بوراسی طبس؛
بوراسی حیاتین سون دوراغی!
بوراسی کومورلو سوسوز داغ‌لار،
اؤزو قارا، باغری یارا داغ‌لار.
بو داغلارین انتهاسی اؤلومدور
بیر ده چیچکلنمه‌میش سئوگی.
بوراسی، قاراباخت‌لارین قارانلیغا اوزانان یوللاری؛
بوردا یئر آچیب آغزینی
قارا دالان‌لاردا هؤپوتدویور
چاره‌سیزلیگی؛
بوردا گونش
ایشچی‌لرین اؤلومو‌ایله دوغولور،
بوردا سئوگی قوجاغی
سئوگیلی‌لر دوداغی
اونودولان آدسیز ایشچی‌لرین
اؤلومونه بله‌شیب؛
بوردا اوشاقلارین مکتب یولاق‌لاریندا چیچک یوخ
کومور توزو گوزلره سپه‌له‌نیر.
بوراسی طبس؛
بوردا سوفره‌لرده‌کی چوره‌ک، پئندیر، شوربا
جنازه‌لرد‌ن تامسینیب‌دیر.
دوغروسو
بوردا چؤره‌ک داشدان یوخ،
قاندان چیخیر.
مهر ۱۴۰۳
