كؤله / رقیه کبیری

كؤله
رقیه کبیری

ساعاتين زنگي دورمادان چالير. سانكي ماشين سيقنالي‌دير. ديت- ديت…ديت- ديت…ديت- ديت…

اليمي اوزالديرام، ساعاتين زنگيني سؤندوروم. اليم يئتيشمير. يئريمدن قالخيب اوتورورام.  گئرده‌ك گئجه‌سينده يالنيز اويموش گلين كيمي حاليم وار.  آغ- آپباغ گئجه‌لييمين دويمه‌لري آچيقدير. نه زامان آچيليب، بيلميرم. كؤكسوم اوشويور. جانيم گيزيلده‌يير. يئني‌دن اليمي اوزالديرام،  كيتابخانامداكي سيقنال سسيني يامسيلايان ساعاتين زنگيني سؤندورورم. گلين ماشينين سسي كسيلير. ال- قولوم كئيييب.

سانكي يوخودا داش داشيميشام. اون بئش دقيقه ايچينده قالخماليیام؛ يوخسا ائوده‌كيلر ايشه، مدرسه‌يه چاي- چؤرك يئمه‌دن گتئمه‌يه مجبور قالاجاقلار. ائوده‌كيلر بير يانا، اؤزوم‌ده ايش يئريمه گئج قالارام. يئريمدن قالخا بيلميرم. يئني‌دن يورغون گؤوده‌مي ياتاغيما بوراخيرام. اريمين خورولتوسو قولاقلاريما قووارا چكير. ياسديغيم سانكي داش‌دير، بوينومو اينجيدير. ياسديغي باشيمين آلتيندان گؤتوروب اوزومه قويورام. اللريمله قولاقلاريما سيخيرام. كيپريكلريمدن داش ساللانير. آتامين ماغازاسيندا، تره‌زي ديبینده‌‌‌كي داشلار سيرايلا بير به بير كيپريكلريمدن آسلانير. آتام ايسه،كيپريكلريمي داشلارا دويونله‌يير. دنيزين ايچينده   اولسايديم، آنسيزين بوغولارديم. بوراسي دنيز دئييل. ياتاغيم‌دير. آتامين مغازاسينين داشلاري هاردان گليب ياتاغيما گيردي، آنلاميرام. داشلار سانكي چئشيد بويدا آداملارديلار،كيپريكلريمدن دارا چكيليب.

كيپريكلريمين نه قدر كؤكلو- دؤزوملو اولدوغونو ايندي ياخشيجا آنلاييرام. بوينومون آرتروزلو مهره‌لري آغريير. ايلييينده – سانكي ايلان كيمي بير شئي قيميلدايير. بورولا- بورولا بئينيمه ساري سوروتله‌نير.  باشيمين كاساسيندان باش قالديرير. ساچلاريمين تئلي هر بيري سانكي قارا ايلاندير،قيوريليب، آچيلير. من، بو قاديني تانييرام. آدي «مدوسا»دير. بير زامانلار يونان وطنداشي‌ايميش. ايلان قيوريلان ساچلاري‌ايله، داشا دؤندورن گؤزلري‌ايله شهرت قازانيب. اما مدوسا منيم ياتاغيمدا، اريمين يانيندا نه ايشي وار؟!

دقت ائديرم. ياتاغيمدا‌كي قادين مدوسا دئييل. قورخا- قورخا اليمي ايلان قيوريلان ساچلارينا چكيرم. منيم ساچلاريمدير. گئجه كيمي قاپ- قارا، پامبيق كيمي يوموشاق ساچلاريم!

كيپريكلريمه دويونله‌نميش داشلاري آچماغا چاليشيرام. بير دويونو آچماميش يئني‌دن كيپريكلريم داشلارا دويونله‌نير. سانكي خاچ گؤزلي«اصلي»نين  گلينلييينين تيلسيم‌لي دويمه-لري‌دير، آچيلماميش يئني‌دن دويمه‌له‌نير.

كيپريكلريمين هر بيري بير كنديردير،گؤزومون قاپاغيندان آسلانيب. گؤزلريمي آچيب گوزوگويه باخا بيلسه‌ايديم هر زامان ماراقلي اولدوغوم كيپريكلريمين سايي‌سيني سايارديم.

دويونلري آچماغا چاليشديقجا كنديرلر گؤز قاپاغيمدان ايچري اوزانير. اللريمه، آياقلاريما باغلانير.

تانيماديغيم بير يئرده‌يم .قول كيمي زنگي بير اركك اللريمه، آياقلاريما باغلانميش كنديرلرين دويونونو آچير. كيپريكلريمدن آسيلي داشلار گؤزلريمين ايچينده بوز كيمي اريير. ياناقلاريما آخير. ساوالانين قاينار سولاري دير سانكي ياناقلاريمي قيزديرير. قوللاريمدا كندير ايزلري قيزاريب،قاشينير. اليمي قاشينان يئرلره چكيرم. تعجب‌له هر يئره گؤز دولانديريرام. بوراسي تاماشا صحنه‌سينه اوخشايير. بويوك بير سكي‌نين اوستونده دورموشام. گونشين ايستي‌سي اوشوموش كؤكسومو قيزديرير. چئوره‌‌‌مده‌كيلرين هاميسي زنگي ديلر. بوراسي هارادير؟! حبش…؟ميصر…؟بغداد شهري دير يوخسا آفريقا، بيلميرم. آنجاق قالاباليق بير يئردير. يوخسا دوغوردان بوراسي تاماشا صحنه‌سي‌دير؟ اوندا منيم بورادا نه ايشيم اولا بيلر؟!

هر يئره گؤز دولانديريرام. زنگي ارككلرين آياقلارينا زنجير باغلانيب. قادينلارين سايي‌سي آزدير. سكي اوستونده مندن باشقا آغ دري‌لي اينسان گؤرونمور. سكي‌نين چئوره‌سينده-كيماغازالارين اؤنونده،  سبدلرين ايچينده چئشيد- چئشيد يئمك‌لر وار. آسمالاردان آسيلميش خورمالار، تاباقلارداكي خشكيبار،آغزيمي سولانديرير. يئره دوزولن ياغ كوپلرينه باخيرام. قيرخ حراميلرين قيزيل كوپلري ياديما دوشور. يوخسا بوراسي قيرخ حراميلرين شهري دير؟!…اولا بيلمز!…قيرخ حراميلرين ماغاراسي وارايدي،شهرلري يوخ كي!…

هاردان گليب دوشدوم بو قالاباليغين اورتاسينا، بيلميرم. قارنيم آجيخيب. سانكي قارنيمدا بير لشكر قورباغا قيميلدايير؛ قورولدايير. بير آن اؤز ايين-باشيما گؤزوم ساتاشير. گئجه‌ليك اينيمده، اؤرپك‌سيز،ساچلاريم چيينلريمه شلاله‌له‌نيب. قورخورام. چئوره‌مه باخيرام. ساچلاريمي اؤرتمك اوچون اؤرپك آختاريرام. ايللردير اؤرپك‌سيز ائودن ائشييه چيخماميشام. هؤوله‌سك گئجه‌لييمين آچيق دويمه‌لريني دويمه‌له‌ييرم. قيسسا اتكليييم ديزلريمه بئله يئتيشمير. هويوخوب قالميشام. سكي‌ده دوران زنگي قادينلارا، ارككلره باخيرام. چيلپاق ارككلر، بئللريندن ديزلرينه كيمي فيته‌يه  بئزه بورونوبلر. قارا،چيلپاق اؤموزلاري گونشين ايشينيندا گوجلو، وسوسه‌لي گؤرونور. زنگي قادينلارين قيوريم ساچلارينا، نارينج بيتن كؤكسلرينه، گولوشلري، آغ-آپباغ ديشلرينين آرخاسيندا بوغولان قالين،شهوتلي دوداقلاريناباخيرام. بويونلاريندان دؤشلرينه دوغرو آسيلي ،بويالي داشلاردان دوزلميش بويونباغيلاريندان خوشوم گلير. اليمي بوش بويون-بوغازيما چكيرم.منيم ده بير ميرواري بويون باغيم وار.

كاشكي ايندي بوينومدا اولسايدي…

بير- ايكي آدديم يئريييرم. يالين آياقلاريم داش- تورپاق اوستونده اينجييير. گونشين آلتيندا ياريم چيلپاق آغ دريم، بئش قاريشليق گوده گئجه‌ليييمين ايچينده گئت- گئده قيزارير.بو قدر زنگي آدامين ايچينده دريم ايشيم- ايشيم ايشيلدايير.

باخيشيمين بويوندا بير كؤشك گؤرورم. اوزاقدان گؤركملي گؤرونور. كيمسه‌لر اوردا ياشايير- دئيه، ماراقلانيرام. يانيمدا كي بوي- بوخونومندن اوچ قاريشدان آرتيق اوجابويلو،زنگي قادينا باخيرام.اويسه  گؤزو بليرسيزبير يئره زيلله‌نيب. قولوندان توتورام. حياتيم بويوندا ايلك دفعه‌دير بير زنگي اينسانا اليم ديير. قارا دري‌سي زويوشكن‌دير. قادين سورغولو باخيشي‌ايلا منه باخير. «بوراسي هارادير؟» دئييرم. او ايسه  نه دئديييمي آنلامير.هوروت-هوروت منه باخير. قارا گؤزلري اوولانميش معصوم ماراللارا اوخشايير. اونونلا لال اويونو اويناييرام. ال- قولوملا، قاش- گؤزومله ايشاره ائديرم. بو ياريم‌چيلپاق، دالغين حاليمله لال اوينو چيخاردان قادين اؤزومم- دئيه،  اينانميرام. فيكيريم ائوده‌كيلرين يانيندا قاليب. قوخورام اوشاقلار مدرسه‌يه گئج قالسينلار. قادينين يانينداكي  زنگي اركك سانكي نه دئدييمي آنلايير.الي ايله گؤزومون دوزونده‌كي كؤشكو گؤسترير. ايسلاق، پار- پار پاريلدايان مئيمونا اوخشار گؤزلريله يالين آياقلاريما، چيلپاق بويون-بوغازيما باخير. بير آن گؤزلري داشا دؤنسون؛ ايسته ييرم. او ايسه ، ديل-دوداغي آراسيندا نسه سؤزلر سؤيله‌يير. دقت‌له قولاق آسيرام . جاريه…جاريه…بغداد…بغداد…

آنسيزين، سانكي بير قازان قاينار سو،  ساچلاريمدان آياقلاريمين اوجونا قدر جالانير.گؤزلريم قارالير. منيم بو كؤله‌لرين ايچينده، بغداد شهرينده نه ايشيم وار!؟…

بير نئچه آدام كؤشكدن سكي‌يه ساري گلمكده‌ديلر. آغ پالتارلي بير قارا قول،اوجا بويلو، ياراشيقلي ارككين باشينا چتير توتوب، اونون آرخاسيجا آدديملايير. باشقالاري چتيرسيزديلر. اونلار سكي‌يه ياخينلاشديقجا، سانكي اورييمده قوشا ناغارا چالينير. ياراشيقلي قارا دري‌لي دئييل. سونوندا منه تاي بيريسي تاپيلدي –دئيه، اونو گؤز آلتي سوزورم.او ايسه  سكي‌نين پيلله‌لريندن يوخاري قالخير. گؤزومنه ساتاشاندا آنسيزين  دايانير.چتيرتوتان قول آزقالير پيلله‌دن آياغي بوده‌ره‌سين. ياراشيقلي،اؤزونو اله آليب،پيلله‌لري يوخاري قالخير. مني گؤرمه‌ميش كيمي مندن اؤتوب، كئچير. ارككلرين بوي- بوخونونا باخير.قوللاريني، اوموزلاريني اينجه‌له‌يير. يانينداكيلار، اونون سئچديكلري زنگي‌لري سكي‌نين بير بوجاغيناآپاريرلار.

ياراشيقلي، منيم يانيمدا دوران اوجابويلو زنگي قادينين اؤنونده دايانير. اونون دؤوره‌سينه هرله-نير. قادينسا، ترپنمه‌دن بير هئيكل كيمي دايانيب. قادينين  آغزينا ايشاره ائدير.قادين آغزيني آچير. قارا دريسي‌ايله ، آغ-آپباغ ديشلري ميرواري دنه‌لرينه اوخشايير. ياراشيقلي زنگي قاديني جارييه‌لييه سئچديكدن سونرا منه ياخينلاشير. قاديني باشقا قوللارين يانينا آپاريرلار. قادين گئده-گئده آرخاسينا دؤنوب،منه باخير. منسه،ياراشيقلي‌دان  قورخمورام، اما ندنسه جانيم تير-تير اسير. ياراشيقلي اركك منه ياخينلاشير.آرخاسيندا گلن قول چتيري بوكولودور. ياراشيقلي منه باخيب، يانيندا دورانلارا  من آنلاماديغيم بير ديلده نه‌سه‌لر سؤيله يير. يالين آياقلاريما، قيسسا اتك-لييمه باخير. منسه، اوشاقلار، اريم گئج قالاجاقلار-  دئيه فيكيريم ائوده قاليب. گؤزوم ساعات آختارير. بوتون گوجومله كؤله‌لرين ايچيندن، تاماشا صحنه‌سيندن، اوج- بوجاقسيز سكي‌دن قويوب قاچماق ايسته ييرم. يوخسا ايشميه گئج قالاجاغام.

ياراشيقلي اوز به اوزومده دوروب؛الي گئجه‌ليييمين دويمه‌لرينده‌دير.بيرآن«خاچ گؤزلي»نين طيليسيملي گلينلييينيي آرزولاييرام. گئري چكيلنده، ياخام ياراشيقلي‌نين الينده قالير. قانيم باشيما قالخير. باغيريرام:«مندن اوزاق دور!…».شهريميزده‌كي گلين داشي گؤزلريمين اؤنونده تيكيلير.اوشاقلاري واختيندا مدرسه‌يه يولا سالماليام. يوبانسام، اريم ايشينه چاي-چؤرك سيز گئده‌جك- دئيه، دوشونورم.
ياراشيقلي ،قهقهه چكيب،  ماساژئت… ماساژئت- دئيه گولور. بارماقلاريلا  چييينلريمه شلاله-له‌نن ساچلاريمي داراقلايير.بوينومون آرتروزلو موهره‌لري آغريير. بو آن ساچلاريم مدوسانين ايلان قيوريلان ساچلاري، گؤزلريم سه، اونون داشا دؤندورن گؤزلري اولسايدي…

ياراشيقلي اليني ساچلاريمدان چكيب، آغزيما ايشاره ائدير. چاره‌سيز آغزيمي آچيرام. اسكوربوتلو لثه‌لريمي گؤرجك، باشيني توولايير. اونا گئچن ايل بير ميليوندان آرتيق ديشلريم خرج آپاريب دئدييم آندا، سوسورام. اوركك حالدا اونون گؤزله رينه باخيرام. اوايسه يئني‌دن چنه-مدن توتوب، آغزيما باخديغيندا،يانينداكينا نسه‌لر سؤيله‌يير، آنلاميرام. آنجاق سؤزلرينين ايچينده  لا…لا…سؤزونو قولاقلاريم گؤيده قاپير.

ياراشيقلي، پيلله‌لري ائنيب،كؤشكه ساري گئدير. آرخاسينداكي زنگي قولون الينده‌كي چتير اونو كؤلگه‌له‌يير. جاريه سئچيلميش زنگي قادين مندن اؤتوب كئچير. سيقنال سسي گلير.اؤزوده گلين ماشينينين سيقنالي‌دير؛ دورمادان چالير. ديت- ديت…ديت- ديت…ديت- ديت….
زنگي قادين، اركك قوللارلا بيرليكده، گئت- گئده باخيشيمين دايره‌سيندن ايتير.

گؤزلريمي آچيرام.گلين ماشينيني آختاريرام. تاوانين دؤرد بوجاغيندا گچدن تراشلانميش گول چلنگ لرينه باخيرام.اوشويورم. گونش،تور پرده‌نين آرخاسيندان ياتاغيما، آياقلاريما اوزانيب.

هؤوله‌سك يئريمدن قالخيرام.آشپازخانايا قاچيرام. اوشاقلارين اوتاغيندا ساعات هله ده زنگ چالير. اون بئش دقيقه يوبانميشام. تله‌سمه‌سم اريم، اوشاقلارچاي- چؤرك‌سيزگئتمه‌ليديرلر. اؤزومده ايشيمه گئج قالارام.

ال-اوزومويوياندا گوزگوده زنگي جاريه‌نين گؤزلري منه باخير. يابانجي بارماقلار ساچيمي داراقلايير سانيرام …

قووارا:سوهان
مدوسا:يونان قادين اسطوره‌لريندن
جاريه: عربجه كؤله قادين
خاچ گؤزلي،اصلي: كيان خياوين بير شعرينده اصلي كرم ناغيلينداكي  ارمني قيزي، اصلي يه ايشاره .
اسكوربوت:بير تور لثه ناخوشلوغو. سببي ويتامين ث آزليغيدير.
20/5/90