-آخی نه‌دن کیمسه اورا گئتمیر؟ نییه اورا مسافر آپارمیرسیز؟. . .
بونلاری دئییرکن، گنج اوغلانی قانع ائتمه‌یه چالیشیردیم. او، اوزونو منه چئویریب، سویوق باخیش ایله جواب وئردی:
-هلبت بیر شئی وار کی، هئچ کس اورا گئتمیر!. . قرار دئییل هر شئیی دیله گلک کی!. . . واز کئچ خانیم، واز کئچ!
منیم اومودلاریم یئنی تومورجوقلانمیشدی. نییه واز کئچه‌یدیم؟. . ایللردیر بو گونون حسرتینی چکمیشدیم. بئینیمده خیاللار بسله‌میشدیم. ایرمی ایل گؤزله‌میشدیم بو گونو.
-آغا! سن نئچه ایسترسن من وئره‌جم. دئییرسن ایکی-اوچ قاتینی وئریم. ایسترسن دولار وئره‌رم.
پاسپورتومون آراسیندان دولارلاری چیخارتدیم، اونا ساری توتدوم.
گنج اوغلان باشینی آشاغا سالیب، باشماقلارینا باخار کیمی دوشونجه‌یه دالدی. بیردن قرارلی بیر لحن‌له دئدی:
-کئچ اوتور!. . .
سئوینجدن دئدیم:
-سن آللاه؟ دوز دئییرسن؟. . .
-کئچ اَیلش! آخیردا، منی اوزدن آپاردین.
فلاسکدان باشقا، هر نه الیمده واریدی؛ آرخا صندلین اوستونه قویدوم. اؤزوم ده قاباقدا اوتوردوم. ایسته‌ییردیم هر طرفه دیقتله باخام. سسسیزلیک ایچینده، ماشینی سورن اوغلانین قولونداکی دؤیمه‌یه، گؤزوم دوشدو. اوزو اولمایان بیر قیزین شکلی ایدی. آلتیندا دا لاتینجه دنیز یازمیشدی. بیر سؤز سوروشماق ایسته‌دیم. سونرا اؤزومه دئدیم، حتما سئودییی بیریدی. ایندی ماراقلانماق زامانی دئییل.
پاییزین سویوغو جانیمی اوشوتدو. شوشه‌نی اوسته چکدیم. یول قیراغینداکی کوللار، کوله‌یین موسیقی‌سی ایله اویناییردیلار. سانکی کؤکلریندن قوپوب، اؤزلرینی یئلین الینه وئرمک ایسته‌ییردیلر. کوللارا ایلیشن نایلونلار، یاپیشقان کیمی یاپیشیب، سئویلمه‌ین بیر گؤرونتو یاراتمیشدیلار. بو گؤرونتو منی چاشدیریردی. اوزون زامان ایدی دوغانین تر-تمیز گؤرونمه‌یینه آلیشمیشدیم. اورالاردا دوغانین چوخ اؤنمی واردیر. هرکس بیر گؤره‌ولی کیمی دوغادان موغایات اولار. اوزومو چئویریب گنج اوغلانا ساری دؤندوم.
کؤیکسومو اؤتوروب، دئدیم:
-ایتیک چوخ پیس اولار! آدامین گؤزو دایما آرخاسیندا اولار‌. . .
بارداغی چای‌لا دولدوردوم. اوغلان ایستک‌سیزجه بارداغی آلدی. آغزینی بیچاق آچمیردی. ظن ائدیردیم کی، «نه ایتییی؟» سوروشاجاق. من ده دانیشماغا باشلایاجاغام. آمما داشدان سس چیخدی، اوندان سس چیخمادی. دوز، باشی‌نین اوستونده بیر شکیل واریدی. ایکی کیشی ماوی بیر مینی‌بوسون اؤنونده دورموشدولار. بو شکیل ماشینین گونلویونه(سایه‌بانینا) یاپیشدیریلمیشدی.
عمی جانین ماوی مینی‌بوسو یادیما دوشدو. او زامانلار اونا قاپدی-قاچدی دئیردیک. هر ایل یایدا بوتون عاییله ماوی قاپدی-قاچدییا دولوب، اورا گئدردیک. اوخویاردیق، اوینایاردیق. دئییب-گولمک دیزدن اولاردی. بیر دببه سو، بیر بؤیوک خیار گؤتوروب، ساحیله گئدردیک. هردن بیر تویوپ کیرایه ائدیب، دالیمیز اوسته اوزاناردیق. گونشین جیزلاماسی بیر یاندان، گؤلون شور سویو بیر یاندان. . . اوزوموز یانیب، آجیشاردی. قابیق قویاردیق. قاپ-قارا اولاردیق.
او گون ساحیلده عمی قیزیملا گزیردیک. آغ کؤینکلی، قارا ساچلی بیر گنج منیم ایلگیمی چکمیشدی. اوزون-اوزون باخیشمیشدیق. عمی قیزیما اشاره ائتدییمده، گولموشدوک. عمی قیزیم یاواشجا قولاغیما میزیلدامیشدی: «قیز اونون یولداشینا دا من وورولموشام». گون باتیمیندا ساحیلده گزیشیب، هاوا قارالینجا چادیرلارا چکیلردیک. گئجه باشلاناندان، چالقی‌چیلار چالماغا باشلاردی. هامی اونلاری چنبرله‌ییب، چپیک چالیب، اوخویوب-اوینایاردیلار. بو چال-های گئجه یاریلارینا دک سورردی. سونرا چادیردا داراشلیق ایچینده، دیب-دیبه یاتاردیق.
شفق‌ سؤکولن چاغ، عمی‌قیزیملا گیزلیجه چادیردان چیخیب، اونلارلا ساحیلده دولانیب، گونشین دوغماغینی سئیر ائدردیک. بیر هفته سره-سر اوردا قالاردیق. ائوه قاییتماغیمیز گلمزدی.
اوزون زامان ایدی نامه گؤزله‌ییردیم. عمی‌مین اوغلو اولمادیغیندان، عمی قیزیم مندن داها راحات ایدی. اونلارین ائولری‌نین آدرسینی وئرمیشدیک. نئچه سئری عمی قیزیمی گؤره‌نده سوروشموشدوم، آنجاق نامه گلمه‌میشدی. بیر گئجه ننه‌م گیلین حیه‌طینده، توت آغاجی‌نین آلتیندا یئر سالیب، یاتمیشدیق. عمی قیزیم یاوشجا یورغانین آلتیندان ایکی پاکات چیخاردیب، گؤیده اویناتدی: «قیز آیدین‌دان نامه گلیب» دئدی. «منیمکی ده بوداهااااا. »
قولونو محکم قیرتدیم:
-به ایندی نییه دئییرسن؟. . .
هایی گؤیه گئتدی.
یاواشجا صاندیقخانایا گئدیب، گیزلی‌جه نامه‌نی اوخوماغا باشلادیم. بیر اوندا ننه‌م گلیب، دئدی:
– توو اوزووه باااا. . . او اوغلاندان کاغیذ گلیب؟
باشیمدان بیر قازان قاینار سو تؤکدولر سانکی. دئمک بیزیم گیزلی-گیزلی باخیشمالاریمیز-دانیشمالاریمیز ننه‌مین گؤزوندن قاچمامیش‌میش. دوزدو آیدینی آتاما آنلاتدی، چوخ ایشلرین باعثی ننه‌م اولدو، آمما نامه‌لرین آردی-آرخاسی کسیلمه‌دی. بیرینده یازمیشدی« سنین عشقیوه سرباز گئتدیم».
کوردوستاندان، ساواشین توفه-توفونده بئله، نامه یازاردی.
همیشه او گونلری خاطیرلایاندا، اوره‌ییمه داریخما گلر. گؤزومو یولدان چکمه‌دن یاواش سسله دئدیم:
-بیلیرسیز!؟ من بیرینی آختاریرام. ایللردیر اونو گؤرمه‌میشم. اؤلکه‌نی ترک ائتمه‌یه مجبور اولدوغومدان.
اوغلان دیققتینی یولدان چکمه‌دن دئدی:
-نییه اؤلکه‌نی ترک ائتدیز کی؟. . .
نئجه جواب وئره‌جه‌ییمی دوشوندوم. درین بیر کؤیکس اؤتوروب، دئدیم:
-او زامانلار باشقا جور دوشونوردوم. ایده‌آللاریم واریدی.
اوغلان سؤزومو آنلامایان کیمی قاشلارینی یوخاری آتدی.
-کیمی آختاریرسیز؟ تانیش‌دیر یا قوهوم؟
-اسکی بیر دوست.
-باخ خانیم! اورالار چوخداندی ویران‌دیر. کیمسه یاشامیر آرتیق.
اوغلانین سؤزونو سایمادان، بئینیمده آیدینی خیال ائتمه‌یه چالیشدیم. یقین، داها ساچلاری قارا دئییل. . . بلکه ده گوموشو ساچلارینی، گئنه آرخایا داراییب، بیغلاری دا اوست دوداغینی اؤرتوب. بلکه ساققالی وار. . . بلکه ده ساچلاری تؤکولوبدو. سونرا واز کئچدیم. اونو گؤردویومده نه دئیه‌جه‌ییمی، ساپا دوزومه‌یه باشلادیم. «منه یازدیغین سون نامه‌نی ازبرم آیدین! منی باغیشلا! عمی قیزیم هر شئیی یازمیشدی منه. منیم اوچون قاپیمیزا کیمی گلمیشدین. آنجاق من. . . ».
توز دنه‌لری ماشینین شوشه‌سینه دَییب، سس وئردی.
گنج اوغلانین سسی منی اؤزومه گتیردی. گؤزلرینی اؤنه دیره‌میش، دئدی:
– بورالارا سانکی لعنت یاغیب، سانکی دنیزین قارغیشی توتوب. . .
بیر شئی زلی کیمی بئیینیمی سومورور. نئچه ساعات اؤنجه‌کی اومود تومورجوقلاری سولماغا باشلاییب. گونشه داریخمیشام. آخی همیشه بولودلو هاوا اوره‌ییمی سیخار. بیر زامانلار بو یوللاری سره-سر گونه باخانلارین تارلاسی بزه‌میشدی. گؤز ایشله‌دیکجه گونه‌باخان اولاردی. ایندی هئچ بیریندن خبر یوخدو.
-آغا باغیشلایین آدیز نه‌دیر؟
ماراقلا سوروشدوم.
– منه فایتونچی دئیین.
-چوخ جالبدی. آتا-بابالاریز فایتونچی ایدیلر.
-هه ائله‌دیر. اونلار مسافرلری فایتونلا آپاراردیلا، من‌سه ماشین‌لا. بؤیوک، بؤیوک بابامین اوچ دنه فایتونو واریمیش. یاخشی کئچینردیلر. اونون دا دده-باباسیندان قالمیشدی بو ایش. آتامین دا مینی‌بوسو واریدی.
باشیمی ترپه‌دیب، باشی‌نین اوستونده‌کی، عکسه بیر داها باخدیم.
-آغای فایتونچی!. . . گونه باخانلارین باشینا نه گلیب؟. . . بورالار گونه باخانلارلا دولو اولاردی بیر زمان.
-آللاه اونلارا رحمت ائله‌سین. چوخداندی اؤلوبلر. هاوانی گؤرموسوز؟. . . بو هاوادا نه گونه باخان اولار نه باشقا شئی. . .
کؤیکسومو اؤتوردوم. آرتیق گؤزل شئیلردن اثر یوخویدو.
کولک بیراز یاتمیشدی. داغلارین اورتاسینداکی گدیکدن کئچیب، دوز یولا دوشدوک.
-یولوموز چوخدو؟
سوروشدوم.
-بو توز‌ توفانی قویسایدی، چوخدان یئتیشمیشدیک.
اوغلان دئدی.
-قراریم کسیلیبدیر، بورالاری بئله گؤرونجه اؤزومه دئییرم گؤره‌سن اونو تاپا بیله‌جم؟
ماراقلا سوروشدوم.
-چوخ اومودلو اولمایین. چوخداندیر اورالاردا کیمسه یاشاماز.
اونون بو سؤزلرینی سایمادیم. اومودومو بوتونلوکجه ایتیرمک ایسته‌میردیم. من اونو تاپمالی‌یدیم.
اؤنوموز گؤرسه‌نمه‌ییردی. اوغلان ماشینین ساری ایشیقلارینی یاندیردی. باشقا، هئچ بیر چیراغ ایشیغی گؤرنموردو. بیردن یولون اورتاسیندا بؤیوک بیر چالا اوزه چیخدی. اوغلان فرمانی سولا آلدی، آنجاق ماشین گومبولتویلا چالایا دوشوب چیخدی. کاپوت آچیلیب، قاباق شوشه‌یه ساری گلدی. سونرا ماشین بیر شئیه دییب، دایاندی.

***
ماشیندان چیخیرام. هر طرف قارانلیقدیر. ماشیندان اوزاقلاشارکن یئلین، قورد کیمی اووولدوسو، قولاقلاریمی کار ائدیر. اللریمی قولاقلاریما قویورام. یئل دوز دنه‌لرینی اوزومه وورور. گؤزلریم آجیشماغا باشلاییر، یاش گلیر. الیمین دالیسی ایله سیلیرم. اوزاقلاردا بیر ایشیق گؤز وورور. . .
ایشیق گلن ائوه ساری گئدیرم. یاشلی کیشی آغیز-بورنونو باغلامیش، منی گؤزله‌یر کیمی قاپی‌نین اؤنونده دایانیب. آیاغیمین آلتینداکی دوز، اینجه شوشه پارچاسی کیمی خیرچیلداییر. سسیندن جانیم ییغیشیر، گؤوده‌م تیتره‌ییر. یاخینلاشیرام.
-آی عمی؟!. . بیرینی آختاریرام. چوخ آدلیم‌دیلار. بوردا یاشاردیلار. هانی بورانین آداملاری؟ هاردادیلار؟. .
