سندلی فیلم‌لر رئژئسوری «بابک شیرین‌صفت»له دانیشیق
ادبیات سئونلر: ویدا حشمتی – تقی قیصری
س. بابک معلّم! حیاتینیز و پئشه‌کار بیوگرافی‌نیز؟
ج. ۱۹۷۰-جی ایلده ایرانین اردبیل شهرینده آنادان اولموشام، اما حیاتیمین بؤیوک حیصّه‌سینی تهراندا یاشامیشام. اوخودوغوم ساحه‌لر سینما، کولتورال استودیئز، اینجه‌صنعت، فلسفه و تاریخی فیلیم‌لردن بیر نئچه‌سی.
شعری که زندگی‌ست( سندلی فیلم ۱۹۹۹. ۲۷. دقیقه ایران)
عاشیقین دیلی(قیسا متراژلی فیلم) یؤنتمن و سئناریو مؤلّفی (۲۰۰۰). ۲۶ دقیقه ایران
قیلانیلمیش قیلینج(سندلی فیلم) یؤنتمن و سئناریو مؤلّفی (۲۰۰۲). ۱۵ دقیقه. ایران
صیفیر ساعاتی‌نین قاتاری(سندلی فیلم) یؤنتمن و سئناریو مؤلّفی (۲۰۰۴). ۳۹ دقیقه ایران
همچون کوچه‌ای بی انتها(سندلی فیلم) یؤنتمن و رئداکته‌سی (۲۰۰۵). ۲۶ دقیقه. ایران
راآمی(اوزون متراژلی فیلم) یؤنتمن و سئناریو مؤلّفی (۲۰۰۶). ۳۵ دقیقه ایران
(آلالییا فیلم)- آذربایجان جمهوریتی(آذربایجان فیلم)
یوغ (سندلی فیلم) یؤنتمن و ائدیت (۲۰۰۸). ۴۵ دقیقه آذربایجان رئسپوبلیکاسی (اوبا فیلم)
راه رفتن روی پل (اوزون متراژلی فیلم) پرودوسئر، یؤنتمن و سئناریو مؤلّفی (۲۰۱۰). ۷۲ دقیقه ایران (اوبا فیلم)
ساری کند (اوزون متراژلی فیلم) (یؤنتمن، مهدی پریزاد) پرودوسئر و مونتاژ بابک شیرین‌صفت (۲۰۱۱). ۷۶ دقیقه ایران
چینارلا من (سندلی فیلم)- یؤنتمن و رئداکتە (۲۰۱۲) ۴۵ دقیقە آذربایجان جمهوریّتی
چاغیل نفسی (درام سریالی) – یؤنتمن – ۲۰۱۳-۱۴ (۲۴ اپیزود – آذربایجان و تورکیه) (ATV-کانالی)
جومه (سندلی تئله‌سریال) – یؤنتمن (۲۰۱۴). ۳ اپیزود – آذربایجان و روسیه و ایران (Cine Alliance Production)
نابات (اوزون متراژلی فیلم) – یؤنتمن: ائلچین موسا اوغلو – مونتاژ: بابک شیرین‌صفت (۲۰۱۴). ۱۰۵ دقیقه آذربایجان
اوچونجو گونون آدامی (اوزون متراژلی فیلم)- یؤنتمن (۲۰۱۷). ۱۰۴ دقیقه آذربایجان جمهوریّتی
تایسون (اوزون متراژلی فیلم) – یؤنتمن و مونتاژ (۲۰۱۸). ۸۰ دقیقه
سئوگی قالاسی (اوزون متراژلی فیلم) – یؤنتمن: ائلهام قاسیموف- پروډیوسئر و مونتاژ: بابک شیرین‌صفت
(۲۰۲۰). ۸۹ دقیقه ایران و آذربایجان جمهوریّتی
OCAQ-تریلوژیا
واهمه‌های بی‌نام و نشان (سندلی اوزون متراژلی فیلم) – پروډیوسئر، یؤنتمن و سئناری مؤلفی – (۲۰۲۰–۲۰۲۳). ۹۸ دقیقه – ایران – ایتالیا – آذربایجان – تورکیه – هندوستان – گۆرجیستان – روسیه – فرانسە(Oba فیلم)
به همین سادگی (سندلی اوزون متراژلی فیلم)- پروډیوسئر، یؤنتمن و سئناری مؤلفی – (۲۰۲۴ ). ۸۴ دقیقه آذربایجان – تورکیه – هندوستان
غلامحسین ساعدی‌نین «جانشین» تماشاسی‌نین تورک دیلینه ترجمەسی – نشریات: قوبوستان یایینچیلیق – تورکیه (۲۰۲۴)
س. ماراغینیز بو قونویا یعنی آنتروپولوژیا هاردان یا نه‌دن باشلاندی؟
ج. من آنتروپولوژیا (مطالعات فرهنگی) استقامت‌دن باخماق لازم بیلیرم و دئمک اولار کی ۱۳۷۹(۱۹۹۹) ایلده حافظ خیاوی ایله دیل و دوشونجه باره‌ده دانیشیغیمیز‌دان، باشلادیغینی تخمین ائده بیله‌رم. اوندا حافظ‌له بونو دانیشیریدیق کی، اگر دیل همان دوشونجه‌دیرسه، بیز اؤز تورکجه‌میز‌ده فیلم‌لر ایشلمک، دوشونجه‌میزی گئنیش‌لندیریب، چاغداش حیاتا انتقرا اولماغا شرایط یاراداق.
س. شامانیزم زامان سوره‌سین‌ده و جغرافیا اؤلچوسون‌ده هاردان هارا یئرلشیر؟
ج. شامانیزم بیر دین دئییل، دین‌دن اوْنجه‌کی اینانج‌لارین و انسانین طبیعی وضعیّته مداخله ائتمک احتیاجی‌نین بیرلشمه‌سی‌دیر. انسانین اؤز تقدیرینه بو مداخله‌سی بعضا مختلف علم‌لر شکلینده اؤزونو گؤستریر و قدیم فورمادا شامانیزم کیمی مختلف اینانج نوع‌لرینین یارانماسینا سبب اولور. بونا گؤره ده چوخ گئنیش جغرافی عرضینی احاطه ائدیر.
س. ایندی‌کی عصرده بو قونویا ال قویماغین ضرورتی نه‌دیر؟
ج. کولترال استودایز (مطالعات فرهنگی) بیر علم اولاراق انسان حادثه‌لرینه تنقیدی و آنالیتیک یاناشمایا مالیک‌دیر و بو، موجود وضعیتی دریندن درک ائتمک اوچون اجتماعی، اقتصادی و مدنی استوروکتور(ساختار)لارا نظر سالماق لازیم اولدوغونو گؤستریر. بئله‌لیک‌له ده کیم اولدوغوموز، نیه بئله اولدوغوموز و دوزگون سوسیال بیر حیاتی یاراتماق اوچون نه ائتملی اولدوغوموزو آنلایا بیلریک.
س. چکدیییز سندلی فیلم‌لرده چئشیدلی اؤلکه‌لرده، عنعنوی و کولتورل اولای‌لاردا هله ده شامانیزیمین بوراخدیغی ایز گؤرونور. مؤدئرن عصرین انسانی بو قایناقلاردان نئجه فایدالانا بیلر؟
ج. من بدیعی (فیلم‌های سینمایی) و سندلی فیلم‌لر چکمک اوچون بیر نئچه اؤلکه‌ده چالیشمیشام و تکجه ابتدایی انسان اینانج‌لاری مسئله‌سینه توخونمامیشام. بو سلسله‌ده دیگر ویدئولاردا عدالت‌سیز، اجتماعی قورولو‌شلار، آنیمیزم ماهیّتینه و ایران و یاخین شرقده قادین‌لارین استاتوسونا، استبداد تاریخینه، صوفیزم و دیگر موضوع‌لارا توخوناجاغام… یاخین شرقده هومانیتارم (علم انسانی) آدام‌لارینین آراشدیرمالارینین اساساً کیتاب‌خانالارا محدودلاشدیغینا ایناندیغیم اوچون بو ویدئولاردا آیین‌لریمیز و ریتوآللاریمیزین (مراسم‌لر) آراسیندا داها یئنی سواللار یاراتماغا چالیشدیم. بلکه ده بو، گنج‌لریمیزین داها یاخشی جوابلار تاپماسی اوچون بیر یول اولاجاق.
س. بعضی ماراقلی قونولارا او جمله‌دن «بت‌پرست‌لیک» آدلانان مناسکه توخونوبسوز. بو قونونو بیر آز داها گئنیش آچا بیلرسیز؟
ج. تورکلر آراسیندا تانگری‌چیلیک آدلی بیر نوع پئگانیزم قدیم زمانلاردان قبول ائدیلمیش‌دیر، منیم آنلادیغیم بودور کی، تورکلرین قدیم اینانج‌لاریندا دونیانی یارادان، انسانلاری اؤز نظارتی ایله محاکمه ائده‌ن وارلیغا اینانماق اوچون هیچ بیر اساس یوخدور. پئگانیزمین بیر فورماسی اولاراق بت‌پرست‌لیک ده بیزدە یانلیش فیکردیر.
س. بو تدقیقاتی کیتابا چئویرمک قصدینیز وارمی؟
ج. خیر – چونکی کیتاب اوخویانیمیز یوخدور، آما بیر کیتاب تورک اساطیر (میتولوژی) شخصیّت‌لری حقیندا یازمیشام. اوندا آرتیق تورکلرین اساطیری کاراکتئرلرینی ایضاح ائتمیشم، مثلا، اگر ایرانلی‌لارین «اهورا مزدا»لاری وار بیزده اونا یاخین کاراکتئر «اؤلگَن» وار و ساییر… من بیر آز رسام‌لیق درسینی آلمیشام، اونا گؤره بو شخصیّت‌لری و اونلارین حیکایه‌سینی رسم ائتمیشم.
س. گله‌جک پِروژەلرینیزدن نئجه خبریمیز اولا بیلر؟
ج. ۳۰ ایلدی کی، مختلف فورماتلاردا فیلم‌لر چکیرم. دگیشن مناسبت‌لر و اونسیّت واسطه‌لری ایله کینونو اؤلو صنعت حسابلاماق اولار. یاشادیقلاریمین کناریندا، بیر نئچه ویدئو داها تاماملاییب رسم‌لریمدن استفاده ائده‌رک گؤرونور کی، دگیشمه‌سی اؤنملی‌دیر. یاشادغیم‌لا تورک میفولوژی پرسوناژلار حاقیندا قیسا ویدئولار چکه‌جه‌یم و بلکه باشقا ایشه کئچه‌جه‌یم؟ مثلا، بلکه من تاکسی سوروجوسو اولاجام.
س. بابک معلّم، بوگونه قده‌ر نئچه سندلی فیلم چکیبسینیز؟
ج. بیلمیرم، چونکی سایمامیشام.
س. سندلی فیلم‌لردن سونرا چکیلیش عالمینده باشقا ایشلریز ده اولوب‌مو؟
ج. ۴ بدیعی فیلمه رئژیسورلوق (کارگردانلیق) ائتمیشم، بیر نئچه تلویزیون سریالی حاضیرلامیشام، ایران، آذربایجان و تورکیه‌ده بیر نئچه فیلمین پرودوسری (تهیه‌ائده‌نی) کیمی چالیشمیشام. ۱۸دن چوخ بدیعی و سندلی فیلمین مونتاژینی (تدوینینی) ائتمیشم، همچنین بیر نئچه باشقا فیلم‌ده اجرایی پرودوسر، قورولوش رسام (طرح‌صحنه‌سی) و یازیجی کیمی چالیشمیشام.
س. لطفاً بوگونه کیمی نئچه سندلی فیلم ایشله‌ییبسیز، عنوانلارینی بویورون، سندلی فیلم‌لریزدن اؤدول قازانانی وارمی؟
ج. دئمک اولار کی، بوتون فیلم‌لریم یئرلی و خارجی فستیوال‌لاردا نمایش ائتدیرلیب، بعضی‌لری حتی موکافاتلار آلیب.
س. سندلی فیلم‌لری سئونلر سیزین ایشلریزی هاردا گؤره بیلرلر؟
https://www.youtube.com/@babakshirinsefat
س. بیزیم سورولاریمیزدا اولمایان باشقا سؤزونوز واردیر کی، آرتیرماق ایسته‌یه‌سیز؟
ج. ۱۳۷۹-جی ایلده دوستلاریم‌لا آذربایجان تورکجه‌سینده فیلم چکمک قرارینا گلنده منه شؤوینیست، پان‌تورک و … دئییر‌دیلر. او وقت رحمتلی یدالله صمدی‌نین افسانه‌لریمیزدن بحث ائده‌ن بیر نئچه فیلمیندن باشقا تورکجه جدّی سینما اثر-علامت یوخ ایدی. یادیمدادیر کی، ایرانین تورکلر یاشایان بؤلگه‌لرینده چکیلن هر ۳۰ فیلم‌دن بیری آنا دیلیمیزده چکیلدی. ایکی ایل اؤنجه اردبیل‌ده «انجمن سینمای جوان»یندا قونا‌ق اولاراق اونلارین ۳۲ یئنی استحصالیندا اولونان فیلمیندن ۳۱نین تورکجه اولدوغو گورونوردو.
یادیما دوشدو کی، ۲۰۰۶جی ایلده «فجر» فستیوالیندا «راآمی» فیلمی نمایش ائتدیریلنده ایرانی منتقدلر آدام دیلینده فیلم‌لر نمایش ائتدیرملی‌دیرلر (یعنی من، آدام دیلینده فیلم چکمه‌میشم). او آلچالدیجی اینکار و تحقیردن بو گونه گلیب چاتدیق و بونا اومید وار.
بابک معلّم! ادبیات سئونلرله صمیمی دانیشیغیز اوچون سیزدن صمیم قلب‌دن تشککور ائدیریک.
