آرتیق بربرخانادا، ایشی قورتارمیشدی. بربر بویون- بوغازینی توکدن تمیزله‌ییب، اؤنلوکو سلیقه ایله بوینوندان آچیب، -«موبارکدیر جاوان، دیلخوشلوقلا اینشاللاه» دئدی.
گنج اوغلان «اللریز وار، چوخ ساغ اولون»- دئییب، چارپاییدان آیاغا قالخدی. بربرین تعارفینه باخمایاراق جزاسینی اووجونا باسدی. سونرا ایسه بؤیوتلو آینایا ساری گئتدی. پالتوسونو ائینینه چکیب، اؤز گوونلیک و گنج‌لره خاص مغرورلوغلا بؤیوتلو آینادا اؤزونه باخدی. پالتوسونون یاخالیقینی دارتدی، راضیلیقلا اصلاح اولونموش تئللرینی سیغاللادی، قاشلارینا دوزن وئردی، قیرخیلمیش اوز- گوزونو تومارلادی و آینادا کی اؤزونه گولومسه‌دی.
اوره‌یینده دوستلاریم دئمیشکن: «لاپ دخترکُش اولموشام»- دئدی.
بربرله ساغوللاشیب سلمانی‌دن چیخدی. آتاسیندان آلدیغی قالان پولو باهالی اودکولونا یئتیرمزدی، اودور کی یاخیندا اولان پاساژا گئدیب اؤزونه بیر اسپری عطری آلدی.
سئوینجدن اوره‌یی قوش اوره‌یی کیمی چابالاییردی. سئودانین تبرئه اولماق و آزادلیق خبرینی ائشیدندن قانادی اولسایدی حتمن اوچاردی.
سئودا ان سئودیگی سئوگیلیسی قیز یولداشی ایدی.
او مین آرزو ایله یونیورسیته‌نی قورتاریب سرباز دا گئتمیشدی. آمما هله لاییقی اولان ایش تاپا بیلمه‌میشدی. او یاشدا آتاسینا ال آچماقدان، جیب پولو و بربر پولو ایسته‌مکدن اوتانیردی. آخی آتاسی بیر تقاعده چاتمیش اؤیرتمن ایدی. آز حقوقو ایله آنجاق بئش باش عائیله‌نی دولاندیریردی.
خیدمتدن قاییداندان سونرا گله‌جه‌یه بوتون اومودونو الدن وئرمیشدی، تا او پاییز گونو، بیر ایل بوندان اونجه، سئودانی تاکسی‌ده گوردو. ائله ماوی گوزلرینده غرق اولدو کی، بیلدی داها بو سئوگیدن نجات یولو اولمایاجاق و بونا ایناندی کی دونیادا هله ده سئومه‌لی گوزللیک‌لر وار. او گوندن بوتون کایینات گؤزونده گوزللشدی، چون کی او یئرده، گؤیده، آی‌دا، اولدوزدا، گونش‌ده، داغ- داشدا، چیچکلرده و...و… هر یئرده سئودانی گؤروردو و سئویردی.
عائیله‌سی اؤزللیک‌له آناسی قاپ- قارا شَوه گوزلرینده پارلایان قیغیلجیمی، حوصله‌سیزلیکدن دئییشیب مهربان اولدوغونو، دیلینین آلتیندا میزیلدانان سئوگی ماهنیلارینی تعجوبله ایزله‌‌ییب بیر شئی‌لر سزسه‌لر ده، هله اونلارا بیر سؤز دئمه‌میشدی. اوره‌یینده «واختیکن آنامی، باجیلاریمی سورپرایز ائده‌جم»- دئییردی.
سئوگیلیسی سئودا فمنیستلیک خطینه دوشموشدو. آتیلا «منی سئویرسن سه بو خطرلی یولدان ال چک»- دئییردی. «من سنین بوتون ایده‌آللارینی قبول ائدیرم. تویوموزون شرطلری ده سن دئدییین کیمی اولسون. گله‌جه‌ییمیز ده ها بئله. آمما عیناد آتیندان دوش منیم ملکه‌م. گئتدییین بو یول قانلی- قادالی‌دیر. من قورخورام. شیپ- شیرین آرزولاریمیز وار منیم سئودام».
آمما سئودا سوس بارماغینی اونون دولغون دوداغینا قویوب، «تکی من دئییلم، منیم چالیشمام اؤلکه‌مین بوتون قادینلارینین آزادلیغی و اینسانی حاقلارینا یئتیشمه‌سی‌دیر. لوطفن بو یولدا منه مانع اولما»- دئمیشدی.
بیر هفته بوندان قاباق دیوارا شوعار یازاندا توتولموشدو. دونن تبرئه اولدوغونو و آزاد بوراخیلماسینی آتیلایا خبر وئرمیشدی.
ایندی ایسه آتیلا جانیندان چوخ سئودییی سئوداسینا سوسله‌نیردی.
یول اوزونو آذر آیی‌نین سویوغو کسیب- تؤکسه ده، اونون اوره‌یینده آلاولایان عشق آتشینه قارشی دورا بیلمیردی. سئودانی یادا سالدیقجا اوزو دولوسو گولومسه‌ییردی و بیر شئی ایستی- ایستی اریییب بوتون دامارلاریندا گزیردی. دوغرودان سئوگی غریبه و معجزه کیمی بیر زاد ایدی. بو سئوگیدن قاباق اومودسوز آتیلا، سئودا ایله داغی داغ اوستونه آشیرا بیله‌جک دوشونوردو. گله‌جه‌یی سئوگیلیسینین کناریندا اومود دولو و پارلاق گؤروردو. سان کی چنلی- دومانلی گونلرینه بیر گوزل گؤی قورشاغی ساچیلمیشدی. آرزولاری رنگارنگ دون گئیینمیشدی. خوشبختلیک نئچه قدملیکده اونا گؤز ووروردو.
پیادا یولوندا، عشق فیکری باشیندا سرسَم گئدیردی. دونیا بوتون اونون ایدی. آیاغینین آلتیندا ازیلیب خیشیلدایان یارپاقلار بئله گنج اوره‌یینی بیر موسیقی کیمی اوخشاییردی.
صاباحا کیمی نئجه داوام گتیره‌جکدی؟ دوغرو کی تئلفونلا چتله‌شیب دانیشاجاقدیلار، آمما یاخیندان گؤروش، اوز به اوز سئوگیلیسینین الینی توتماق، اونا ساریلماق و ساریشین ساچلارینی قوخلاماق بیر باشقا ایدی.
او آخشام سئودانین سسینده سویوقلوق و اومودسوزلوق سَزدی. آتیلا بونون سببینی دوشونه بیلمیردی. بلکه دوستاقدا اینجییب، اوره‌ییندن چیخاردارام دئییردی.
اونلارین قیزغین سئوگیسی‌نین رمزی «سئوگی دونیامیزی نجات وئره‌جک»- ایدی، اونلار بونا اینانمیشدیلار، سئوگینی و اینسان سئورلیگی اللریندن گلن قَدَری، دونیادا یایماغا ایلقار باغلامیشدیلار.
گئجه یاریسی سئودا ایله خئیلک دانیشدیقدان سونرا ساغوللاشیب، «شیرین یوخولار سئوگیلیم»- دئییب، صاباح کی گؤروش اومودو ایله بیر شکیل یاتدی.
گئجه گئج یاتدیغینا بیرآز دا گئج یوخودان آییلدی. همشه کی عادتینه اَلینی گوشی‌سینه آتیب اینستاگراما کئچدی.
گؤردویو آجی خبردن سان کی دونیا باشینا اوچدو:
«سئودا مؤید» قادین حاقلاری مدافعه‌چیسی بیر هفته‌لیک دوستاقدان آزاد اولدوقدان سونرا، انتحار ائتدی!»
او بیر هفته زینداندا یازیق قیزین باشینا نه گتیرمیشدیلر بئله جاوان جانینا قییمیشدی؟! او کی یاشامدان، طراوتدن، سئوگیدن، اوموددان دولو ایدی؟! او کی هله حیاتدان دویمامیشدی!!
اینانا بیلمیردی، یعنی بیر دونیا اومود بیر جمله ایله بوتون بادا گئتدی می؟!!
اوغلان ایچدن ائله هؤنکوردو، سان کی دئپرم قوپدو…. جانیم سئودام:
«بیر خزاندا
یئتیم قالدیق.
بیر خزاندا
سئودالاندیق.
اَن نهایت
خولیالارین هاواسیندان
قانادلاندیق.
بیر خزاندا
پارلاق قیزیل گونش دوغدو.
بیر خزاندا
بولود گلیب گونو بوغدو…
آنلایارکن خزانلاری
زامان کئچدی، بیز قورودوق
سوسوز قالان آغاجلار تک.
طراوتدن سالدی بیزی،
بیلمم غربت
یوخسا فلک…»
یاندیم آللاه «آذر» آیی بیزه دوشمور...
«آذر» آیی بیزه دوشمور…
ایضاحلار:
*بربرخانا: سلمانی، آرایشگاه
**حیکایه‌نین سونوندا گلن شعر «حبیب ساهر»ین خزانلار شعریندن گوتورولوب.
