اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: نریمان ناظیم
ترجمه: نریمان ناظیم
نریمان ناظیم
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.


غوربت
نریمان ناظیم

نهایت کیشی سینسیییر:

– یوخ، دئیه‌سن بو گئنه ده قویمایاجاق بیز یاتاخ … ائلی … ائلی …، ائلدار، اده آز دانیش آخی!

ائلی یوخودان سیچراییر. دورور یئرینده اوتورور، گؤزلرین اوووشدورور.

– گئنه ده یوخو گؤردون؟

ائلی جاواب وئرمه‌دن گؤزلرین میلیونلار چیراغین ایشیغی ایله یانان نهنگ شهره زیلله‌ییر.

یایین اوغلان چاغی‌دی. هوندور بیر تیکینتی‌نین هله باشا چاتمامیش مرتبه‌لری‌نین بیرینده یئرلشیر قالیرلار. کیشی ده دورور اوتورور. بیر پاپریز آلیشدیریب، سوروشور:

– دئمه‌دین نه یوخوسو گؤردون؟

– نه گؤره‌جه‌یم، هر گئجه گؤردویومو!- دئیه ائلی توما گئدیر. قوزئی‌دن یوموشاق بیر کولک اسیر، قاپی- پنجره‌سیز ائوده دولاشیر، اونون بویون- بوغازین اوخشاییر.

– دئییرم اژدر عمی، گؤره‌سن او گولدسته‌نین باشیندان بیزیم کندیمیز گؤرسه‌نر؟

– او گولدسته دئییل اوغول، اونا بورج دئییرلر، گویا قیرخ تاباغا ایشله‌نه‌جک.

– یاخچی، اولسون، بورج اولسون، اونون باشیندان کند گؤرسه‌نر؟

– اوغلان هئش گؤر آغیلا سیغان‌دی، بوردان کنده یوز آغاج یولدو، بلکه ده چوخ!

ائلی سوسور، گؤزلری بورجا دیکیلی قالیر.

قیزمار گونش شاخیر. اوستا اژدر توخونموش آلماتورلاری سوتون‌لارین اوستونه یاراشدیریر. ائلدارین اؤزو بورادادیرسا، باخیشی بورجون باشیندا گزیر، الین ایشدن چکیر سوروشور:

– دئییرم اژدر عمی، گؤره‌سن، او بورجدا آلماتور ایشی ده وار؟

اوستا اژدر آجییـیر:

– هله سن بیر دوغدوغونو بؤیوت، بورانین ایشین قورتاردین قالدی اورا؟ گون‌اورتا اولدو، بیر ال دبه‌رت آخی! گئنه نه اولدو، کورکووه بیره دوشدو؟!

ائلی بیر سؤز دئمه‌دن ایشه قوشولور. آمما بورجا چیخماق فیکیری ذئهنین چولقالایـیبدیر. دئمک، او اؤزونده دئییل، بونا گؤره ده هاچان قانادلانیب، هاچان بورجون باشینا قونماسینی اؤزو ده بیلمه‌ییر: بویلانـیر … بویلانیر، تاپیر … اؤزودو. نازلی‌دی … حسن‌بولاغی‌نین اوستونده‌کی گدیکده دایانیب، کوزه چیینینده، اللرینی گؤزونه کؤلگه‌لیک ائله‌ییر. کند یولو اوزونو باخیر … هه، اؤزودو، نازلی‌دی، یاپبا یاپیر، … اؤزودو، کرمه کسیر، تؤوله چیخاردیر، … اؤزودو حیط سوپورور، سئشمه چالغی‌لایـیر. اؤزودو … اؤزودو. ائلی کیمسه‌نی گؤرمور، هئچ نه ائشیتمیر، یالنیز: «آمان‌دی گؤ، گؤزله!!» سؤزونو ائشیدیر، بیر ده سون لحظه‌ده اوستا اژدرین وای سسینی…

ائلی بایغین دوشوب سایـیقلایـیر: «ننه، … آی ننه، ننه، آی ننه، نازلی …یازیق، یازیق نازلی، نه اوچون اینجیدیرسن … نازلی، نه اوچون، آنا دئییل‌سن، بو قیزلاریوی گتیررم … قویمام، گلین‌دی … کنیزدی … نازلی … آنا، منزیل توتارام، منزیل، منزیل … قویمام. آپارارام سنی. تهرانا گه…».

گؤزلری آچیلیر، یاخشی گؤره بیلمیر و آلاجالانیر. گاه بوز، گاهدان آغ گئییمده گؤرونن بیر قادین بیله‌ییندن یاپیشیب ساخلایـیبدی. باشی‎نین اوستوندن بیر توربا آسلانیب، اژدر عمی‌ یانیندا دایانیبدیر. قورویوب قایساقلانمیش دوداقلاری ترپه‌شیر، نه دئیه‌جه‌یی بللی اولمور. هاچاندان- هاچانا سسی آیدینلاشیر: «اژدر عمی بورا هارادیر، منه نه اولوب؟»

اوستا اژدر ائلی‌نین آلنینا تؤکولموش ساچینی بارماقلاریلا دارایـیب یئرینه قایتاریر: «ائله بیر شئی دئییل، اوغلوم … ائله بیر شئی دئییل، نیگران اولما!

آغ گئییملی قادین «شوکور آللاها، هوشا گلدی» دئیه الینده‌کی سورنگی، سوروم کیسه‌سینه بوشلادیر، گئدیر. ائلی یازیق- یازیق اوستا اژدره باخیر، اوزون زاماندان سونرا سوروشور:

– بس قیشلاریم نییه بو جور آغیردیر؟

اوستا اژدر دئییر:

– گجه سالیبلار ….

ائلی گؤزلرین یومور، یئنه ده هوشدان گئدیر.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *