دنیز دینمز
اوره‌ک دالغین
اویویوبدور ماوی خزر آلا گؤزلو قیز‌لار‌کیمی،
شفق‌لرله تومارلانیر
کولک‌لرله سیغاللانیر؛
خزر دالیب خیال‌‌لارا !
خزر هارا، خیال هارا؟!
قارانقوش‌‌لار اوره‌ییمده قانادلانیر
آرزو‌لاریم شفق‌لری قوجاقلاییر
ایستک‌لریم اوفوق‌لری سئیر ائله‌ییر
گؤیدن‌کئچن دورنا‌‌لارین قاطار‌لاری قایچیلاییر بولوت‌لاری
آغ لک‌لر، قاققیلتی‌‌لار تومارلاییر گؤی سو‌لاری.
قوناق گئدیر اوچان قوش‌لار هانسی ائلین باهارینا؟!
نیسگیل‌لریم قوشولوبدور اوچان قوش‌لار قاطارینا.
گؤی خزریم گؤزون آچیر
باخیر
باخیر
گؤیده سوزن قاطار‌لارا، نیسگیل‌لره، دورنا‌لارا.
دنیز نسه منی دویور، وداعلاشیر خیا ل‌‌لارلا،
خزر جوشور دالغا – دالغا
اوره‌ک چارپیر مصراع – مصراع،
دالغا‌لاردا آل گونشین نور چلنگی
مصراع‌‌لاردا حسرت‌‌لرین، نیسگیل‌‌لرین آهنگی؛
گؤی سو‌‌لارین آینا‌سیندا سئوگیلیمین اوزو گولور
دالغا‌لاربن بوغازیندان آرزو‌‌لارین سسی گلیر
اوره‌ک چارپیر مصراع – مصراع
دنیز جوشور دالغا – دالغا؛
گؤی سو‌لاردا سایریشیر ایشیم – ایشیم اولدوز‌لار
باکی‌نین اولدوز‌لاری،
اوره‌یمیده کؤزه‌ریر چیچک – چیچک کؤزلریم،
تبریزیمین‌کؤزلری.
جوشوردنیز
داشیر دنیز؛
اوره‌ک چارپیر
اوره‌ک جوشور، اوره‌ک داشیر
دالغا‌لارلا قوجا قلاشیر.
تبریز ایستکلی قلبیم
قایناییر مصراع – مصراع
باکی اوره‌کلی خزر، کوکره‌ییر دالغا – دالغا.
اوره‌ک خزر ایچینده
خزر اوره‌ک ایچینده،
ایستک‌لر دالغا‌لانیر
مصراع‌لانیر گؤی خزر،
مصراع‌‌لار دالغا‌لانیر
دالغا‌لانیر مصراع‌‌لار؛
اوره‌ک خزر ایچینده
خزر اوره‌ک ایچینده
1366