سوروشورام. یئلین کوفولتوسو سسیمه قاریشیر. بیر داها سوروشماق ایسته‌ییرم.
کیشی اؤسکوررکن چتینلیک‌له دئییر:
-نه آدامی؟ نه یئری؟. . .
-بیرینی آختاریرام.
-کیمسه بوردا یوخدو. دنیز قورودو. توز-توفان اولدو. اؤلن اؤلدو، قالانلار دا کؤچوب، گئتدیلر.
دئییر.
گؤزلریم گؤینه‌مه‌‌یه باشلاییر.
-هارا؟. . . هارا گئتدیلر؟. . .
سوروشورام.

کیشی اوسکوررکن الینی اوره‌یینه قویور. ایشیق اوزونون یاریسینا دوشور.
آرخاسینی چئویریب ائوه کئچمک ایسته‌ییر.
-سنی آللاه منه بیر سؤز دئ! «گله‌جک» عاییله‌سینی آختاریرام، «آیدین گله‌جک». . . دئییرم.
دؤنوب باخاندا گؤزلریندن اوره‌ییمه رعشه دوشور. هین. . . دئدییب، ایچیمی چکیرم.
«بو آیدین‌دیر. ‌. . » اؤزومه دئییرم.
او تیترک سسله دئییر:
-هامیسی اؤلدو. هامیسی کؤچدو.
اؤسکورمه ماجال وئرمه‌ییر. اؤسکوررکن ییغیشیب بیر چنگه اولور. تکرار دئییر:
-اؤلنلر اؤلدو. . . قالانلار کؤچدو.
چوخ دیکسینیرم. آیدین نه‌دن بو گونه دوشوب گؤره‌سن؟. . .
بیر داها الینی دؤشونه قویوب اؤسکورور. زورلا دئییر:
-اؤلنلر اؤلدو. ‌‌. . قالانلار کؤچدو. بورالارا قارغیش یاغیب.
هئچ اینامازدیم بیر گون آیدینی بو حالدا گؤرم. نه اولوب؟ نه باشینا گلیب؟ هئچ بیلمیرم.
-من دورنایام!. . . تانیدین؟ سنین اوچون چوخ اوزاقلاردان گلمیشم. آیدین!؟. . . آیدین!؟. . .
دؤنوب دقت‌له اوزومه باخیر. باخیشی بوز کیمی‌ سویوقدو. گؤزلری قوربانلیق قویونون گؤزلری کیمی باخیر. اوزومه باخارکن دئییر:
-اؤلنلر اؤلدو. . .
اویان-بویانا باخیرام. اوغلانی آختاریرام. آغای فایتونچی. . . دئییرم. هر یئر دومانلیقدی. خیرچا-خیرچ سسی ائشیدیرم. بیری آیاقلارینی دوزلارین اوستونه باسیر سانکی.
-کیم وار اوردا؟!. . دئییرم.
هر یئر سس‌سیزلییه بورونوب. آرخاما باخیرام، قارانلیقدیر، اؤنومه باخیرام قارانلیقدیر. آددیملاریمی ائهمالجا گؤتورورم.
اللریمی اؤنومه اوزالدیرام. بیردن جانیم تیتره‌ییر. هونکور-هونکور آغلاماغیمین سسی، گئجه‌نین قارانلیغیندا یامسینیر. اطرافیما دولانیب، کورلار کیمی اللریمی دولاندیریرام. گؤز یاشلاریم اوزومو گؤینه‌دیر.
-خانیم!؟ خانیم!؟ یاخشیسان؟
-آغای فایتونچی!؟. . .
میزیلدانیرام.
یاواشجا دئییر:
-گلین قاییداق. منیم باشیم یارالانیب‌دیر.
او آن باشیمین گؤینه‌مه‌یینی حیسّ ائدیرم. سانکی منیم ده باشیم یارالانیب‌دیر.
اوغلان بوغوق سسله دئییر:
-بورالارا قارغیش یاغیب. سنه دئمیشدیم. دنیزین آهی توتاجاق هامیمیزی.
قارغیش سؤزو آیدینی خاطیرلاتدی. او دا قارغیش سؤزونو دئمیشدی.
باشیمی چتینلیکله ترپه‌دیرم. شوشه‌نین قیرینتی‌لاری اوزومو نئچه‌ یئردن کسیبدیر، اوزوم گؤینه‌ییر.
گنج اوغلان ماشینی زورلا ایشله‌دیب، یولا دوشوروک. هاوا آلاجا قارانلیقدیر. من اؤنه باخیرام. گونش اؤنوموزده‌کی داغلارین اورتاسیندان اؤزونو گؤرسه‌دیر.
سون