بوگون یکشنبه 29 فروردین 1400 ساعات 14:16
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

elyar polad
آيدين
ائلیار پولاد

تزه‌جه اون بئش ياشينا دولوردو. عادي بير سويوخ ديمه‌دن سونرا تامام سسي دیيشميشدي. عايله‌سي و دوست تانيشلار “سويوخلاييب، کئچيب گئده‌ر” – دئيه اونا اوره‌ک توختاخليغي وئريرديلر. آنجاق آيدين اؤزو بو وضیعتي چتينليکله قبول ائده‌ره‌ک فيکيرلشيردي: نولسون، سسيم بير آز باتيب، کئچيب گئده‌ر، يئنه اوولکي وضيعته قايیدارام. آمما اونون سسي گوندن- گونه بمله شيردي. آناسي اسمر خانيم چوخ نيیاران ايدي. قونشودا کي ائوده تويا حاضيرلاشيرديلار. آيدينين يئني يئتمه اولماسينا باخماياراق او بوتون قوهوم و اقره‌بالارين تویونون اوول- آخرينه قده‌ر اليندن گلني اسيرگمزدي. قوناقلار گلرديلر و او زامانا کيمين کي موسيقي قوروپو گلمه‌ميشدي آيدين مجليسي آپارار و قروپون موغنيسي يورولاندا يئنه آيدين مجليسه ذووق وئره رميش…

اسمر خانيم مطبخده بيش – دوشور ائديردي. ائله بو زامان قاپي دؤيولدو. دؤشلويو چيخاريب وائله اليني‌ده اونلا تميزله‌دي “کيمدير – گلديم ” دئيه حيط قاپيسينا طرف يوللاندي. پيله‌کاني ايکي- بير ائديب و قاپيني آچمازدان اوول سوروشدو:

–           کيمدير؟

–           قاپيني آچ ، اسمرخانيم منم. – دئيه ، حلمه خالا سسلندي.

اسمر خانيم سسي تانيدي و قاپيني آچاراق حلمه خالاني ايچري دعوت ائله‌دي. ايکي قونشو سالاملاشيب و حيطه گلديکده قاپيني آرخادا اؤرتدولر. حلمه خالا دئدي:

 – باغيشلا اسمر خانيم ايشيندن قويدوم. ائله بالانا قيسمت بو گون ترلانين تویو باشلانير. سيزي بوتون عايله‌يله بير يئرده تویا دعوت ائديرم و دئمه‌لييم کي بو آخشام موسيقي اولماياجاق. آيدين گلرسه قوناقلارين يانيندا اوزوموز آغ اولار.

اسمر خانيم داخیلي عالمي اوزه گلمه‌سين گولومسه‌يرک جاواب وئردي:

 – حلمه خالا تویا حتمن گلريک و چوخ تاسسوفلر اولسون آيدينين سويوخ ديمه اوجوباتيندان سسي توتولوب. اؤزون بيليرسن کي آيدينين شنلييه چوخ ذووقو وار، اوزوده گله‌جک. آنجاق موغني اولساييدي چوخ ياخشي اولاردي.

 حلمه خالا بو زامان دريندن بير آه چکيب دئدي:

 – اسمر خانيم بيزيم بو آخشام اوميديميز آيدينا ايدي. حاييف، من ايندي گئديم ائوه باهادور آغايا دئييم کي بير آيري فيکير ائله سين.

گون باتانا آز قاليردي. قونشو ائوده سس-کوي چوخاليب و قوناقلار بير- بير ايکي-اوچ گليرديلر. باهادور آغا حسن آغايا تاپشيريق وئرميشدي کي نه تهر اولورسا اولسون بو آخشاما موغني تاپيب گلسين. حسن آغا باهادور آغانين ياخين دوستو ايدي و بوتون کند اهلي اونا اينانيردي. او بير ايشي عهده‌سينه آلديقدا گره‌ک يئرينه يئتيره‌ييدي. اودور کي گوندن بير آز قالان شهره گئتميشدي.

قوناغلار گليرديلر، آمما حسن آغادان خبر يوخيدي. باهادور آغا زامانين اؤتدويونده کدرله‌نيردي و هر قوناغي قارشيلاياندا بو تدبيرسيزليینه گؤره اؤزون قيناييردي.

حسن آغانين شهرده ياخشي بير دوستو واريدي و ايشي موشگوله دوشنده اونا اوز توتاردي. اودور کي گون باتار باتماز اؤزونو دوستونا يئتيريب و احوالاتي دانشيب کومک ايسته دي.

 بختیار قفه‌چي دئدي :

 – هامي تويون ايلين بو واختينا سالير و بير هفته اؤنجه بئيله‌شيرلر.

 – بختیار دایی سندن سورا هئچ کيمه گومانيم گلمير.

 – ياخشي ايندي کي آخشامدي. اؤزونده گؤرورسن قفه‌خانا بومبوشدور. آخي موغنيني هاردان تاپيم؟

بختیارکیشی بو سؤزلري دئيه-دئيه بير ايسته‌کان چاي حسن آغانين قاباغينا قويدو.

حسن آغا ديرسک‌لريني ماسانين اوزه‌رينه قوياراق، اووجونا چنه‌سينه سؤوکه‌ييب دئدي:

 – بختیاردایی اؤزون بيليرسن کي باهادور آغايلا من عايله‌وي دوستام و ايندي اونون اوغلو ترلانين تويودور. اگر بو آخشام موغني تاپماسام، اؤزومو هئچ واخت باغيشلامارام.

بختیارکیشی ايسته‌کانلاري بير آغ دسماللا قورولاييردي. ائله بو زامان قاپيني آچيب ايچري گيرن آدام اونون گؤزونده قيغيلجيملار پاريلداتدي و اوزونو توتوب حسن آغايا دئدي:

 – مندن سنه هاراي اولماز گؤروم فخري موعليم نه دئيير.

بختیارکیشی بو سؤزلري دئيه‌رک آرمودو ايسته‌کاندا خوروز قويروغو بير چاي تؤکوب و فخري موعليم ايله‌شن ماسايا ياخينلاشيب، چايي ماسانين اوستونه قويوب دئدي:

 – خوش گلميسينيز.

 – خوش گونوزه گلک، نئجه سن بختیار دايي؟

 – ساغ اول اوغلوم.

فخري موعليم شهرين بيليم يوردوندا فلسفه درسي دئييردي و موسيقي‌يه علاقه‌سي اولدوغونا گؤره اؤز ائوينده موسيقي درنه‌يي آچميشدي. بوتون شهرده اولان گنج موغني‌لر اوندان موسيقي درسي آليب و موسيقي عالمينده اؤزلريني فخري موعليمه بورجلو ساييرديلار.

فخري موعليم بختیارکيشينين دايمي موشتريسي ايدي و دوست تانيشلاريلا بو مکاندا گؤروشردي.

بختیارکيشي ماسانين اوستون سلقه‌يه سالاراق، اوتانجاق حالدا دئدي:

 – بو منيم دوستوم حسن آغادي. بو آخشام تويلاري وار. آمما هئچ بير موغني تاپا بيلمه‌ميشيک. بلکه بيزه کؤمک اولاسان؟

فخري موعليم ايسته کاني بارماقلارينين آراسينا آلاراق جاواب وئردي:

 – من چوخ سئوينه‌رم بيرينه کؤمه‌ييم ديسين. آنجاق منيم تانيديقلاريم عادي طلبه‌لرديلر و اينديه‌دک مجليسه چيخماميشلار. آنجاق نه ائتمک اولار من اؤزوم ده ائله بير آز کئفسيزم. بير- ايکيسيني گوتوره‌ک گئده‌ک.

