اود دوشوب قامیشلیغا
یانیر آلووسوز، توستوسوز.
یالنیز، قاراباخت آنالار
سیزلایا- سیزلایا اوخشاییر کوچه‌لری.
بیرده گلین‌جیغازلاردیر
باغرینا باساراق دئشیک-دئشیک کؤینه‌یی
گؤزله‌ییر سحری.
یول سالیر قامیشلیقدان قاطار:
«تاقا تاق – تاقا تاق!»
هر قامیشین دیبیندن
بوشلاییب سئوگی یاتاغین
پیرلاییر بیر قاغایی
اضطرابلی، تشویشلی…
گؤزلری یول چکن قاراباخت آنا، قاریشین گلین!
گلین ایچه‌ری، قیزیشین!
چوخداندیر یای اؤتوب
آیریلییب پاییز گؤنلری؛
ایندی گونئی‌یه دوغرو کؤچور
قانادلاری مرمی نیشان قاغایی‌لار.
بوگون قامیش‌لارین داماریندا قیزاریر گونش،
یئریکله‌ییر؛
قان قوسور دؤنه – دؤنه
قاغایی‌لاردان بویلو قالمیش قامیشلار.
باخین!
بولودلارا قاریشان قاغایی‌لارین ایزینده
فیرتینا دوغور؛
شور سودا، نئفت قوخوسوندا
بویلو قالیب اوجاغا اوتوران قامیشلار.
آبان ۱۴۰۰
یک پاسخ
قلمینیزه ساغلیق عزیزمسعود آذر جنابلاری سیزه اوغورلار وجان سالیغی آرزولاییرام ????