چئویرن: علی تقی‌زاده لاریجان
ترجمه: علی تقی‌زاده لاریجان
علی تقی‌زاده لاریجان
00:00
00:00

سرین پاییز آخشامی‌ایدی. کؤچری قوش‌لار شمال اوکیانین اطرافیندا گئجه یوخوسونا حاضیرلاشیردیلار. بیردن آجی بیر کولک باشلادی؛ شمال قیشین خاطیرلادان بیر کولک. قوجا تجروبه‌لی دورنا، سانکی یوخودایمیش؛ اؤزونه گلدی. دسته‌سین باشینا توپلاییب دئدی:
– بو کولک،‌ جنوبا دوغرو کؤچمک اعلانی‌دی. بیر- بیریزه سؤیکه‌نین. هم قیزینین، هم ده یاخشیجا یاتین دینجه‌لین. سحر گونش دوغان کیمی اوچمالی‌ییق.
قوش‌لار دسته‌سینه بیر هیجان، های – کوی دوشدو. تزه پروازلانان بیرجوت دورنا بالاسی سئوینجک اویناییردیلار. آتا آنالاری اونلاری گؤروب مبهم خیالا دالمیشدیلار. آنا دورنا دئدی:
– سن‌جه اوشاقلار بو اوزون سفره حاضیردیلار؟
آتا دورنا:
– هه.! آرخایین اول !. بو سون هفته‌لر چوخ دقت ائله‌میشم. ساغلام،‌ جسارتلی هم ده چئویک گؤرونورلر.
آتا دورنا بو سؤزلری تمکین‌له دئسه ده،‌ اورکدن آرخایین دئییلدی.
قوش‌لار جومالاشیب یاتدیلار. آنجاق آتا دورنا قوطبون شفقینه باخیب درین فیکره گئتمیشدی. آنا دورنا اؤزون اونا یئتیریب،‌ هئچ نه دئمه‌دن یانیندا دوروب گؤزلرین شفقه زیلله‌دی. نئچه دیقه دینمه‌دن،‌ بیر- بیرینه باخمادان، اوزاقلارا گؤز تیکمیشدیلر. آنا دورنا دیله گلدی:
– سن ده من دوشوننی دوشونورسن؟
آتا دورنا:
– هه. سن اوشاقلار حاقدا سوروشاندا،‌ یاز کؤچونده،‌ اورمو گؤلونون سماسیندا دئدیگین سؤزلر یادیما دوشدو. اوندا من دئدیم: گؤزلنیلمز قادا بالادان قورتارساق،‌ جنوبا قاییدان باش،‌ دؤرد- بئش دورنا اولاجاییق. بو گؤزل گؤلون ساحیلینده هر ایل سایاغی سیر ائدیب دینجه‌لیب،‌ بیر گون سورا کؤچه داوام وئره‌ریک. سن سمادان گؤله باخیب دوروخدون. دئدین: یامان قورخورام. بئله کی بو گؤل قورویور،‌ پاییزا قالاسی دئییل.
آنا دورنانین گؤزلری یاشالدی، دئدی:
– نئچه گوندو بو فیکیر باشیمدان چیخمیر. اوره‌ییمه دامیب کی قاییدان باش او گؤلدن بیر اثر قالمایاجاق. گؤل قوروسا،‌ نئجه اولاجاق ؟ بیزلر تجروبه اوزره سونکی دوشرگه‌یه قده‌ر داوام گتیریب،‌ بیر باشا اوچا بیلریک، آنجاق تزه پروازلانان قوش‌لار او اوزون مسافه‌نی اوچماغا طاقت‌لری اولارمی؟
سحر ائرته‌دن دورنا قاطارلاری،‌ قیی وورا- وورا جنوبا دوغرو کؤچه باشلادیلار. او گون کی آخشام چاغی اورمو گؤلونده قونمالی‌ایدی‌لار. گؤلده آنجاق دوزلو بوغاناق گؤرونوردی. یئنی پروازلانان دورنالارین چوخو، ‌هم ده بعضی طاقتی توکنمیش قوجا دورنالار، دسته‌دن اوزولوب اورموگؤلونه- دوز فیرتیناسینا- دوشوردولر. قانادیندا طاقتی قالان قوش‌لار اوچماغا داوام وئریردیلر. ابدی آیریلیقدان ایدی،‌ هاواداکی دوزدان ایدی،‌ بلکه ده گؤله یئنی حیات وئرمک اوچون،‌ اوچان قوش‌لارین گؤز یاشی دا گؤله یاغیردی. اورموگؤلو، قوش‌لار قبرینه چئوریلمیشدی.
کرج یای ۱۴۰۱

چاپ

دیدگاهتان را بنویسید

نشانی ایمیل شما منتشر نخواهد شد.

قوش‌لار قبری

علی تقی‌زاده لاریجان
www.ishiq.net

آذربایجان ادبیات و اینجه‌صنعت سایتی

قوش‌لار قبری

علی تقی‌زاده لاریجان
www.ishiq.net

آذربایجان ادبیات و اینجه‌صنعت سایتی

قوش‌لار قبری

علی تقی‌زاده لاریجان
www.ishiq.net

آذربایجان ادبیات و اینجه‌صنعت سایتی