دوشرگه بیر قادینین یالقیزلیقلاریندان یازیر؛ بوشلوقلاریندان، ایتیردیکلری، ایستکلری، آرزیلاریندان سؤز آچیر.
یازیچی آخیجی و شیرین قلمی ایله دوشونجه‌سینی چکینمه‌دن، پرواسیزجا تصویره چکیر و اوخوجویلا پایلاشیر.
حئکایه بیر قادینین کیچیک یاشلاریندان بری داشیدیغی یارالاری، بو یارالارین ائتگی بوراخدیغی ایزلری گؤرسه‌دیر؛ هئچ توختامایان یارالار و ایزلر.
فرقلی دونیا گؤروشلرینی و بو گؤروشلرین سورونلارا نئجه یاناشدیغینی آنلادیر.
سایین خانیم کبیری هئچ چکینمه‌دن دوشونجه‌سینی رومانین باشیندان سونونا قده‌ر بیلدیریر؛ ائش جینسل‌لر، جینسیت آیریمی، دین و کولتور اوچون گؤروشلرینی قلمه چکیر.
بو روماندا فلسفی و روانشناسی قونولاردان سؤز کئچدییینی گؤروروک.
ایکی اؤلکه‌نین فرقلی کولتور و دونیا گؤروشلرینی، چئشیدلی اؤلکه‌لردن مهاجرت ائده‌ن اینسانلارین دوشدوکلری دوروملاری یاخود معروض قالان دوروملاردان اوخوجونو خبردار ائدیبدیر.
یازارین ضد فاشیستی گؤروشو ده آچیقجا گؤرونور. هولوکاستدان، کیتابلارین اودا چکیلمه‌ییندن، سوی‌قیریمیندان… هر آن برلین‌دن تبریزه، تبریزدن برلینه گئدیب، گلیر.
پاولوف‌ون شرطی اولماق نظریه‌سیندن بوشو بوشونا سؤز کئچمه‌ییبدیر. دئمک خاص شرایطده اینسانلاردان باش وئره‌ن ایشلرین بیر تعدادی، شرطی اولماقدان اولا بیلیر.
هابئله خانیم کبیری هر فرصتده، اؤز گووه‌نی کیچیک یاشدان اوشاقلاردا یاراتماغین نه قده‌ر اؤنملی اولدوغونو وورغولاییبلار. بیر آنانین اوشاغینا اؤیره‌ده بیله‌جه‌یی ان اؤنملی، ان دوغال قونولاردان یازیبلار.
یازار، تبریزه دوشگون اولدوغونو هر فرصتده اؤزه‌ل مکانلاری، خیاوانلاری، محلّ‌لری، دوکان، قفه‌خانا، سینما، تاماشاخانا و باشقا یئرلریندن سؤز آچماقلا، آچیقلاییبدیر. هابئله تبریز دئییم‌لری ایله، سؤزلری و اؤزونه اؤزه‌ل لهجه‌سی ایله اوخوجونو تانیش ائتمک ایسته‌ییبدیر.
آدی بیلینمه‌ین یاشلی کیشی‌نین، هومانیست اولدوغونو، جهان وطنی گؤروشونه رغمن، تبریزه اؤزل باغلیلیغی و اونودا بیلمه‌مه‌یینی گؤروروک.
بو یاشلی کیشی شیرین اوچون بیر طرفدن هئچ گؤرمه‌دییی، ایران-عراق ساواشیندا شهید آتاسی‌نین بوشلوغونو خاطیرلادیر، هم ده بیر فلسفه اؤیره‌تمنی کیمی یئر آلیر. بو کیشی، هم بو گونه‌دک باشقا مخالف جنسلردن گؤرمه‌دییی تمیز محبتی اؤیره‌دیر، هم ده اونو گؤردویو ایشین مسئولیتینی بوینونا آلماغی اؤیره‌تمه‌یی ایله، یاشامیندا باشقا بیر یول سرگیله‌ییر.
عزیز یازاریمیز، گؤزل تکنیکلرله اوخوجونو تعلیقده ساخلاماغی چوخ یاخشی شکیلده ساغلایا بیلیبدیر. رومان او قده‌ر چکیجی‌دیر کی، کیتابی یئره قویماق ممکن گؤرونمور.
بللی‌دیر عزیز خانیم کبیری بو رومانی یازماق اوچون، چوخلو زحمت چکیبلر و یاخشی تحقیقلری اولوبدور. ائله‌کی بند نسوانین شرایطیندن، موقعیتیندن ائله یازیبلار کی اوخوجونو اؤزویله بندین اوتاقلارینا آپاریر. یاخود آلمانین برلین شهرینده دنیزی، ساحلی، دوشرگه‌نین اوتاقلارینی، کانتینی، حیه‌طی و…گزدیریر. اورانین گؤرمه‌لی یئرلرینی ائله توصیف ائدیرکی، سانکی تبریز قده‌ر تانیر و اوخوجونون الیندن یاپیشیب اؤزویله دولاندیریر.
سیمبوللاردان ایسته‌دییی نتیجه‌یه چاتاجاق قده‌ر استفاده ائده بیلیبدیر. سونوندا باغلی اولدوغو ایکی شئی بیری یاشیل ساچلی، ایکینجیسی چای فلاسکی‌دیر و ایکیسیندن ده آیریلماغی باجارا بیلیبدیر.
بو کیتاب اوچون منتقدلرین چئشیدلی نظرلرینی اوخوماق ایستردیم. چونکو بو کیتاب اوچون دانیشیلاجاق چوخ سؤز واردیر و بو دا منتقدلرین عهده‌سینه‌دیر.
اوخومایانلارا بو کیتابی توصیه ائدیرم.