ائله بو زامان بختیارکيشي سئوينجيندن ايره‌لي‌له‌ييب فخري موعليمي قوجاقلاييب و باغرينا باساراق تشکورونو بيلديردي. حسن آغادا ديل- آغيز ائديب، اوچو ده بير يئرده قفه‌خانادان چيخيب و فخري موعليمين ماشينيندا اوتوروب طلبه‌لر اولان يئره گئديلر.

***

فخري موعليمين ماشيني کنده يئتيشيب و باهادور آغانين قاپي‌سيندا داياندي .

 گونون باتماسيندان چوخ کئچمه‌سه‌ده، باهادور آغا اؤزونو ايتيرميشدي. قوناغلاريندان شرمنده اولدوغونو گؤروب حيطده يئرسيز اوتاي- بوتايا گئديردي. ائله بو زامان حسن‌آغا قوناغلاري ايجري دعوت ائديب و باهادور آغاني گؤرستدي:

–           تانيش اولون بو باهادورآغا، منيم دوستوم و ترلانين آتاسي.

قوناغلار بير- بير ياخينلاشيب، ال وئريب سالاملاشديلار. حسن آغا سؤزونون آرديني کسميردي:

 – بو فخري موعليم شهرميزين ان اعتيبارلي ضيالليسي، بودا کي منيم دار گونومون اوميدي بختیار دایی و بو بيرسي‌لر گنج طلبه‌ديلر.

باهادورآغا تلسمه‌دن قوناغلاري ايچري دعوت ائده‌رک فيکيرلشيردي: “من حسن آغاني شهره موغني داليسينجا گؤندرديم او شهرلي قوناغي گتيريب. ائله کند اهلي بير تهر مني باغيشلار، آمما من بو قوناغلارلا نئيله‌ييم. آيدينيندا کي سسي باتيب. لاپ بيابير اولاجاغام.” قوناغلار ايچري کئچديکدن سونرا حسن آغا باييرا چيخيب ماشيندا اولان چالقي آلت‌لريني گتيرنده باهادور آغا اونو گؤردو و سئوينجک حالدا دئدي :

 – قريبه آدامسان حسن آغا. لاپ اوره ييم يئرينده دايانميشدي. اولمازدي اوولده مني باشا سالاسان؟

 – باهادور آغا ، بو آخشام اؤزه‌ل بير آخشام اولاجاغ. قوناغلارا مجليسده يئر وئر.

 باهادور آغا قوناغلاري مجليسين يوخاري باشيندا ايلشديريب و سونرا حيطه چيخيب، قوللوقچولارا تاپشيريقلار وئردي…

 آيدين مجليسين آشاغيسيندا اوتورموشدو فخري موعليم صؤحبته باشلادي:

 – منيم عزيزلريم بيز هاميميز بو آخشام بورا گلميشيک کي ، باهادور آغانين اوغلو ترلانين توي مراسيمين قئيد ائده‌ک. منيم اطرافيمدا اولان بو طلبه‌لر هله موسيقي يوللاريندا ايلک آدديملاريني آتيرلار. سيز فهيم جنابلاردان ايسته ييرم کي ، اونلاري آلقيشلاييب و هاميميز بير يئرده چاليشاغ کي ، بو مراسيم طنطنه‌لي کئچسين.

مجليسده اولانلار هامیسي بير يئرده فخري موعليمي آلقيشلاديلار. ساغ اول-وار اول سسي اوجالدي. تارچي کؤکو ” سه‌گاها” کؤکله‌يير و کامانچي اونا زووم توتور. مجليس ياواش- ياواش موسيقي ترنوميله ساکيت‌لشيردي. موسيقي دونياسي اينساني روحلانديرير و اينسانين اوره‌يين اوخشايير و ائل- اوبا عادتينده مجليسلرين ياراشيغيدي. هردن بير فخري موعليم شعير اوخويور و اونون سسينده اولان اوره‌يه ياتيملي آهنگ آيديني يئرينده ديللنديريردي. نهايت اؤزون ساخلايا بيلمه‌ييب اوتوردوغو يئرده آياغا قالخيب سوزه باشلادي:

 – من بوتون قوناغلارا خوش گلدين دئيه‌رک واختلاريني آلديغيما گؤره عوذر ايسته‌ييب دئمه‌لييم کي ، ترلان منه بؤيوک قارداش اولاراق منيم بوينومدا حاقي وار. اودور کي منيم سسيمين باتماسينا باخماياراق بو آخشام اوخوماسام ، اؤزومو باغيشلامارام. اؤنجه هاميدان عوذر ديله‌ييب و اوستادلاردان خاهيش ائديرم کي، آشاغي پرده ده بير هاوا چالسينلار و من اؤز بورجومو يئرينه يئتيره بيليم .

يئنه‌ده مجليسي آلقيش سسي بورودو. تارچي “سه‌گاه زابول” اوزره چالماقا باشلادي. آيدين وار گوجوييله چاليشيردي کي، بو موغامي آخيراجان اوخوسون. مجليسده اولانلار هاميسي آيدينين اوخوماسين کئچميش تويلاردا گؤروب و ائشيتميشديلر. بيليرديلر کي بو سس قاباقکي سس دئييل. آمما فخري موعليم فيکيرلشيردي :”بو ياشدا بير گنج نئجه بو موغامين عهده سيندن گلير ؟ ” تعجوب ائتديکده اوزون حسن آ غايا توتوب دئدي :

–           بو کيم دير؟

–           کنديميزين بولبولو دور. آمما حاييف سويوخ ديمه‌دن سسي توتولوب.

 فخري موعليم هئچ نه دئمه‌دي. او دوشونوردو کي : “سويوخ ديمه‌دن سس بو قده‌ر کورلانماز”. و آيدينين قابيلييتله اوخودوغو موغاما قولاغ وئرنده دوشوندو کي : “اولا بيلسين اونون حنجره سي خسته‌له‌نيب”. ائله قوناغلار داغيلاندان سونرا آيديني چاغيريب و سوروشدو:

 – اوغلوم نئچه واخدير سسين باتيب ؟

 – ايکي هفته اولار .

 – سحر منيمله شهره گئده‌ک. اورادا ياخشي بير حکيم وار. آپاريم سنه باخسين.

 – يوخ زحمتنيزه راضي اولمارام. عادي سويوخ ديمه دي ، کئچيب گئده ر .

 – يوخ اصلن زحمتي يوخدور. صاباح موطلق منيمله گئتمه‌ليسن.

***

 فخري موعليم و آيدين حکيمله اوزبه- اوز اوتورموشدولار. حکيم آيديني معاينه ائديکدن سونرا اوندان ايسته‌دي کي او بيري اوتاقدا گؤزله‌سين. آیدین گئتدیکدن سونرا اوز توتوب فخري موعليمه دئدي:

 – حاييف اليمدن هئچ نه گلمز. بو اوشاغدا اؤزه‌ل بير حنجره وارميش. تاسسوفلر اولسون کي اوندان دوز ايستيفاده اولونماييب. اونا موسيقي و سس يئتيرمه تربيه‌سي وئريلمه‌ييب. اونا  گؤره‌ده اونون سس سيستيمي زده‌له‌نيب و تاسسوفله دئمه‌لييم کي ، هئچ واخت اوولکي فورمايا قايتارماق ايمکاني بيزده يوخدور .

 حکيم دانيشا- دانيشا موعليم دوشونوردو :

 …….او واختا کيمين کي بيزيم مکتبلرده موسيقي درسلري کئچمير. اولادلارميزين بو حالا دوشمه‌سي قريبه اولمایاجاق…

او اینتیظار اوتاغیندا اولارکن فخری  معللیمله حکیمین موباحبثه‌لرین ائشیدیردی و دریندن فیکره گئتدیی اوچون فخری معللیم قاپینی آچیب ایچه‌ری گلمه‌سینی دویمادی. آرتیق  معللیمین آرخاسینجا حکیم ده ایچه‌ری گلمیشدی. فخری  معللیم حکیم له دیل – آغیزدان سونرا آیدینا اوز توتدو:

–           هه ، آیدین ، هئچ نه‌یین دئییل. ساده جه سویوخ دیمه دندی ، کئچیب گئده ر.

 آیدین فخری  معللیم له بیر یئرده مطبدن چیخدیلار. گونش گؤیون اورتاسیندایدی. کوچه ده گل – گئت چوخالمیشدی. ماشینلارین سسی اینسانلارین سسینه قاریشمیشدی. کوچه آلوئرچی‌لری قولاق باتیرجی سسله موشتری‌لرین چاغیریردی. اونلار بیر آز گئتدیکدن سونرا خلوت بیر کوچه‌یه دؤندولر. هر ایکیسی فیکیر- خیال عالمینده سئیر ائدیردیلر. آیدین اوز توتوب فخری  معللیمه دئدی :

–  معللیم ، من سیزدن چوخ تشککور و مینتدارلیق ائدیرم. سیز بویوک روحه مالیک‌سینیز. آمما مندن اینجیمه‌یین، حکیم له سیزین دانیشیقلارینیزین هامیسینی ائشیتدیم. منی ایجازه سیز قولاق آسدیغیما  گؤره باغیشلایین .

 فخری  معللیم کؤکسون اؤتوروب و دیللندی :

–           من ائله بیلیرم کی ، سن هئچ نه ائشیتمه‌میسن. ایندی کی ، ائشیتمیسن ، سندن ایسته ییرم کی ، بوندان بئله اوخوماغین فیکریندن داشیناسان ، چونکی سنه داها زیانی وار.

 اونلار سوکوت ایچره آغیر آددیملارلا یئریییردیلر. بیر ایری بولود گونون قارشیسینی آلدی. هاوا بیردن – بیره سویوقلاندی. اونلار یوللارینی بختیار دایی نین قفه‌خاناسینا طرف یؤنلتدیلر. هاوانین بیردن – بیره سویوماسی گلیب – گئدنلرین سورعتینی آرتیردی. هامی مقصدلرینه تئز چاتماق اوچون تله‌سیردی. آرا- بیر یاغیش دامجیلاری اونلارین اوست – باشلارینی دؤیجله‌دی. اونلار قفه‌يه گيرن كيمي شيديرغي ياغيش باشلادي. بير بوش ماسايا ياخينلاشيب اورادا ايلشديلر.

بختیار كيشي در حال اونلارين ماساسينا ياخينلاشان كيمي ماساني تميزله ييب و دئدي :

 فخري موعلليم يورولماياسينيز بوگون چوخ زحمت چكميسينيز. همشه وار اولون. آخشام دا كي سيزه چوخ زحمت وئرديك.

 فخري موعلليم جاواب وئردي :

–           يوخ بختیار كيشي منده ائله بئكار ايديم. لاپ يئرينه دوشدو. بو گون ده لاپ بئكار ايديم. ائله آيدين دا بهانه اولدو.

بختیار كيشي آرتيردي :

–           يوخ ائله دئمه همشه زحمتيميز سنينله دير.

آيدين هئچ نه دانيشميردي. اونو فيكير گؤتورموشدو. ناهار يئمه‌گيندن سونرا فخري موعلليم اوز توتوب آيدينا دئدي:

 – هه اوغلوم ، داي واختدير. ايندي من گره‌ك بيليم يوردونا گئده‌م. ايسترديم كي ، سنينله اولام ، آمما نئيله مك، واخت گلر بير – بيريميزي آرتيق باشا دوشه ريك. ايندي ساغ اول من گئنمه لييم.

