قیشین شیللاق آتان واختی دیر. یئتنه یئتیر، یئتمه‌ینه‌ده بیر سئلبه آتیر. بو سئلبه‌دن بیری ده، دوز گیجگاهیمدان توش گلیب. بورنومون تاوانینی دئشیب، نودانلاری لول- لول آخیر. تئز- تئز سیلدیییمدن قیپ- قیرمیزی چوغوندورا دؤنوب. کاغاذ دسمال توپاسی‌یلا، آنتی بیوتیک حب‌لری‌نین محاصره‌سینده‌یم. قیزیمین -«یات، دینجل!» چوماغی دا باشیمین اوستونده‌دیر. داها هئچ نه‌یه حالیم یوخدو؛ نه موبایل‌لا اویناماغا، نه ده تلویزیونا باخماغا.
قیزیم ویکس یاغی گتیریر؛کوره‌ییمی، قولاغیمین دیبلرینی، بورنومون اطرافینی ویکسله‌ییر؛ یئر سالیر؛ -«دور یات، اوستونو ده قالین ائله سویوق‌ده‌یمه‌ن جانیندان چیخسین!» دئییر. ائله‌ده ائله‌ییرم.
جانیما سرین بیر ایستی کئچیر؛ جوم- جولوق سو اولورام. شوفاژین ایستیسی جانیمی بوخارلاندیریر؛ اویان بویانا چویورام. یوخوسوزلوق باشیما دوشوب؛ یاتا بیلمیرم. موبایلیم زنگ چالیر؛ دوستومدو: -«ساعات دؤرده واخت آلمیشیق گله بیلرسن‌می؟» دئییر. اطرافی چوزورم. ائشیدن اولماسین دئیه سسیمی قیسیرام: -«جانیندان ایراق بتر سویوقلامیشام، امما گله‌جه‌یم» دئییرم. کناردان میزیلتی سسی گلیر: -«توپ چیخاران ده‌دون تونبه‌تون دوشسون. اؤلور هااااا، آمما حایاسی یوخدو، گئنه توپا گئدیر.» یولداشیمدی؛ فیتینی بیلیر. بیر باشا دؤیوشه گیرسه سونوجدا بیر آز دا بورجلو قالاجاق؛ هم ده قان قارالیق اولاجاق. او اوزدن بیر آز اوزدن گئدیر. باختیم گتیردی قیزیم دویمادی. قیزیما باتیشا بیلمیرم. خوروزلانسام، فئمینیستلیک دویغولاری آشیب داشاجاق. باشلایاجاق قادین -کیشی برابرلیییندن اخلاق درسی وئرمه‌یه. آمما نئیله‌ییم اوشاق‌دیر، بیلمیر، کؤنول مسئله‌سی‌دیر؛ اولماسین اولماز!
اؤسکوره- اؤسکوره ائوه گیریرم؛ باختیما بیت دوشور. قیزیمی هالین اورتاسیندا گؤرورم. الین بئلینه دایاییب، اوز- گؤزونو تورشادیر: -«ماشاالله، ماشالله سویوق‌ده‌یمه‌ن جانیندان چیخیب، تامام ساغالیبسان» دئییر. یولداشیم دا همیشه کی کیمی میزیلدانیب، سؤزونون اوستون گلیر. هاوانی دومانلی گؤرورم؛ او اوزدن قولاق آردینا وورورام. حاماما کئچیب، دوش آلیرام. موبلین اوستونده هرله‌نیب، موبایل‌لا اویناییرام. بیردن بیر سلسله اؤسکورک آمانیمی قیریر. قیزیم یئنه قاشینی چاتیب، اوز-گؤزونو تورشادیر: -«بلکه فوتبالا گئده‌سن؟! بتر ساغالیرسان هااااااااا اوندا.» گویا کی چوخ سینیرلی‌دیر. سسینی دیشینده قیسیب، تاکیدله: -«دور اوزان! سنی نجات وئرسه بو آتا بابا ویکس پامادی نجات وئره‌جک» دئییر. اوزانیرام. بدنیمی ویکسله‌ییر. ننه‌مین یایلیغی‌یلا دینگه وورور؛ شوفاژین قاباغیندا یئرسالیر؛ اوستومو اؤرتور: -«یات دینجل!» دئییر. هر بیر بارماغیندان جانیما راحاتلیق چؤکور؛ روحوم دینجه‌لیر؛ آغری‌لاریم ساغالیر سانکی. آمما نئیله‌ییم اوشاق‌دیر، بیلمیر، کؤنول مسئله‌سی‌دیر؛ اولماسین اولماز!