اولدوزلار، باخیشلار
حسن ایلدیریم
گئجه
بولود ایچیندن
اولدوزلار چیخیر، باتیر.
خیالیمداکی گؤزلر
اویانیر، باخیر، یاتیر.
ایشیقلار گؤیده سوزور
باخیشلار خیالیمدا.
تورانلی گؤزلریمده:
خیال‌لاشیر بولودلار
بولودلاشیر خیالیم .
اولدوزلار گؤزه دؤنور
باخیشلارلا اولدزلار اوره ییمه داراشیر .
گؤی اوزو چیچک- چیچک
چیچک‌لردن قان دامیر
خیالیمداکی گؤزلر
چیچک‌لره بویلانیر.
حسرت ناخیشلی گؤزلر
پاییزلی قیشلی گؤزلر
ساریلیر اولدوزلارا
شیمشک چاخیشلی گؤزلر
قارتال باخیشلی گؤزلر
سریلیر اولدوزلارا.
بولودلو خیالیم
خیاللی بولودلار
چالخالانیر دنیز کیمی
دالغالاری باخیش- باخیش
مایاقلاری اولدوز- اولدوز
یئر- گؤی آراسی دنیز
اوره ییم قیزیل گمی،
دویغولارسا یئلکنیم
گمیمه غم قالانیر
قیزیل گمی ییرقالانیر
دنیز هئی دالغالانیر
دنیز هئی دالغالانیر
تهران ۱۳۶۴