 فخري موعلليم گئدندن سونرا آيدين لاپ تك قالميشدي. يئمكخانا گاه دولور گاهدا بوشالير. آمما بونلارين هئچ بيري آيدينا ماراغلي اولمور. او كنده قاييتمالي دي.

 ***

 نئچه ايللر كئچدي. آيدين اورتا مكتبي بيتيردي. آمما اونون سسي اوولكي يئرينه قايیتمادي. او كئچميش ايللرده فخري موعلليمله علاقه‌سين كسمه‌دي. اونون كؤمه‌ييله اينجه صنعت فاكولته‌سينه قبول اولدو. دؤرد ايل موسيقي درسيني باشا ووردو. ايندي آرتيق او بير موسيقي موعلليمي ايدي. آنجاق اؤزو هله اؤزويله باجارميردي. نسه بير چاتيشمامازليق اؤزونده حيسس ائديرديردي.

 1990- نجي ايللريدي. شيمالي آذربايجانين يولو آچيلميشدي. او تايدان بو تايا – بو تايدان او تايا گليب گئديرديلر.

گونلرين بير گونو يئنه بختیاركيشي‌نين  قفه‌سینده اوتوروب فخري موعلليمي گؤزله‌ييردي. اونلار همشه بو يئرده گؤروشرديلر. شهريور آيينين اوول‌لريدي. هاوا چوخ اوره‌يه ياتيم ايدي. ائله فخري موعلليم و آيدين تعطيل گونلري بورادا اولارديلار. اؤتن گونلر اولدوغو كيمي بو گون‌ده آيدين فخري موعلليمي گؤزله‌ييردي. آمما ندنسه بو گون بير حيسس، بير ايستك فخري موعلليمين گليشيني يوبانديريردي. او حيسس ائديردي كي ، فخري موعلليم يوبانير، بلكه ده او حيسس اونو تلسديريردي. او گؤزونو قاپيدان كسمه‌يره ك آرزولارينا فيكيرلشيردي. رويالارينا داليب نسه بولودلاردان آرتيق قانادلانيردي. او سوزون نئجه ، نه تهر باشلاديغينا فيكيرلشيردي. ايسته‌يين نئجه فخري موعلليمه دئمه يين آختاريردي. ائله بو آن فخري موعلليم ايچري گيره‌رك ،آيدين اوتوران ماسايا ياخينلاشيب اونونلا اوز به اوز ايلشه‌رك سؤزه باشلادي :

–           ده گؤروم نئجه سن ؟ گونلرين نئجه كئچير ؟

–           ساغ اول. پيس دئييلم. سيز نئجه سينيز ؟

–           من همه‌شه كي كيمي. آمما سن بو گون بير تهرسن. يوخ ؟

–           ائله دير. بو گون من بير سيرا فيكير لر اورتاسيندايام .

–           نئجه به‌يم ؟

–           دوزونو دئسم ، مني قينامازسانكي ؟

–           يوخ.

–           ايستيرم سفره گئديم.

–           نئجه ؟ سفره؟

–           دوز ائشيتدين. ائله مملكتدن اوزاغا .

–           بير آز آيدين دانيش. گؤروم نه دئييرسن.

–           دوزو بو دور كي ، شيمالي آذربايجانا گئتمك ايسته ييرم.

–           نئجه ؟ شيمالي آذربايجان ؟

–           بعلي. گئديرم درسيمي داوام ائده‌م.

–           ياخشي من نه ائده بيللم ؟

–           سيزين اؤيودلرينيز همشه قولاغيمدادير. خئيير – دوعانيزي ايسته‌ییرم.

 اونلار چوخ دانيشديلار. نهايت راضيلاشديلار. نئچه گوندن سونرا ، آيدين سحر تئزدن حاضيرليقا باشلادي. پاسپورت آلديقدان سونرا سفره حاضيرلاشيب چانتاسيني باغلادي.

***

 تئرمينالدا اونو فخري موعلليم بيرده بختیاردایی يولا ساليردي. اونلار قول بويون اولوب قوجاقلاشديقدان سونرا آيدين آوتوبوسدا ايله شدي. شوشه‌دن اونلارلا ساغ اوللاشدي. آوتوبوس يولا دوشدو.

تبريز آرخادا قاليردي. او گئت – گئده تبريزدن اوزاقلاشاراق ، تبريزي اؤزویله آپاريردي. نهايت گون گؤيون اورتاسينا چاتدي و اونلار آستارا مرزينه يئتيشديلر. اورادا بير سيرا آختاريشدان و گزينتي‌دن سونرا اونلار شيمالي آذربايجانا داخيل اولدولار.

 هميشه روياسيندا گؤردویو كيمي اولدو. شيماللا – جنوبدا هئچ فرق يوخ ايدي. اينسانلار عئيني ، چوخ صميمي و مولاييم طبيعت ده ائله بيل كي ، بير – بيري نين آيناسي دير. ائله بيل بير آلما ياريدان بولونوب.

 باكي يا ياخينلاشديقجا فرقينه واريردي. دونيا ديیشيليردي. آذربايجان دئمك ، باكي دئمك ايدي. باكي نين كوچه‌لري تبريزله عئيني دئييلدير. تبريزده بير يوخلوق، بوردا ايسه بير وارليق واريدي. باكي دا هر نه ايسته‌سئيدين ، هر نه‌يي آختارسايدين تاپا بيلردين. بورايا شرقله – قربين قووشدوغو بير يئرده دئمك اولاردي. شرقين عنعنه سي قربين تفككوراتي بورادا بيرله‌شرك ، ساكيت بير دونيا ياراتميشدير.

 باكي دوغروداندا افسانه‌وي بير شهردير. بلكه ده بيزلره و شرقده ياشايانلارا. گئجه سي گوندوزوندن گؤزه‌ل و گوندوزو گئجه سيندن ماراقلي. بلكه ده اونون گئجه ايله گوندوزونده فرق يوخ ايدي.

 نهايت بير اورتا ميقياسلي مئهمانخانادا يئرله‌شرك نئچه گون باكي ني گزدي. بو نئچه گونده او باكي‌لا سيخ علاقه دار اولدو. آرتيق مدنييت اوجاقلاري ، موسيقي كانسئرواتوریاسيني تانيميشدي. ايندي آرتيق بير آيدان چوخ باكي دايدي.

 سعيد روستموف آدينا موسيقي كونسئرواتورياسينا قبول اولوندو. هر گون سحر ساعات دوققوزدان – اون‌دؤرده‌جك اورادا مشق ائدير و باجاريغيني گؤستريردي. فخري موعلليمين تاپشيريق و اؤيودلرين اونونماميشدي. نئچه آيدان سونرا ، گروهون رهبرليي طرفيندن باكي – دوولت موسيقي كانسئرواتورياسينا قبول اولوندو. او آرتيق اؤزونه يئر تاپميشدي. اورادا چاليشاراق بير عوضو كيمي اورادا قبول اولوندو. گئجه – گوندوز چاليشيردي. تاپشيريقلاري يئرينه يئتيريردي. آنسانبيلين رهبري هميشه اونو گؤز اؤنونه چكيردي. اودا وار گوجو ايله چاليشيردي كي ، يئني موسيقي اصولين ا‌يره نسين و موسيقيه هوه سين گؤسترسين.

 هر گئجه تبريزي يوخودا گؤروردو. اونا دؤزوم و باجاريق باغيشلايان ائله بو يوخولاري ايدي. او چتينليكلره تبريز عئشقيله دؤزوردو.

 او باكي ني موسيقي عالمي سانيردي. بورادا موسيقي‌نين بوتون سيرلريني اؤيره‌نه‌رك هميشه بيرينجي ايدي.

 باشي قاريشديغيندان آيلارين اؤتمه‌سيني بيلميردي. ايندي آرتيق اؤزونه خصوصي يئر قازانميشدي. مجليسلرده صؤحبت اوندان گئديردي. نئچه سئمفونيا يازميشدي. دينله‌ييجي طرفيندن حرارتله قارشيلانميشدي. هر صحنه‌ده دسته – دسته گوللرله آلقيشلانيردي.

 نهايت دؤرد ايل گؤز قيرپيميندا اؤتدو. او هله ده بيليگه مئيلي واريدي. آمما اونو بير ايستك تلسديريردي. وطنده قالان حيسسلر اونو چاغيريردي. اونون اوشاقليقي، اونون اوره‌كده قالان، قالاغا دؤنن حيسسي اونو چاغيريردي.

 او ايندي موسيقي علمينين بوتون سيرلريني اؤيره‌نميشدي. او باشا دوشوردو كي ، وطنده اونا احتياجي اولانلار چوخدور. اودور او وطنه قاييديردي. قاييديردي كي ، بيرده هئچ يئني‌يئتمه‌نين سسي واختسيز باتماسين. قاييديردي كي ، وطنده موسيقيني علمي شكيلده يايسين. او وطندن وطنه قاييديردي.

***

 نه واخت تبريزه يئتيشدييني بيلمه دي. آوتوبوسدان دوشنده فخري موعلليمله بختیاردايي اونو قارشيلادي :

–           خوش گؤردوك فخري موعلليم.

 اونلار قوجاقلاشديلار. بير – بيرلريني باغيرا باسديلار. سونرا بختیارداييلا دا قوجاقلاشدي.

–           هه ، بختیار دايي نئجه سن ؟

–           ساغ اول اوغلوم. ساغ اول كي ، قاييتدين .

 اونلار بير يئرده ماشينا ايله‌شيب يئنه بختیاردايي‌نين قهوه خاناسيندايديلار.

–           هه ، دئه گوروم. نه وار نه يوخ. فخري موعلليم سوال وئردي.

–           ساغ اول موعلليم. هميشه اؤيودلرين قولاغيمدايدير.

–           هه، او موسيقي فئستيواليندا چيخيشين بيزلري لاپ سئوينديردي.

–           او موسيقي سيزه حصر اولموشدو بختیاردايي. اير اؤنجه‌دن قولاق وئرسه یديز بيلرديز.

–           نه فرقي وار اوغلوم. بوتون دونيا سني آلقيشلادي . منده بيري.

–           يوخ فرقي چوخدور. من اير سيزي دوشونمه‌سه‌يديم اصلا باجارمازديم.

–           ياخشي. دئه گؤروم. اورالاردا نه خبر ؟ بو دفه فخري موعلليم سوروشدو.

–           اوستا بير سمفوني يازميشديم. حاييف قويماديلار. ائله بيل اورادا دا بير آز چتينليك وار. او سمفوني سيزه حصر اولموشدو. ائله بيل بودونيادا مندن سونرا سيزي باشا دوشن يوخدور. اولسون اونو من سيزه چالارام.

–           اولسون اوغلوم. دونيا چوخ كيچيك دير.

****

ايندي او گونلردن چوخ واخت كئچير. آيدين تبريزده بير تاكسي سوروجوسودور. هردن بير دوست – تانيشلارينا موسيقي نومره لريندن پيانودا چالير. او بير اوخول آرزوسوايله ياشايير. ايسته‌يير كي، اؤيره‌نديگيني بوتونلوكله اؤيرنجيلره اؤيره‌تسين. حاييف هله اونا زمين يارانماييب. او فخري موعلليم و حكيمله‌ده علاقه‌ده‌دير. چاليشير كي، هئچ كيمين سسي كورلانماسين.

او اينانير كي ، بير گون گله‌جك. اوخولا گئديب، اؤيره‌ده‌جك .

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *