آزادلیق منیمله موباریزه‌ده،
آرامیزدا یامان دؤیوشلر گئدیر.
من اسیر قالمیشام اونون الینده،
اودا اؤز یاخاسین قفسده دیدیر.

سعادت کؤرپوسو منده دیل آچیر،
شفق‌لر ایچینده بایراق گؤیه‌ریر.
گولوشلر آغلاییر بیرلیک سئوینجین،
آیرلیق آرازدا دوداق گؤیه‌ریر.

حایاتین یوللارین اومودلار دوغور،
بئشیکلردن قالخیر اوغوز ایگیدلر.
آزادلیق سسلنیر کؤرپولر اوسته،
قیلینجلار دوغرانیر سئوینیر ال‌لر.

منیم دوشونجه‌مده باریت یاتیبدیر،
شاعر شهید اولوب اؤز کؤلگه‌سینده.
عشقین اوجاغینا کول اَله‌نیبدیر،
چیراغلار سونوبدور اود دَخمه‌سینده.

قارانقوشلار اوچور شعریمین آدین،
نغمه‌لر آزادلیق موژده‌سین وئریر.
آندیلار شیطانی قوجاقلاییر اوووف
آللاهین سئوگیسین جامیشلار هورور.

بیر داملا وارلیقدان «توفان»لار قوپور،
شَپه‌لر ساحیلده ساغلام‌دیر هله.
آی گؤی دنیزلرین آزاد سولاری
آزادلیق منیمله موباریزه‌ده!

۱۴۰۰/۴/۱۴ تبریز