قان دادی بوغازینی گؤینه‌دیر. گؤزلرینی هئی‌سیز- هئی‌سیز اطرافا هرله‌ییر. گؤز ایشله‌دیکجه قاردیر. آرخادا، تکجه اونون آیاقلاری‌نین ایزلری گؤرونور. گئده‌جه‌یی یئره، اوزون یول اولدوغونو بیله‌رک آغیر-آغیر اولسا دا ایره‌لی‌له‌ییر. دیزلرینه کیمی قارا باتیر. دنگه‌سی پوزولارکن، الینی قارلارا آتیب، ییخیلیر. زورلا آیاغا قالخیر.
کاتدانین -آجیقلی باخیشلاری گؤزونده جانلانیر. باغیرارکن: «سن ده او بیری‌لر کیمی «آدسیز یئر»ه سورگون اولاجاقسان». بره‌لمیش گؤزلری ایله، اونون گؤزونون ایچینه باخاراق باغیریر: «ایندی گئت، نه دانیشا بیلرسن دانیش!». بارماغینی چؤله ساری توتوب، آدسیز یئرین یولونو اونا گؤستریر.
کولک، قارین نارین دنه‌لرینی اوزونه چیرپیر. اوزونو شالی ایله توتوب، یولونا داوام ائدیر. هر آتدیمدا دیزلرینه کیمی، قارا باتیر. کند ایله آدسیز یئرین اورتاسینداکی هوندور آغاج اوزاقدان، صلابتلی بیر قالا کیمی دیم-دیک دایانیبدیر. آتدیملارینی یئیین‌لدیب، اؤزونو آغاجین گؤوده‌سینه چاتدیریر. بوداقلارین اوستونده قار اوتوروبدور. آرخاسینا باخدیقدا، ائله بیل آغ بیر اؤلکه‌نین اوستونده ایلانا بنزر بیر ایز، سینیر بلله‌ییبدیر. سینیرین او ال-بو الینده، هر دن قان لکه‌سی بو اولاغان اوستو آغلیغی، عئیبه‌جرله‌‌دیبدیر. بو یابانجی اؤلکه‌ده، قوو وورسان، قولاق توتولور.
آغاجین هنده‌وری‌نین قارلارینی، الی ایله کنارا چکیب، دینجینی آلماق اوچون آغاجا سؤیکنیر. قاشلارینی چاتیب، گؤزلرینی قیییاراق، اودقونور.
کاتدانین سسی قولاقلاریندا گزیر. او، اللرینی قولاقلارینا قویور. بو ساعاتدان سونرا، نه اوز وئره‌جه‌یینی آنلاماییر. آز زامان اؤنجه، قونشونون گنج اوغلونو دا آدسیز یئره سورگون ائتمیشدیلر. «نه ده اولسا، کندین یاریسی آدسیز یئرده یاشاییر» دوشونجه‌سی، اوره‌یینی راحاتلادیر. گؤزلرینی یومور.
ایکی کیشی اونو ائودن چیخاردیب، کاتدانین حیه‌طینده‌کی بؤیوک تؤوله‌یه آپاریرلار. اونو چارپایی‌دا اوتوردورلار. قویونلار اونا باخیرلار، او، قویونلارا.
دوز باشی‌نین اوستونده، تاوانین اورتاسیندا باجا وار، اوردان ایشیق گلیر، هردن ده باجادان، قارین دنه‌لری فیرلانا-فیرلانا اوچوب، اوزونه قونور.
او، کیشی‌لری تانیماغا چالیشیر، آنجاق بؤرکو قاشلاری‌نین آلتینا قدر ائندیرمیش، آغیز-بورونلارینی شالین آلتیندا گیزله‌دیبلر.
تاوانا گؤز دیکیر، بلکه بیری بو باجادان اونو گؤروب، قورتاردی. کیچیک بیر قوش باجادان اونا باخیر.
گؤزلرینی آچیر. هوندور آغاجین بوداغینداکی قارلار اوزونه تؤکولور. قارقالار قاریلداییب، آغاجین باشی‌نین اوستونده، اوچوشورلار. گؤزلرینی قیییب، اونلارا باخیر. بوداغا قونان کیچیک قوشو گؤرور. الینی یئره قویوب قالخماغا چالیشسا دا، هئیی قالماییبدیر.‌ باشینی چییینینه قویوب، گئنه گؤزلرینی یومور. قوش اونون باشینا قونور. قوشو آووجونا آلیب، قیزیشدیریر.
قاریلداماق سسینه باشینی قالدیریر. قارقالار، داها یاخینلاشیب، اوچورلار.
بولودلارین آرخاسینداکی گونش باتماق اوزره‌دیر.
آووجونو آچیر، قوش اوچماییر، کیریمیش کیچیک ووجودو تیتره‌ییر. قوشو جیبینه قویور.
آیاغا قالخماق ایسترکن، دیزلری قاتلانیر. اوزو اوسته یئره دوشور. اوزو قارا دایانیر. کندده‌کی حادثه‌لر گؤزونده جانلانیر.
کیشی‌نین بیری، اونو ووروب، یئره سردی. بیری‌نین ده الینده، کلبه‌تین وار. دیشینی چکن داللاک کیشی یادینا دوشور. «آچ آغزیوی» دئیه امر ائدیر. او، آغزینی آچماق ایسته‌مه‌ییر. او بیری کیشی یاخینلاشیر. «آچ آغزیوی!..». او گینه آچماییر. بیردن محکم بیر سیلله ایله، یئره سریلیر. اوزو یئره دایانیر. تؤوله‌نین قاتی، تزک قوخوسو اوره‌یینی بولاندیریر. کیشی‌نین بیری اونو چئویریر. قیچلاری‌نین اوستونده اوتوروب، بیر الی ایله بیلکرینی دوشلری‌نین اوستونده، سیخ-سیخ ساخلاییر، بیر الی ایله ده اووودلارینی باسیر. باشینی ترپتمه‌یه بئله، ایمکان یوخدور.
بو آن، کیشی‌نین یاشیل رنگلی شالینا گؤزو دوشور. اوره‌یی‌نین باغی قیریلیر. آز قالیر باغری چاتلاسین. بو شالین ایپلرینی ننه‌سی وئرمیشدی. او، چیلله‌ده بو شالی، نیشانلی‌سینا وئرمیشدی.
گوندوزون ایشیندن یورغون اولسا دا، گئجه‌لر بو شالی توخویوردو. بارماقلاری هر ایلمه‌یه توخوندوقدا، دوداقلارینا شیرین گولوش قونارکن، اؤزونه دئییردی: «نیشانلیم بو شالی بوینونا سالاندا، منی خاطیرلاییب، قیزیشاجاقدیر».
گؤزونون قیراغیندان داملالار سوزولوب، ساچلاری‌نین اورتاسیندا ایتیب، باتیر.
کیشی یاخینلاشیب، دیلینی کلبتینه سالیر. بیر گؤز قیرپیمیندا دیلینی قیرتیر. او، آغریدان باغیریر. نیشانلیسی هله ده قیچلاری‌نین اوستونه آغیرلیغینی سالیب، گؤزلرینه باخیر. باشی یان طرفه آخیر، گؤزلری یومولور. آغزی‌نین قیراغیندان قان آخیر.
اؤزونه گلینجه هر طرفی، قان ایچینده‌ گؤرور. او ایکی کیشی، باشی‌نین اوستونو کسیبلر. اونو سورویه-سورویه حیه‌طه چیخادیرلار.
۱
کاتدا غضبلی باخیشینی اونا دیکیر. دوداغی‌نین اوستونده‌کی، قیرمیزی ات خال، ترپنه-ترپنه باغیریر: «اوزون دانیشان آدامین، دیلی قیسسالار. بونو هامی بیلسین!..».
قویونلار حیه‌طه چیخیرلار. سس‌سیز- سمیرسیز دایانیب باخیرلار. کاتدا باغیریب، الی ایله قویونلارین گئتمکلرینی امر ائدیر. قویونلار، باشلارینی آشاغا سالیب، چؤله ساری گئدیرلر.
گؤزلرینی آچیر. قار اوزونو دوندوروبدور. زورلا دوروب، اوتورور. اللرینی قیچلاری‌نین آراسیندا قیزدیریر. بارماقلاری ایله، هؤروکلرینه اوتوران قارلاری سیلکه‌له‌ییب، بیر آووج قاردان آغزینا ساری آپاریر. قوروموش قان، آغزینی آچماغا قویماییر.
قاری، دوداقلارینا سورتور. دولغون دوداقلاری‌نین قوروموش قانلارینی قوپاردیب، بیر داها قارلا ایسلادیر. دوداقلارینی دیلی ایله ایسلاتماق ایسته‌ییر، آنجاق اولماییر. آغریدان گؤز یاشلاری سوزولور. اللرینی آرخالیغی‌نین یاخاسیندان ایچری آپاریب، قولتوغوندا قیزیشدیردیقدان سونرا آووجلارینی قارلا دولدوروب آغزینا قویور. دیشلری آغرییا گلیر. الی‌نین آرخاسی ایله گؤزونون یاشینی سیلیر. سیلله‌نین یئری آجیشیر. آیاغا قالخیب، یولا دوشور. هردن، قاری آووجلاییب، آغزینا دولدورور، سونرا قانلی سویو قارلارین اوستونه بوشالدیر. آغ آپ آغ قار قیزاریب، قانلی سو، یاییلیر.
گونش بولودلارین آرخاسیندا باتماق اوزره‌دیر. او، گؤی قارالمامیش، اؤزونو آدسیز یئره یئتیرملی‌دیر. اوزاقدان ایتلرین اولاماغینی ائشدیر.
کیشی‌نین سؤزو یادینا دوشور. اونو کندین قیراغینداکی قبریستانلیغا قدر گتیریب، اوزونه باخمازدان دئمیشدی: «بورانی توت، دوز گئت!.. آخشاما کیمی اؤزووو آدسیز یئره چاتدیر، یوخسا کؤپکلره یئم اولارسان».
او، آددیمدلارینی یئیینله‌دیر. آنجاق لاپ الدن دوشوبدور. هئی‌سیز-هئی‌سیز گئدیر. قارقانین قاریلتیسی کاتدانین گولمه‌یینی خاطیرلادیر.
کاتدانین سؤزلری قولاقلاریندا دولانیر. ساپ-ساری دیشلرینی آغاردارکن: «گئت دوعا ائله‌کی، داشقالاق ائتمه‌یینه امر ائتمه‌دیم!» دئییب، اوجادان گولموشدو.
گون باتیب، قاش قارالیبدیر. بیراز اوزاقلیقدا، کور ایشیق گؤرونور. اوره‌یینه دینجلیک اوتورور‌.
او، آدسیز یئره چاتدیقدا، بیر-بیریندن آز آرالی، اوتاقلاری گؤرور. اؤزونو اوتاقلارین بیرینه چاتدیریر. گوجسوزجه، الینی یوموروقلاییب، قاپییا چیرپیر.
قاپینی، بیر کیشی آچیر. اونون قولتوغونا گیریب، اوتاغا کئچیردیر. دؤشه‌یین اوستونه اوزالدیب، یورغان‌لا باسدیریر.
گؤزلرینی آچدیقدا، اوتاق بوم-بوشدو. قورخولو گؤزلرینی اطرافا دولاندیریر. آرتیق، آیاغا قالخماغا اینجاری یوخدور. الینی جیبینه آپاریر. کیچیک قوشو آووجونا آلیر. گؤزلرینی یومور‌.
او، هوندور آغاجین اؤنونده دایانیبدیر، قار دنه‌لری گلین دونونون اوستونه اوتوروبدور. کاتدا الینده یانارجا ایله، کیمی ایسه آختاریر. او، قار آدامینا دؤنوبدرور. آنجاق قان آیاغی‌نین آلتینی قیزیشدیر. کاتدا، اوجا سسله دئییر: «اونو تاپین، اونو داشقالاق ائله‌یین». قار آدامین یانیندان کئچنلر، سانکی اونو گؤرمه‌ییرلر. بیردن ایتلرین سوروسو، هوره-هوره اونا یاخینلاشیب، قانی یالاییرلار. ایتلرین بیری اللرینی اونون کؤکسونه دایایییب، دیلینی قوپاتماق ایسته‌ییر. اطرافی قارانلیغا بورونوبدور. کاتدا الینده‌کی یانارجایلا اؤنونده دوروبدور. یانارجانین ایشیغیندا قار، قیپ-قیرمیزی گؤرونور. کاتدا یانارجانی اونا ساری توللاییر. ایتلر داغیلیرلار. اگنینده‌کی گلین دونو، آلوولار ایچینده یانیر. او، آلوولانا-آلولانا، آغاجین قاباغیندا دایانیبدیر. جانی قیزیشدیقجا، لذت آلیر. اللرینی آچیب، باشینی گؤیه قالدیریر. آغاجین کؤکلری، قارلارین ایچیندن اوزانیب، اونون گؤوده‌سینه دولاشیرلار. اونو یئردن قالخیزیب، گؤیه‌ساری آپاریر. قویونلار آغاجین اطرافینی احاطه‌ ائدیب، باخیرلار. او، بیر آلوو پارچاسی اولوب، گؤیه ساری گئدیر.
آدسیز یئره گلندن بری، بو یوخونو گؤرور.
ایندی ایسه جانی اود وئریر. دوغوم سانجیسی اونو یوخودان اویادیر. آیاغا قالخیر. آیاق یولونا گئتمک ایسترکن، قیچلاری‌نین اورتاسیندان سو تؤکولور. سانجیلار گئت-گئده چوخالیب، امانینی کسیر. گاه دیرناقلارینی دووارا چکیر، گاهدان بیله‌یینی دیشله‌ییر. اوتاغین بوجاغیندا، دؤشه‌یین اوستونده چؤمبه‌لیر. پنجره‌نین هئره‌سیندن یاپیشیب، اؤزونه گوج وئریر. اؤلومون آجی دادینی، بوتون ووجودوندا حیس ائدیر. باغیریر، باشینی ساغا-سولا ساللاییر. تردن ایسلانان ساچلاری، گؤیده اویناییب، اوزونه توخونور. اوزو جیم-جیلاق‌دیر. کیچیک قوش اوتاقدا اوچور. اونون هر باغیرتیسیندا، دیسکینیب، اؤزونو دووارا چیرپیر. او، نه گوجو وارسا باغیریر. ایچیندن بیر شئی قیریلیب، دؤشه‌یین اوستونه دوشور. درین بیر دینجلیک بوتون ووجودونو توتور. اوشاغین آغلاماق سسی اوتاغی بورویور.
اوشاغین باتیق اوزونه الینی چکیب، تمیزله‌ییر.
۲
دوداقلارینی اوشاغا یاخینلادیر. کؤرپه‌نین ایستی اوزو، جانینی قیزیشدیریر. اوزانیر، قونشو کیشی گلیب، اوشاغین گؤبک باغینی کسیر.
اوشاق، اینجه، قیرمیزی دیلینی چیخاردیب، دوداقلارینا سورتور.
گونشین ایشیغی اوشاغین اوزونو آیدینلادیر. قوش پنجره‌نین هئره‌سینده اوتوروبدور. اونون کؤلگه‌سی اوشاغین اوستونده عکس اولوبدور.
اوشاق کاتدایا بنزه‌میر، دوداغی‌نین اوستونده قیرمیزی ات خال یوخدو. او معصوم گؤرونور.
دیل‌سیزلرین آدسیز یئرینده، یئنی بیر اوشاق، دیلی اولان بیر اوشاق دوغولور.
3