سئودا (پووئست) – ۲
چئویرن: نریمان ناظیم
ترجمه: نریمان ناظیم
نریمان ناظیم
00:00
00:00

– آی باجی‌لار، آی ‌ننه‌لر، بو گون هامی‌نین بوینوندا تکلیف وار. هره اؤز پاییندا ایثار ائله‌مه‌لیدیر. چتیندیر بیلیرم، آمما بو ایشین ثاوابی قورتولان دئییل باجیلار. اونا گورا کی سیز اؤز اورک‌لریزدن ایثار ائله‌ییرسیز. سیز اؤز قلب‌لریزی طبق اخلاصه قویوب تقدیم ائله‌ییرسیز. گؤر نه بؤیوک مقامی‌دیر. گؤر نه عظمتلی‌دیر بو مقام!…
فخری‌‌نین هله‌ ده سسی گلیر. حاج اکرم خانیم بیرین ائشیدیر، بیرین ائشیتمیر. بیر لحظه آییخیر، یئنی‌دن اویغو عالمینه دالیر:
– دئییرم آخی حاج اکرم خانیم بیز ایندیه‌جن نئیله‌میشیک کی بوننان بئله نئیله‌یک. باشیمیز قاریشدی اوشاقلارا عؤمور سوووشدو. هئش بیلمه‌دیک هاردان گلدی هارا گئتدی. من اؤزومو دئییرم باجی، باخ او اوروش-نامازی دا دوز- تؤره‌لی یئرینه یئتیره بیلمه‌میشم. بو سرطان سهته‌‌نین قاباغیندا کیم دایانا بیلر آی باشیوا دؤنوم. جار جاوانا رحم ائله‌میر، هاندا قالمیش اولا بیزلره. یوخ باجی بئله اولماز، بیز گره‌ک اؤزوموزه بیر گون آغلییاق. صاباحکی گون نه جاواب وئره‌جه‌ییک؟ اونون بونون سؤزون ساققیز ائله‌دیک سالدیق آغیزیمیزا، چئینه‌دیک بوتون عؤموروموز قئیبته گئشدی. خانیمتاش خانیم رحمته گئد‌ه‌ن گوندن منی فیکیر خیال گؤتوروب، دئییرم آخی بئله بو اللی نئجه ایلده من دالی یانیما نه قویموشام ؟! آغزیما داش تورپاغ، منیم باشیما بیر ایش گلسه الی بوش گئدیب او دونیادا نه دئیه‌جییم من؟
شکوفه خانیمین سؤزو بورا یئتیشنده حاج اکرم خانیمین اوتوردوغو یئر بیر قویو آغیزی کیمی لاپدان آچیلیر، حاج اکرم خانیم گورولتویله قویونون دیبینه دوشور. ظولمت هر یانی بورویوب. اوزاقدا قاپییا بنزر بیر شئی قیزاریر. حاج اکرم خانیم اوزون زامان اولدوغو یئرده کیریییب قالیر. سونرا هانسیسا آدامین دهشتلی باغیرماسیندان یئریندن سیچراییب ایشیغا ساری قاچیر. یاخینلاشدیقجا ایستی شیددتلنیر، ایره‌لی‌له‌دیکجه قیرمانج کیمی اونون اوز – گؤزون اودا چکیر. ساچلاری آلازلانیر. گئری قاییدیقدا غافیلدان باشقا بیر قاپییا توققا گلیر. قاپی اوزونسوو بیر دالانا آچیلیر. دالا‌نین او تای بو تاییندا یوزلرجه قادین آسیلیب: کیمیسی قیچیندان، کیمیسی ساچیندان، کیملری دیلیندن. آسیلانلارین بعضیسی تانیشدی، آمما حاج اکرم خانیم اونلارین آدینی یادینا سالا بیلمیر. بیردن خانیمتاج خانیمی گؤرور. دیلیندن قناری‌یه آسیلیبدی. دیلی یاریم آرشینجا ائشیگه چیخمیشدیر. اونون گؤردوکده، خانیمتاج خانیم ال آیاق چالیب چیرپینیر. حاج اکرم خانیم سوروشور:
– بورا هارادی خانیمتاش، سن نه ائله‌ییبسن؟!
خانیمتاج خانیم جاواب وئره بیلمیر، تکجه آغلاییر. گؤزلریندن یاش یئرینه قان گیله‌لنیر.حاج اکرم خانیم یئنی‌دن سوروشور:
– بورا هارادی، دئ گؤروم سنی نییه آسیبلار؟
خانیمتاج خانیم یئنه ده آغلاییر. بیردن کیمیسی اونون قولوندان یاپیشیب مهریبانجاسینا دئییر:
– او قئیبت ائله‌ییب قیزیم.
حاج اکرم خانیم اوجا بوی بیر قادین گؤرور. یاشیل نورلا هاله‌لنمیش بنیزیندن ایشیق ساچیر. حاج اکرم خانیم اؤرکله‌نیر، دیلی توتار – توتماز سوروشور:
– بس، او بیری‌لر؟ ساچیندان آسیلانلار؟
جاواب ائشیدیر:
– اونلار ساچلارین نامحرمه گؤستریبلر، او بیری‌لری ایسه ارلریندن اجازه‌سیز بیر یئره گئدیبلر.
حاج اکرم خانیم تیر- تیر اسه‌رک اینله‌ییر:
– بس من؟ منی نئیلییه‌جک‌سیز؟
نورانی قادین: «ایندیدن بیلینمز، هله سنین واختینا قالیر»- دئیه، بیر قاپینی آچیر اونو ائشیگه بوراخیر. حاج اکرم خانیمین گؤزلری قاماشیر. یاواش یاواش اؤزون تاپیر. هند‌ه‌وره باخیر، تانیشدی. سئچیر. اؤز مسجدلری‌دی، امامزادا مسجدی‌نین حیطی‌دی. شیخ مفیدین سسی بلندگودان یاییلیر. او اینجارسیز حالدا دووارین دیبینده اوتورور. سس ائشیدیلیر:
– آنالار، باجیلار، ارسیز قالانلارین سایی – حسابی یوخدور. یئتیم اوشاقلار آتا ایسته‌ییرلر. ایثار ائلمه‌لی گوندور. ایمکانی اولانلار بونلاری قانادلاری‌نین آلتینا چکسین‌لر. آغالاریزی تشویق ائله‌یین بو خئیر ایشه قول قویسونلار. راضی اولمایین جاوان باجیلاریمیز بی‌صاحاب قالسینلار. روا بیلمئیک بیر پارا مسائلی خدای نخواسته جامعه‌ده وجوده گله کی صاباحکی گون قیامتده جوابگو اولا بیلمه‌یک…
حاج اکرم خانیم یئنه ده ائوده‌دی. شکوفه خانیم اوتوردوغو یئرده اوتوروب هله ده دانیشیر:
– گینه ده واللاه آلله شیخ مفیدین آتاسینا رحمت ائله‌سین. اقللیکم بیزه بیر قاچاق یولو قویورو. ایسراغی گون زیور خانیما دئییردیم، دئییردیم گلین هامیلیغان تصمیم توتاخ ارلریمیزه دئیک گئتسین‌لر آداما بیرین آلسین‌لار. باخ بیری من واللاهی سیزدن بئلیم باغلی اولسا لاپ گونو صاباح حاج احمدینن دانیشارام. قیز ایندی کیمده دای ار نازی چکمه‌یه حوصله قالیب. قوی گئتسین‌لر بلکه باشلاری قاریشا اؤزلرینه، بیز ده قول قیچیمیزی اوزاداق بیر راحات نفس چکک آخی!
شکوفه خانیم یاواش- یاواش دومانا بورونوب یوخا چیخیر، آمما «بیر راحات نفس چکک!» جومله‌سی هرله‌نیر، هرله‌نیر دؤنه – دؤنه گئدیب در- دووارا ده‌ییب حاج اکرم خانیمین قولاغینا قاییدیر…

قاپی‌نین او اوزونده باجیلار هله ده دانیشیرلار. حاج اکرم خانیم فخری‌نین سؤزلرین سئچیر:
– آنجاق گون او گون اولدو کی فروغ ایلا قاسیم آغا گئتدیلر «شمسی»نی گتیردیلر. بیر ایکی هفته ائله بیر سؤز سوو یوخ‌ایدی. بیزده چوخ آز گیت گل ائدیردیک. آمما یاواش یاواش آبا‌نین عوالمی ده‌ییشیلدی. ایندی آرالاریندا نه گئچمیشدی بیلمیرم آنجاق…. ائله آرواد…. سسین چیخارت….هئچ اوولدن…. ائو…. قاسیم آغا…….
گئتدیکجه فخری‌نین سؤزلری حاج اکرم خانیمین عالمیندن آرا آچیر، سؤزلر سئیره‌لیر، بیری ائشیدیلیر، بیری ائشیدیلمیر. یئنی‌دن اویغویا دالیر. بو دؤنه اؤزون مطبخده گؤرور، لپه آریدیر. هیرسی باغیرساغین کسیر:
– آخی هرشیین بیر حددی وار. یوخو اولار بیر ساعات، ایکی ساعات. ناهاری تیخیب یاتیبلار. باخ اورا سنی الله، گون باتیر ها! به بو کیشی دوکانا گئتمه‌یه‌جک؟…
باشینی یوخاری قووزویاندا گؤرور شکوفه خانیم قاپی‌نین آغیزیندا دایانیب. دیکسینیر. سوروشور:
– شکوفه خانیم سن هایاننان گلدین؟!
شکوفه خانیم گولور. آغیزیندا هئچ بیر دیشی یوخدور. گؤزلری آلاجا – بیلاجا چالیر. آنایین بیر آدامدیر سانکی. یوخ، «بو شکوفه دئییل» – دوشونه‌رک سوروشور:
– سن کیمسن، هاردان گلدین بورا؟
آرواد یئنی‌دن گولور:
– بوشلا بو سؤزلری آی بیناوا بدبخت! دور آیاغا، دور گیت اوسته، گؤر اوردا نه خبردی؟ دور!
آرواد قاپی‌نین قاباغیندان چکیلیر. حاج اکرم خانیم لپه خونچاسین یئره قویوب قالخیر. قاپی‌نین او تای بو تایینا باخیر، آروادی گؤرمور. حیطه چیخیر. آرواد یوخ اولوب. اوره‌یی دؤیونمه‌یه باشلاییر. رنگی قاچیر. حیط قاپیسینا گلیر. قاپی باغلیدیر. دالاندا اوست اوتاغین پیلله‌سی‌نین قاباغیندا بیر نئچه لحظه دوروخور. یئنی‌دن آروادین سسین ائشیدیر:
– چیخ اوسته. چیخ گؤر نه ائلیرلر؟
بو سسین اؤز سسینه اوخشارلیغیندان شاشیر:
– قیز من اؤز اؤزومه دانیشیرام؟!
سس گلیر:
– سفئه دانیشما آرواد، چیخ اوسته دئدیم. چیخ! اورا باخ! یئنه دایاندی ها! ای آوارا کولباش!
اوول پیلله‌نی چیخیر. دوروخور سس گلیر:
– نه‌یه دوردون بس؟
یئنه ده بیر پیلله چیخیر. اوره‌یی چیرپینیر. بارماغی اوسته یئریییر. هر پیلله‌نی چیخدیقجا دایانیر قولاق آسیر. او تای بو تایا باخیر. هله بئش آلتی پیلله قالیر. اوره‌یی‌نین دؤیونتوسونو ائشیدیر. قورخو جا‌نینا چؤکور. ایسته‌ییر قاییتسین. بارماغین دیشی‌نین آراسینا آلیب سیخیر. آرخاسین دووارا سؤیکه‌ییب توختاقلیق دیله‌ییر. بیر ایکی پیلله ده چیخیر اوسته. اوچ پیلله قالیر. دیزه چؤکور. دیرسه‌یین آخیرینجی پیلله‌یه سؤیکه‌ییر. اینجارسیز حالدا دایانیب قالیر. اوره‌یی کؤکسونده چابالاییر. دؤشونو پیلله‌‌نین تینینه سیخدیقدا باشینی قول‌لاری‌نین اوستونه قویوب نفسین اوغورلاییر. اوتاغدان خیسین – خیسین سسلر گلیر. شمسی‌‌نین نارین – نارین گولوش سسی کسیلمیر. هنیرتی ایچینده حاجی‌‌نین بوغوق سسی هردن بیر ائشیدیلیر. حاج اکرم خانیم وحشتله بویانمیش نیفرته قاپانیر. بیر لحظه قاپینی آچیب ایچری گیرمک ایسته‌ییر. شمسی‌‌نین یولوناجاق کیلکه‌سینی جایناقلاریندا حیس ائله‌ییر. قجیردیغی دیشلری‌نین آراسیندا چئینه‌نه‌جک اتین دادین دویور. آغیزینا دولاجاق قا‌نین شورلوغون تامسینیر،… کیمیسی‌نین تنگه ده سسله‌نن سسی‌ایله در حال قاییدیب سورعتله پیلله‌لری یئنیر. آرخاسینجا اوتاغین قاپیسی‌نین آچیلماسین حیس ائله‌ییر:
– ده‌دم وای گؤردولر منی. حاجی‌‌نین اؤزویدی، گؤردو. ائویم یئخیلدی منیم. وای!
دوشونه – دوشونه حیط قاپیسینی آچیب تنگه‌یه قاچیر. تنگه‌ده کیمسه گؤزه گؤرونمور. نئچه دقیقه اوتای بوتایا قاچیر. نئیله‌دیگینی بیلمیر. بیردن باش آچیقلیغینی دویور. چادیراسین گؤتورمگه یئنی‌دن ائوه قاییدیر. ایچری گیرجک تعجب‌دن گؤزلری بویویور: حیط آدامدان قیمبیلداییر. حاج اکرم خانیما یول آچیرلار. کئچیر گئدیرحیطین اورتاسیندا دایانیر. وحشتدن بؤیوموش گؤزلریله اونو دؤره‌له‌ین جماعته باخیر. باخیشلاردان یاغان نیفرت اوخو اوره‌یینه سانجیلیر. هامی تانیشدی: قوهوم- قونشو، ائل – فامیل. بیردن بیره فروغ شیهه چکه‌رک جماعتی یاریب اونا ساری شیغاییر:
– اؤلدوردون آتامی نااینصاف،… دیغلاتدین آاجانی،… دیغلاتدین
حاج اکرم خانیم مطبخه ساری قاچیر، بدری اوردا اؤزون بوداماقدادیر. اوز – گؤزون دیدیب داغیدیب، ساچلارین یولوق – یولوق یولوب خرمن ائله‌ییر.گئری قاییدیر. تنگه‌یه ساری قاچیر. دالاندا میر آغایلا اوزلشیر. نئچه نفرایله بیرلیکده حاجی‌نین جنازه‌سین پیلله‌دن آشاغی گتیریردی. میرآغا اوندان اؤز چئویریر. جنازه‌‌نین آردینجا گئد‌ه‌ن فخری مزمت ائدیجی باخیشیلا اون سوزور، بیر سؤز دئمه‌دن سوووشوب گئدیر. جنازه‌نی آمبولانسا قویورلار. مینن مینیر، یئرده قالان ایسه باشقا ماشینلاریلا یولا دوشوب آمبولانسین دالیجا گئدیرلر. حاج اکرم خانیم آغلایا – آغلایا آمبولانسین دالینجا قاچیر، اونا یئتیشه بیلمیر. کیمسه اونو ماشینینا میندیرمیر. هانسی ماشینا مینمک ایسته‌ییر، اونو نیفرتله دالا ایته‌له‌ییب یولا دوشورلر. حاج اکرم خانیم ساچلارینی یولا- یولا ائوه قاییدیر. ائوده کیمسه قالماییب. او چادیراسی‌نین دالینجا ائوی گزیر. آلت اوتاغا گیرجک اورادا شمسی‌‌ایله قاسیمی قول – بویون گؤرور. نیفرتدن شیهه چکیب اونلارا ساری یوگورور.

ایکی باجی آنالاری‌نین باغیرتیسی‌لا یئرلریندن سیچیرایب اؤزلرین حاج اکرم خانیما یئتیریرلر. حاج اکرم خانیمین وحشتدن بؤیوموش گؤزلری تای با تای اولوب تاوانا دیرنمیشدی. فخری آناسین سیلکه‌له‌ییب دیکلدیر؛ میتککه‌یه سؤکه‌ییر. بدری آباسی‌نین بوینون قوجاقلاییب آغلاییر، گؤزلریندن یاش آخیداراق اونون آلنیندا مینجیقلانان تری لئچگی‌نین اوجوایلا سیلیر. فخری قاچیر بیر کاسا سرین سو گتیریر. بیر آزین اونا ایچیردیر، قالمیشین اونون اوزونه چیله‌ییر. الین آناسی‌نین آلنینا قویوب سوروشور:
– یوخو گؤردون آبا؟
جاواب گؤزله‌مه‌دن تواراخ گئدیر بیر له‌ین سوایلا بیر دسمال گتیریر. دسمالی ایسلادیب آناسی‌نین آلنینا قویور. سونرا آیاقلارینی له‌ینده یویور. هاچاندان هاچانا حاج اکرم خانیم اؤزونه گلیر. قیزدیرماسی واملاییر. قیزلارین سورغو سوآلینا جاواب وئرمه‌دن یورغانی باشینا چکیر. قیزلار چیراغی سؤندوروب یئرلرینه قاییدیرلار. بدری سوروشور:
– گؤره‌سن نییه اوجور چیغیردی آبا، حتمن یوخو گؤردو، هه…؟
فخری آه چکه‌رک جاواب ویریر:
حتمن دآا، او کی قاباغیدی، قارا یولا هر گون یوخو گؤروردو. اؤزو ده لاپ او یاخشیلاریننان!. ایندی ده کی قارا باسیر. ائله او یوخولارین دا گودازینا گلدی. بیلمیسن نه مسخره‌ایدی. آدام اوتانیر دئیه. خانیم یوخو گؤورورموش بهشتده گلین چیخیر. اؤزوم اؤز قولاغیملا ائشیتدیم. جیجی – باجیلارین ییغمیشدی باشینا تعریفله‌ییردی. اولارینداکی آغیزی‌نین سویو آخیردی. کئشگه بوردا اولایدین، صحبتلرین ائشیدئیدین. آدامین هم گولمه‌یی گلیردی هم ده آغلاماغی.
****
کئچن آیین اوزونو حاجی میر غافارین عایله‌سی‌نین بوتون واختی داوا -شاوادا سووولوب. حاج اکرم خانیم ایکی آیاغین بیر باشماغا سوخوب، «یا من، یا شمسی»- دئییر. حاجی میر غافار ایسه دایاندیغی یئرده دوروب دیره‌نیر. بیر قاریش دا گئری چکیلمه‌یه حاضیر دئییل. سؤز- سوو ائودن ائشیگه سیزیب قوهوم- قونشویا یاییلیب، هامینی پیچا – پیچا سالیب. حاج اکرم خانیم هامیدان اومودون کسیب، قورشاغی محکم باغلاییب، تک‌لیگینده یوروشه گیریبدیر. تکی بیر یول اوغلو میرآغانی چاغیرتدیریب، اونون بوشانماسینی اونا تکلیف ائله‌ییبدیر. نهایت اونون دلیل- دلاییلینه، یالوار- یاخارینا باخمادان اؤزو چادیرا باشماق اولوب، گئدیب دادگاها عریضه وئریبدیر. ایندی دادگاهدان حاجی میر غافارا احضاریه‌‌نین یولانماسی عایله‌ده گرگینلیک یارادیب، هامینی ال – آیاغا سالیبدیر. بو گئجه میرآغا حاجی میر غافاری و اونون قیزلارین، کوره‌کن‌لرین و حاج اکرم خانیمین بویوک قارداشی حاج مؤحسون آغانی اؤز ائوینه چاغیریب بلکه بو مسئله‌یه بیر یوللوق سون قویولا. حاجی میر غافارا پیچاق ویرسان قانی چیخماز. طنه‌بی‌نین یوخاری باشیندا اوتوروب سیگاری سیگارا قوشور. حاجی مؤحسون آغا اوتانقاج گؤرکم‌له باشین یئره دیکیب تسبیح چئویریر. اونون آق ساققالی سؤزون باشلانیشین اونا تکلیف ائله‌ییر. آمما او دا بیلمیر نه دئسین، هاردان باشلاسین. نیگرانلیق ییغیناغا کؤلگه سالیبدی. میرآغا گؤز آلتی حاجی مؤحسونه باخیر. نهایت حاجی مؤحسون سؤزه باشلاییر:
– آتمیش نئچه ایل عؤمور سورندن سونرا آدام بیر ایشلره راست گلیر کی اوشاق کیمی نئنیم نئجه ائله‌ییمه دوشور.گیجه‌لیر. بیلمیر نئیله‌سین. ایشی نه ته‌هر یئرینه قویسون؟ ایندی بو قضیه ده کی بیز گرفتار اولموشوق ائله بئله بیر شئی‌دی. نه قدر چالیشیرام اینانا بیلمیرم اکرم گئده دادگاها عریضه وئره. آخی بئله ده بیرایش اولاندی مه‌یر؟! میر آغایا دئدیم، دئدیم میرآغا منی بو ایشدن معذور ائله، منیم او کیشی‌‌نین یا‌نینا گئتمه‌یه اوزوم یوخدو. آمما نئینیم کی میرآغا‌نین اوزونن چیخا بیلمه‌دیم. یوخسا من حاجی میر غافار آغییا نه سؤزوم وار دئیم. واللاه اوتانیرام. آخی آدام دردین کیمه دئسین جانیم. بیرده‌لی بیر داش سالار قویویا، یوز عاغیللی اونو چیخاردانماز مثلی‌دی. واللاه ده‌لی اولوب هوشو آزیب بو آروادین.. سحر چاغی میرآغایلا گئتمیشیک گؤرموشوک بابا بیر آیری عالمده‌دی بو. هاداران – پاداران دانیشیر. بوردا اؤزگه آدام یوخدور، اوتورون عاغیل عاغیلا وئرک گؤرک کی نئیله‌مه‌لییک. بایاخ میرآغایا دئییردیم، دئدیم واللاه هئش کیمین الیندن بیر ایش گلمز ایللا خود حاجی میر غافارآغا. بیرراه حل اولورسا اگر، او دا اونون اؤز الینده‌دی. اؤزو اؤز بؤیوکلویونه باغیشلییا، قضیه‌نی بیر یانلیق ائلییه قورتارا گئده. بیر نئچه خانواه‌‌نین آبیرین ساتین آلا.
حاجی میرغافار بیرنئچه لحظه دینمز- دانیشماز دایانیر، سونرا دئییر:
– او کی بویورورسوز او ده‌لی‌دی، او جور دئییل، او بیزیم هامیمیزدان عاغیللی‌دی. آمما شئبئه بزه‌مه‌سین دئسن، بعلی اوندا اوستاددی. اونو من تانیرام. یئددی تولکونو آپارار چایین باشیندا دولاندیریب قایتارار، بیرینه بیر قورتوم سو وئرمز. او ائله‌دی. آمما ایندی گلدی یئتیشدی راه حل‌له. راه حل ساده‌دی. دئییر بوشانیرام؟ گئدیب عریضه وئریب؟ اولسون. حاضیرام بوشویام.، آمما بوردا یوخ، آیری بیر شه‌هرده. گئدک آیری بیر شه‌هرده ایشی قورتاراخ قئییداخ. ائو – ائشیک، بوتون وسایل‌لر ده اونون. گلسین اوتورسون زندگانلیغین ائله‌سین. ائله بیلسین کی من اؤلموشم. بئله ائله‌سک آبیریمیز دا قالار کیسه‌میزده. یا خئیر یئنه شئبئه بزه‌مه‌دی، او آیری مسئله‌دی
حاجی میرغافارین سؤزلریندن هامی سوسوب کیریییر. حاجی مؤحسون‌آغا باشین یئره دیکه‌رک جیبیندن پاپیریز قوطوسون چیخاردیب بیر سیگار آلیشدیریر. میرآغا‌نین سوروجو باخیشی اوتاقدا اولانلاری بیر به بیر گزیر، آمما گؤزلرین یئره دیکیلدیگیندن هئچ بیر باخیشلا توشلاشمیر. او بو تکلیفین آغیرلیغینی اؤز بویونوندا حیس ائله‌دیکدن آتاسینا خطابن دئییر:
– معلوم ائلییه‌نی سیز بو برنامه‌‌نین اوستونده چوخداندی فیکیرلشمیسیز. آمما او جور ده کی بویورورسوز مسئله او قده‌ر ده ساده دئییل. سیز آبانی تک گؤرمه‌ییز حاج‌آغا. اونون دؤره‌سینده آزی ییرمی نفر آدام وار. اونلاردان نئچه‌سی بوردا اوتوروب؛ اوننان چوخو دا ائشیکده وار. فرض بویورون سیز آبانی آپاردیز بیر آیری شه‌هرده بوشادیز، بس بونلاری نئیلییه‌‌جکسیز؟ بونلاری دا بوشییاجاقسیز؟
– سن نه دانیشیرسان میرآغا؟ سن منی تهدید ائدیرسن؟
– جسارت اولماسین حاج آغا. منیم ائله قصدیم یوخدور. فقط خواهیشیم بودور آرتیخراخ فکیرله‌شین! آبانی بوشاماق بو ساده‌لییه دئییل.
– من کی بوشاماق ایسته‌میردیم، او گئدیب دادگاه‌ها عریضه وئریب.
– هئچ او دا بوشانماق ایسته‌میر. از بس کی بویوروبسوز شمسی‌نی بوشاسام بو شه‌هرده آبیریم گئدر. او دئییر بلکه اونو دا آبیریزا گؤره بوشویا بیلمه‌یه‌جکسیز.
– معلوم‌دی کی من آبیریما سیخیلمیشام. بس نه اوچون دئییرم گئدک باشقا بیر یئرده ایشی قورتاراخ. ائو – ائشیگی ده ترپنمه‌سین. قاییدسین گلسین اوتورسون ائوینده. کیم نه بیلر بیز آیریلمیشیق؟
– اگر آبیر مسئله‌سی بو ساده‌لییه حل اولاندی بس نه اوچون بو ایشی شمسی خانیمین موردینده گؤرمورسوز؟ اونو بوشویون. اوتوردوغو آپارتمانی دا وئرین اوتورسون. بورالی دئییل، ایسته‌سه ساتسین‌ ییغیشدیریب گئتسین اؤز یورت یوواسینا.
حاجی میرغافارین رنگی بوغولور. مصنوعی دیشلر آغیزیندا چیققیلاشیر. گوجو ایله یئریندن اوینامیش دیشلری آغیزیندا یئر به یئر ائله‌ییب دئییر:
– اوولان سن منی اؤلمه‌میش قویلادون. عصا الیمنن دوشمه‌میش سن منه تکلیف تعیین ائدیرسن؟ ائله دئییل، نه قده‌ر کی من وارام او دا وار. من اؤلندن سورا دا کبین هشتی یکین آلار گئدر. لازیم دئییل سن منه عاغیل قویاسان! باشا دوشدون!
– من سیزه تکلیف تعیین ائلییه بیلمه‌رم حاج آغا. چونکو بو ائوده من بیر قارا قولام. قاباقدا بیلمه‌سئیدیم ایندی بیلدیم بونو. اشتباه منن‌ایدی که درسیمی بوراخیب گلدیم اوتوردوم دوکاندا. عؤمرومو وئردیم هده‌ره. نتیجه‌سی بو اولدو کی منیم گؤزومون قاباغیندا یاپیشاسان آنامین قولیندان قویاسان ائشیگه. لابود دئییرسیز نئیلییه‌جک، هارا گئده‌جک، هاراسی وار گئده. آمما اشتباه ائلیرسیز حاج‌آغا. من بو شه‌هرده سیزین گؤزوزون قاباغیندا فهله‌لیک ائله‌رم، آمما بئقئیرتلیک چؤره‌یین یئمه‌رم. بو ائویز او دا دوکانوز. بیر آروادیم، اوچ اوشاغیمی گؤتوروب گئده‌رم. سیز ده آبا‌نین ایشینی قورتارین اؤتوروز گلسین. لابود منیم ائویمده بیر تیکه چؤره‌ک تاپیلار او یئیه. آمما بوشاما ایشی گره‌ک ائله بو شه‌هرده اولا، آیری یئرده اولا بیلمز، والسلام.

(ایکینجی حصه‌نین سونو)

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: 8 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

سئودا (پووئست) – ۲

نریمان ناظیم
www.ishiq.net

آذربایجان ادبیات و اینجه‌صنعت سایتی

سئودا (پووئست) – ۲

نریمان ناظیم
www.ishiq.net

آذربایجان ادبیات و اینجه‌صنعت سایتی