیریر منی. گومان کی آلتی آیدی تمیزلنمه‎ییب. آدین دا قویوبلار خصوصی بیمارستان. اوشاقلار یامان یادیما دوشوبلر. سهیلا بیر لحظه گؤزومون قاباغیندان گئتمیر. او گون ملاقاتا گلنده, گؤزومدن قووورغا کیمی یاش النیردی. حؤکمن یاپیشیب کی, آغا وئر گؤروم داشین نه یئکه‎لیگه ایمیش. دئییرم قیزیم ماتاه‎دی ساخلییام, آتدیق گئتدی دا. آداخلیسی‌دا گلمیشدی. آروادا تاپشیردیم دای گلمه‌یه‎لر, بابام یوز آغاج یولدی. دئدیم اوشاقلاری آوارا ائله‎مه. من‌ده بئش اون گونه مرخّص اولوب، گله‎جه‎یم. اکبر آغا دا وار. گونده باشیمین اوستونده‎دیر, نیگران قالما!

گؤز- گؤز ائله‎دیم، یاواشجا پولو وئردیم. گؤزلری بؤیودو. بیر ته‌هر اوشاقلاری اکیب سوروشدو؛ پولو هاردان تاپدین؟ دئدیم اکبر آغادان آلمیشام. آپار قیزین جئهیزین واجیب‎لرین آل. قالمیشینادا آللاه کریمدی. اکبر آغا منه بوردا وام جورله‎ییب. گؤزلری گولدو بئچارانین.

یاخشی اولدو تئز گئتدیلر و اکبر آغانین آروادی گلسه‎ایدی, ایش بویویه‎جه‎‎ایدی. اکبر آغا دئییر آقدسین آغزیندا لپه ایسلانماز.

او گوندن کی سهیلانین ائلچی‎سینه هه جاواب وئردیک. فیکیر خیال منی گؤتوردو. آرواد دا منی قارالادی کی سن سئوینمه یئرینه نییه قارا تپه‎د‎ن یاس گتیرمیسن. نه اولوب؟ نه‌د‎ن ناراحاتسان. اولمویا باجی اوغلووا وئرمک خیالیندایدین. دئدیم آرواد کئچی جان هاییندا, قصّاب پی آختاریر. سن نه دانیشیرسان. ائوی ییخیلمامیش، من جئهیز فیکرینده‎یم. هاردان جورلا‎ییب آلاجاییق. دئدی آللاه کریم‎دی. او کی خیر- خیرداسی‎دی ائود‎ن جورله‎رم. قالمیشینادا قیزیل‎لاریمی ساتـیب آلاریق. من بوندان بئله قیزیلی نئیله‎ییر‎م.

او گئجه راحات یاتدیم. صاباح سحر آپاردیم قیزیل‎لاری ساتدیم. گئتدیک بازارا. اوچ- دؤرد تیکه شئی آلدیق, پول قورتاردی. اویانا قاچ, بویانا قاچ. کیمه آغیز آچیم. کیمین قاپی‎سینا گئدیم. آخی هامی گیریفتاردی. بانک‎لاردا شاگیردلریمدن وار ایدی. گئتدیم بلکه بیر وام جورله‎یه‎لر، دئدیلر بیر پروانه کسب تاپ گتیر، قالمیشی بیزیم عهده‎میزه. بابام منیم کی بار- باققالینان گل- گئدیم اولماز, بو آدامی هاردان تاپیم. قدیم زامان دئییل کی, ایندی بیر پونزا قاتـیغی نیسیه‎ وئرمیرلر. هاندا قالا آداما ضامین اولالار. اصلن منیم بو تاجیر جاماعاتدان او قده‎ر‌ده خوشوم گلمز. قورساغسیز آدامدیلار. ناچارلیغدان، جانیمی ییغدیم دیشیمه, بیری‎نین یانینا گئتدیم، گؤردوم کوهنه پالان سؤکور؛ ایت ایلینده اوغلوما گلدیم ایکی نومره ایسته‎دیم وئرمه‎دین. نه جور اولدو, نه ته‎هر اولدو…., دوردوم آیاغا، دوشدوم یولا. آللاه هئچ موسلمانی نامرده مؤحتاج ائله‎مه‎سین. گونلر گلیب سوووشوردو. اوغلان ائوی ده فیشار گتیریردی کی گلیریک گلینیمیزی آپاراق. آنجاق لاپ آسیلی قالمیشدیق. سونرا آللاه طرفی ویردی اکبر آغا گلدی ننه‎سینه باش چکمه‎یه, اونون الی ایله بیزیم دویونوموز آچیلدی.

هرد‎ن منی فیکیر خیال گؤتورور. دئییرم, اولمویا بو پول دا گؤرمویه. او گون شوخلوغجا اکبر آغایا دئییره‎م نئجه اولاردی آدامین اوچ بویره‎یی اولایدی. دئییر آی کیشی, ناشوکورلوک ائله‎مه, آللاه بیلن یاخشی‎دی.

بو گون یئنه‎ده هاوا توتولوب. داریخما باسیر منی. کئشگه آیاغا دورا بیله‎‎ایدیم. بو جاملاری بیر سیلیب تمیزله‎یئیدیم.

سون

یاز- ۷۴

اشتراک گذاری در print
چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *