ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری


اوچوش نغمه‌سی
هریزلی

 بیرجوت ساری کؤینک، بیر قفس، دن قابی، سو قابی و بیر آزدا دن آلیب اونلاری نئجه ساخلاماغی سوروشدوم. قوش ساتان کامپیوتئرینی ایشله‌دیب، بیر صحیفه پرنت آلیب، جیب تلفونونون نومره‌سین ایاغینا یازیب، منه وئردی.

اونونلا ساغوللاشدیم. سئویندیگیمدن اؤزومو ایتیرمیشدیم. آخی ان اوشاق چاغلاریمدان اوره‌ییمده دویونله‌نیب قالان حسرتلرین بیرینه سون قویموشدوم. ائوه نئجه چاتدیغیم یادیما گلمیردی. کاغیذا باخیب ائوین ان ایشیقلی یئرینده قفسی دوواردان آسدیم. قوشلاردان بیر آن‌دا گؤز گؤتورمک اولموردو.

بیر هفته چکمه دی قوشلارلا اؤنسویت قوروب، دیل‌لرین اؤیرندیم.

بایرام آیی قوشلارین حال- هاواسین باشقا جور حس ائله‌دیم. کاغیذ دا بو باره ده هئچ نه یازمامیشدی. زنگ ائله‌دیم، سوروشدوم.

–          یووا قورماق ایسته‌ییرلر، بیر آز پامبیق قوی قفسین ایچینه، دئدی.

پامبیق‌دان بیر اینجه یووا قوردولار. مایا قوش یاتیب یومورتادی. یومورتالارین اوستونده یاتیب، ایکی کؤرپه‌جیک بالا چیخارتدیلار.

یازین ایکینجی آیی ایدی. هریان گول چیچه‌یه بورونموشدو. باهارین طراوتی، یومشاق و تمیز هاواسی جییرلری سیغاللاییردی. قفسی باغچایا آپارماق، چیچک آچمیش اریک آغاجیندان آسلاماق قرارینا گلدیم. حیوانلار باهاردان آزدا اولسا قوی پایلارین آلسینلار دئدیم.

ایچیمده بیر چکیش-برکیش کئچیردی. قفسین قاپی‌سین آچیم می؟ آچماییم می؟

بیر آز دوشوندوم. دن‌لری،سولاری، یووالاری، بالالاری، بونلاری بوراخیب هارایا گئده بیلرلر. نهایت بیر آز دولانارلار قول قانادلاری آچیلار.

قاپینی آچدیقدا، اه که قوشلار چیخیب آغاجین چارپاز بوداغینا قوندولار.

ساری کؤینک‌لر اوخوماغا باشلادیلار. بو نغمه‌لر قفسده کی نغمه‌لرله فرق‌له‌نیردی. اوره‌ییمدن بیر اوشوتمه کئچدی. پئشمان اولسایدیم دا، داها ایش- ایشدن کئچمیشدی.

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *