تنهالیقدا بوغولورکن،
ال‌لرین هر یئردن اوزولور
یاپ یالقیز قاییدیرسان اؤزونه
قاییدیرسان خاطیره‌لرین
ساری‌تئل یاشیل چاغلارینا
یاشیل یازلارین کؤرپه‌لییینه
تور آتانلار، تور آتمادان
کپنک‌لرین اؤزگورلویونه گیریرسن
تیکان‌لارین ازدحامیندا،
گول‌لرین گولوشونه قاییدیرسان
باغ باغچانین سوکوتونو
آریلارین سازیندا دینله‌یرکن
داش آتمادان
قورباغالارین قورولتوسونا
قاییدیرسان
یاشامین هئیوا قوخولو، آنلارینی
فصیل‌لرین دییشیمینده سئیر ائدیرسن
سولارین سئحیرلی سس‌لرینه گیریر
سئل‌لرین ناریلتیلی یوخوسوندا
داش داشین کؤکونو قازمادان
چایپارانی دولانیرسان
یورولمادان یونجالیغا قاییدیرسان
آغ آپ آغ گؤبه‌لک‌لر،
ان چوخ سئودییین اوآغ‌لار کیمی،
گؤزلرینی اوخشاییر…
گون ساچمادان
بالتا قوخولو آغاجین داش دورغون ذئهنیندن،
یونجالیق‌لارین کؤیسونه بوشالیر
شئه موجوق‌لارینین،
سپ سرین سخاوتینه گیریرسن
بیر اتک شعیر دریرسن جیم جیلاق سو
ال وورمادان ساخلاییرسان
گونش ساچلی ایل‌لرین انتحار آنلارینا
یورولمادان
بونلارین هامی‌سین بیر آندا یاپیرسان
سئوگیلیم.